Inuussutissarsiortup Jackie Lyngip Nuummi Nuukullak 3-mi inissianik 73-inik attartornermut isumaqatigiissut annertooq taamaatinniarlugu eqqarsaatigigaa juulimi saqqummiunneqarpoq.
Inissiat taakkuupput Kommuneqarfik Sermersuup Jackie Lyngimit attartorlugit innuttaasunut attartorteqqiitai. Isumaqatigiissut ineqarnermut suliamik taaneqartartumut ilaavoq.
Inuussutissarsiortup Jackie Lyngip Nuummi Nuukullak 3-mi inissianik 73-inik attartornermut isumaqatigiissut annertooq taamaatinniarlugu eqqarsaatigigaa juulimi saqqummiunneqarpoq.
Inissiat taakkuupput Kommuneqarfik Sermersuup Jackie Lyngimit attartorlugit innuttaasunut attartorteqqiitai. Isumaqatigiissut ineqarnermut suliamik taaneqartartumut ilaavoq.
Inuussutissarsiortoq maanna iliuuseqarpoq. Kommuneqarfik Sermersuumut attartornermik isumaqatigiissut atorunnaarsimappaa, pisumullu atatillugu kommunip iliuusai pakatsissutigigaatsiarlugit.
Attartornermut isumaqatigiissutip atorunnaarsinneqarnera pingasunngornermi nalunaarutigineqartoq kommunip pisortaata Ole Jakobsenip Sermitsiamut uppernarsarpaa.
Millionit isumaqatiginngissutaasut
Akerleriissut tassaavoq pisortanit erniaqanngitsumik akiligassaqanngitsumillu 28 millionit koruunit missaannik taarsigassarsiat kommunimit uterteqquneqarnerat. Inatsisinut naapertuutinnginnera paasineqarmat aningaasat Kommuneqarfik Sermersuumit uterteqquai.
Kommuni nammineerluni taarsigassarsisitsinini akueraa, Namminersorlutilli Oqartussat malittarisassat allatut nassuiarsimavaat, tamannalu maanna annertuumik kinguneqarpoq.
Inissiamut aningaasaliisut allat peqatigalugit Jackie Lyng marlunnik periarfissaqartoq Ole Jakobsen oqarpoq.
Taarsigassarsiat akilerneqassappat imaluunniit kommunimut attartortitsinermut isumaqatigiissutit allanngortinneqarlutik ineqarnermut akiliutit appartinneqarsinnaapput inatsisillu taamaalilluni malinneqalerlutik. Jackie Lyngip pisortanit erniaqanngitsumik akiligassaqanngitsumillu aningaasanik atornera taamaalilluni atuutiinnarsinnaavoq.
- Periarfissat marluupput. Aningaasat atukkat utertinnagit imaluunniit attartornermut akiliut qaffasissumiitsiinnarlugu, Ole Jakobsen oqarpoq.
Aningaasatigut annaasaqaataarujussuassasut
Jackie Lyngip kommunip piumasaatut ineqarnermut akiliummik taama annertutigisumik appartitsineq aningaasatigut 15 mio. koruuninik annaasaqaatigerussuassagamiuk, kommunimut isumaqatigiissutini taamaateriarlugu inissiat akunnittarfinngortinniarlugit siusinnerusukkut nalunaarutigaa.
Inissiani 73-iusuni attartortut kommunimut, illoqarfiit pingaarnersaanni inissianik amigaateqartumut, annertuumik ajornartorsiutaalissaaq.
Nuukullak 3-mi inissiani 73-ini attartortut pisumit sunnerneqassanngitsut Kommunimi pisortaata Ole Jakobsenip siusinnerusukkut neriorsornikuuai.
Jackie Lyngimik isumaqatigiinngissut eqqartuussivimmi aaqqinneqarumaartoq pisortap naatsorsuutiga:
- Attartornermut akiliutit akilertarpavut isumaqatigiissutillu unioqqutinagu.
- Innuttaasunut taakkunani najugaqartunut attartornermut isumaqatigiissut attapparput, taakkununnga maana pisumit akuliutinneqassanngillat. Pisormi kommunip attartortitsisullu akornanni suliassaammat, Ole Jakobsen oqarpoq.
Inuussutissarsiortup kommune annertuumik pakatsissutigaa
Ole Jakobsen naapertorlugu attartornermut isumaqatigiissummi allassimavoq isumaqatigiinngissutit isumaqatigiilluni aaqqinneqarsinnaanngitsut Kalaallit Nunaanni eqqartuussivinni aalajangiiffigineqassasut, tamannalu kommunimi pisortap pissasoq naatsorsuutigaa.
Kommuni ulluni tulliuttuni qanoq pisoqassanersoq aalajangiissaaq.
Kommunip suliamut atatillugu iliuusaa annertuumik pakatsinartoq Jackie Lyngip Sermitsiamut oqaatigaa. Kommunip nammineq inissiat attartorumallugit saaffiginikuusimagaa, taarsigassarsiniarnermilu isumaqatigiissut isumaqatigiissummut tamarmut ilaassasoq taanna oqarpoq:
- Isumaqatigiissut inissiallu maanna ilaqutariit 73-it najugaqarfigisaat uannut qinnutigisimavaat. Pisoq ilungersuutiginagu suleqatertik alaannarpaat.
- Aaqqiissutissamik ujartuinatik alaannarpaannga.
Attartortut qaammatini 18-ini najugaqarsinnaanerannik aaqqissuteqarniaraluarsimalluni Jackie Lyng aamma oqarpoq. Attartortut taamaaliornikkut annikinnerpaamik sunnerneqassammata, kommunilu aaqqiissutissamik nassaarnissaminut sivisunerusumik piffissaqartinneqarumaarluni.
