"Inissiisarfiit" allanngorlugit "parnaarussivinngortut"

Kalaallit Nunaanni Pinerluttunik Isumaginnittut aqqa Kalaallit Nunaanni Parnaarussiveqarfinnut allanngortinneqarpoq, qallunaatut Grønlands Fængsler.

Naalakkersuisut tusagassiutinut taama nalunaaruteqarput.

Danmarkimi Pinerluttunik Isumaginnittoqarfiup Danmarks Fængslerimik (Danmarkimi parnaarussiviit, aaqq.) ateqalerneranut atatillugu Kalaallit Nunaanni Pinerluttunik Isumaginnittoqarfiup Naalakkersuisut oqaloqatiginerisigut atermik allannguisoqarpoq.

Naalakkersuisut naapertorlugit taaguut nutaaq marlunnik siunertaqarpoq. Siullertut susassaqarfik Danmarkimi naalagaaffiup akisussaaffigigaluaraa aningaasaliiffigisarlugu isumaginnittoqarfiup kalaallisut ateqarnissaa pingaartinneqarpoq.

Aammattaaq taaguut “inissiisarfik” atorunnaarlugu “parnaarussivik” atorneqalernissaanut piffissanngortoq, Naalakkersuisut isumaqarput.

Nathanielsen: "Parnaarussivik eqqorneruvoq"

Atimik allannguineq eqqornerusumik iliornerullunilu piviusunik, inissinneqartut sulisullu inissisimaffiinik, pitsaanerusumik ersersitsisoq, Inatsisit atuutsinneqarnerannut naalakkersuisoq Naaja H. Nathanielsen isumaqarpoq:

- Sullissiviup atiata suliassaq kivinneqartoq ersersittariaqarpaa aamma inuiaqatigiinnit ateq paasineqarsinnaasariaqarpoq. Taamaammat Pinerluttunik Isumaginnittut pingaarnertut kalaallisut ateqalermata naammagisimaartorujussuuara.

- Tamatuma peqatigisaanik oqaatsip “isertitsiviup” oqaatsimik “parnaarussivimmik” taarserneqarnissaanut piffissaq pitsaasuusimavoq. Taamaaliorneq eqqornerusumik iliorneruvoq aamma piviusunik, inissinneqartut sulisullu inissisimaffiinik pitsaanerusumik ersersitsilluni, Naaja H. Nathanielsen oqarpoq.

Pisortaaneq nutaanik atserneqarnermut nuannaartoq

Atermik allanngortitsineq pinerluttulerinermi inatsisip allanngortinneqarneranut atatillugu 2026-imi aasakkut atuutilernissaa naatsorsuutigineqarpoq, atilli nutaat naalakkersuisut atuleriissavaat.

Suliffeqarfiup siunertaata erseqqinnerlulernissaa Kalaallit Nunaanni Pinerluttunik Isumaginnittut pisortaata Christian Høygaardip neriuutigaa:

- Ateq nutaaq nuannaarutigaara. Ilaatigut ateq kalaallisut oqaatsit atorlugit eqqarsaatigineqarpoq aamma akornutitaqanngitsumik qallunaatut nutserneqarsinnaalluni, illuatungaanili ullumikkut qallunaat atiat nutsigaavoq, aamma kalaallisut tiguneqarluarsimanani. 

- Kalaallit kissaateqarnerisigut Ilaatigut taagut “inissiisarfiit” ullumikkumut naleqqunnerusumut aamma malugiinnarluni ajornannginnerusumik paasineqarsinnaasumik allanngortinneqassaaq. Pineqaatissiinerit imaannut tunngasumik atip allanngortinneqarnera allannguutinik kinguneqassanngilaq, Christian Høygaard oqarpoq.

Inissiisarfiit atserneqartut

Inissiisarfiit ima atserneqarput:

• Nuummi Parnaarussivik
• Aasianni Parnaarussivik
• Ilulissani Parnaarussivik
• Qaqortumi Parnaarussivik
• Sisimiuni Parnaarussivik
• Tasiilami Parnaarussivik