Innaarsunni tunisisinnaaneq unitsikkallarneqartoq

Iluliarujussuaq Innaarsuit talittarfiata eqqannguaniippoq. Taanna aseroratarsinnaasoq kommunimi upalungaarsimasut nalilerpaat

Tamanna aalisartunut tunitsivinnilu sulisunut ajornakusoortitsimmat nunaqarfiup tunisassiorfiani tunisineq unitsikkallarneqassasoq Royal Greenland aalajangerpoq.

- Sillimaniarneq eqqarsaatigalugu Avannaata Kommuniani upalungaarsimasunit innersuutigineqarpoq tunisineq unitsikkallarneqassasoq, allapput.

Innaarsunni innuttaasut Pilersuisumukassagaangamik ataatsimoorlutik ingerlasaqqunagit Avannaata Kommuniani upalungaarsimasunit mianersoqqunikuuaat. Pilersuisormi talittarfiup eqqannguaniippoq.

Qatserisartut piareersimapput iluliarsuarlu nakkutigilluarneqarluni.

- Pisoq malinnaaffigaarput, nalunaarutigineqarumaarporlu tunitsivimmi sulineq ingerlaqqilerpat. Allat tunitsiviit nunaqarfinni allani ammapput, Royal Greenland allappoq.