Inissiat arfineq-pingasut sanaartorneqalersut

Inatsisartut Aningaasaqarnermut Akileraartarnermullu Ataatsimiititaliaata Upernavimmi Uummannamilu inissiat attartortittakkat katillugit arfineq-pingasut  sananeqarnissaannut Naalakkersuisut qinnuteqaataat akueraat.

Akuersissuteqartoqarneratigut suliarinnittussanut isumaqatigiissutit inaarutaasut atsiorneqarsinnaalerput suliassallu aallartinneqarsinnaalissallutik.

Inissiat najukkami sanaartugassalerisunit saneqassapput, 2027-milu atulersinnaanissaat naatsorsuutigineqarluni, Naalakkersuisut tusagassiorfinnut nalunaarummi allapput.

Inissiat attartortakkat inuusuttunut inissiat sanaartorneqarnerisa malitsigisaattut sananeqassapput. Inuusuttunullu najukkaminni najugaqaannarnissamik kissaateqartunut, namminneerlutilli inissamik qulakkeerinissamut periarfissaqanngitsunut naatsorsuussaallutik.

65, 71 aamma 84 kvadratmeterit

- Naalakkersuisut qinigaaffimmi matumani sulinerini, isorliunerusuni ineqarnermut tunngasut pingaarutilimmik ukkatarineqarput. Tamanna pillugu Upernavimmi, Uummannamilu inissianik attartortittagassanik sanaartornissaq maanna aallartissinnaaleratsigu nuannaarutigeqaara.

- Neriuppunga inissiat attartortittagassat nutaat Upernavimmi, Uummannamilu innuttaasut najukkaminni najugaqaannarnissaannut ajornannginnerulersitsissasut,  inissianik, attaveqaqatigiinnermut avinngarusimasunillu isumaginninnermut,  ineqarnermut, attaveqaasersuutinut isorliunerusunullu naalakkersuisoq Aqqaluaq B. Egede oqarpoq.

Upernavimmi sanaartorneqartussat paarlii ilanngullugit 65,5 kvadratmeteriupput. Inissiamut isaarissami salliarnartaqassaaq, tassanngaanniillu ataatsimoorussamik teknikkeqarfimmukartoqarsinnaassalluni.

Illut qisummik saqqaqassapput, aappaluttumillu taartumik qalipaateqassallutik.

Uummannami inissiat ataatsimik marlunnilluunniit sinittarfillit angissutsimikkut kisimiittunut aappariinnulluunniit kiisalu aappariinnut ataatsimik arlalinnilluunniit meerartalinnut sinittarfeqatigisinnaasaminnut naleqqupput.

Paarliit ilanngullugit inissiat 71,19 m² aamma 84,67 m²-iussapput, ataatsimoorussamillu teknikkeqarfeqassallutik 8,32 kvadratmeterisut angitigaluni.