KL

DK

Innuttaasut naartunaveersaatinut isiginnittaasaat spiralilersuisimaneq pillugu suliap sunneraa

Spiralilersuisimanermut suliaq pissutaalluni naartunaveersaatit hormon aamma kobberspiralit innuttaasunit isiginerlunneqalersimasut peqqinnissaqarfiup maluginiarpaa.

Thomas Munk Veirum
Tusagassiortoq
Saqqummersinneqarpoq

Spiralilersuisimaneq pillugu suliaq, oqartussaasunit naartunaveersaatinik atuisitsineq pillugu suliatut taaneqartartoq, innuttaasut naartunaveersaatinik isiginninnerannut ajortumik sunniivoq.

- Hormon imaluunniit kobberspiral pineqarput.

- Tamatuma saniatigut arnat Depo-Proveramik kingullertigut kapitikkusunneq ajortut Peqqinnissaqarfimmit kingullertigut maluginiarneqarpoq. Tamanna inuit attaveqatigiittarfiinni ajortumik eqqartorneqartarnerata kingunerisinnaagaa ilimagineqarpoq, Peqqinnissaqarfik, Nakorsaaneqarfik aamma Naalakkersuisut tusagassiorfinnut nalunaarummi allapput.

Spiralilersuisimaneq pillugu suliaq tassaavoq 1960-ikkunni 70-ikkunnilu kalaallit niviarsiaqqat arnallu tuusintilikkuutaat spiralilersorneqarnikuunerat. Naalakkersuisut siulittaasuata tamanna inuiannik toqoraanertut taavaa.

Nakorsaaneq: Inuit namminneq aalajangigassaraat

Eqqortumik naartunaveersaateqarnerluni nalornissutigigaani, periarfissat assigiinngitsut eqqarsaatigalugit siunnersorneqarnissamut ilitsersorneqarnissamulluunniit Peqqinnissaqarfik saaffigineqarsinnaajuaannartoq Peqqinnissaqarfimmi oqartussaasut nalunaarutaanni erseqqissarneqarpoq.

Naartunaveersaatit arlaannaalluunniit ajornerullunilu ajunnginnerunngitsoq nakorsaaneq Paneeraq Noahsen oqarpoq:

- Naartunaveersaatit tamarmik pitsaaqquteqarlutillu ajoquteqarput, tamarmillu sunniuteqartarlutik. Depo-Provera naartunaveersaatit allat assigalugit, inunnut ataasiakkaanut iluaqutitaqarsinnaavoq Peqqinnissaqarfimmi neqeroorutaavoq.

- Depo-Provera kissaatiginngisamik naartulernissaraluamut iluaqutitaqarpoq ilaatigullu aaqartarnermi anniaatinut iluaqutaalluni. Tassunga atatillugu, nakorsamit siunnersorneqareernermi inuit namminneq qanoq naartunaveersaateqarnissartik aalajangigassarigaat pingaaruteqarpoq oqaatigissallugu, nakorsaaneq Paneeraq Noahsen tusagassiutinut nalunaarummi oqarpoq.

Arnat kisimik akisussaanngitsut

Peqqinnissakkut oqartussaasut erseqqissarpaat atoqatigiinnermi imminut illersornissaq arnap kisimi akisussaaffiginngikkaa, aamma usuup puua naartunaveersaatitut qularnaatsuullunilu iluaqutaavoq, ilaatigut kissaatiginngisamik naartulernissamut taamatullu nappaatsinut illersuutaalluartoq:

- Atoqatigiinnermi imminut illersoqatigiissinnaaneq pingaaruteqaqaaq. Tamanna arnap kisimiilluni akisussaaffigisinnaanngilaa. Tamatuma saniatigut atoqatigiinneq nammineq piumaneqarnissaa, toqqissisimanarnissaa ataqqeqatigiittoqarnissaalu eqqaamassallugu pingaaruteqarpoq. Taamaammat atoqatigiinnermi pitsaasumi oqaloqatigiissinnaanissaq tunngaviussaaq, Peqqissutsimut Naalakkersuisoq Agathe Fontain oqarpoq.

prævention naalakkersuisut inuiaqatigiit depo-provera samfund sundhedsvæsenet spiralsagen

ATORFIIT Se alle jobs

Powered by Labrador CMS