Innersuussutit saqqummiunneqarput: Meeqqat suli marlunnik ukioqalinngitsut skærmimiitittarnagit
Meeqqat atugarissaarnerannik siuarsaanissaq aammalu skærmimik atuinermi kingunerisassat pitsaanngitsut pinaveersaartinnissaannik siunertaqarluni Isumaginninnermut Aqutsisoqarfik nunatsinni meeqqanut skærmimik atuinermut innersuussutit saqqummiuppai.
Isumaginninnermut aqutsisoqarfiup suliniutiminut atatillugu plakatit ineriartortippai, angajoqqaat aamma ulluunerani paaqqinnittarfiit skærmimik atuinermut eqqarsaatersuuteqarnissaannik kaammattuutigalugit.
Assi: Isumaginninnermut Aqutsisoqarfik
Meeqqat mikinerpaat qanoq sivisutigisumik iPad imaluunniit oqarasuaat atorlugu issiasariaqarpat, aamma skærmiminni sulerisinnaassappat?
Apeqqutit taakku angajoqqaat maanna ilitsersorneqarsinnaapput, immikkut siunnersuutinik meeqqat skærmit atuinerannut tunngasunik innersuussutinik misissuinermikkut, innersuussutit Isumaginninnermut Aqutsisoqarfimmit immikkut Meeqqat Ulluannut atatillugu saqqummiunneqarput:
- Ilaqutariit tamarmik ilaatigut ilaqutariit iluini isumaqatigiissutit malittarisassallu malitsinniarnerini ilungersunartorsiuteqartarput. Skærmip saani piffissamik atueriaaseq pillugu ilitsersuutip ulluinnarni ikiorsinnaavaatit soorlu oqaloqatigiinnerit, isumaqatigiissutit sinaakkutillu meeqqat angajoqqaallu aporaarfiunnginnerusumik paasinartumillu periuseqarnissamut sakkussatut, Isumaginninnermut Aqutsisoqarfimmit oqaatigineqarpoq, erseqqissaatigineqarlunilu meeqqat skærmimik atuinerat annertusiartortillugu tamanna meeqqat atugarissaarnissaannut inuulluataarnissaannullu sunniuteqarsinnaasoq.
Soqutiginnilluarit
Innersuussutit ilisimatusarnermut tunngapput, aqutsisoqarfiup meeqqanut tunngasutigut ilisimasaqarnera kiisalu aarlerinartorsiulernermik periuseqarluni misissuinerneerluni.
- Innersuussutini meeqqat inuunerannut digitalinngorsakkamut alapernaannissaq maluginiaqquneqarpoq, meeqqallu digitalinngorsakkamik inuuneranni ukiuinut inerikkiartornerannullu napertuuttunik toqqammavissiilluni, aqutsisoqarfik nittartakkaminni allappoq.
Innersuussut meeqqanut mikinerpaanut 0-miit marlunnik ukiulinnut tassaavoq ajornanngitsunnguaq: Skærmi atorneqassanngilaq. Aqutsisoqarfiup innersuussut taanna ima tunngavilersorpaa:
- Meeqqat 2-t ataallugit ukiullit timikkut attaveqarnermikkut silarsuaq inuilu paasissavaat. Attuuasaqarnikkut, naamasaqarnikkut, tusarnaarnikkut mamassutsikkullu malugisaatimi misigisai atorlugit inersimasunut tarrarsorsinnaajartornissartik pisariaqartippaat. Qarasaasiat attaveqaataatigummi soorlu skærmikkut tamanna pisinnaanngilaq.
Angajoqqaanut kaammattuut ersarissoq
Aqutsisoqarfimmit ilanngullugu angajoqqaanut kaammattuutigineqarpoq, meeqqaminnik samminnitsillutik skærmimik atuinaveersaartassasut:
- Skærmip saani piffissamik atuinerni meeqqamut attaveqarnerit annaasarpat. Meeqqap aamma imatut paasissavaa skærmi atorlugu piffissaq atorumanerugit meeqqamut piffissap atorneraniit.
- Taamaammat skærmi illikalaaruk ataatsimoorfissi pingaartinneruniarlugu. Oqarasuaatit ajoqusersuutaaqqunagu nipaarutsiguk.
Innersuussutit kaammattuutillu tamaasa atuarusukkukkit Isumaginninnermut Aqutsisoqarfiup nittartagaani atuarsinnaavatit.
