Innuttaasut nalliuttorsiornissaat annertoorujussuaq: Nuummi timmisartoqarfittaassap ammarneqarnissaanut kikkut tamarmik tikilluaqqusaapput
Nuummi timmisartoqarfittaassaq novembarip ulluisa 28-anni pisortatigoortumik ammarpat, illoqarfik tamaat nalliuttorsiornermik malunnartinneqassaaq.
Ulloq taanna ilaqutariinnut tamanut nalliuttorsiorfiusumut, nipilersortoqarluni aliikkusersuisoqarlunilu, kikkut tamarmik qaaqquneqarput, taama Greenland Aiports tusagassiuutitigut nalunaaruteqarluni allappoq.
Nuummi mittarfik
Foto: Greenland Airports
Nalunaaqutaq 12:35 Københavnimiit Nuummut timmisartup toqqaannartup siulliup tikinnerani ulloq aallartissaaq. Timmisartoqarfimmi qatserinermut biilit nutaat qullitik
ikittaartillugit, imermik tissaluttaajutigalutik, inissitsitersimallutik timmisartoq tikilluaqqussavaat, taava Greenland Airports tusagassiuutitigut nalunaarummi allappoq nangillunilu:
- Terminalip eqqaani illoqarfimmi meeqqat atuarfiini atuartut
erfalasulerlutik nalliuttorsiorpalaartumillu takutitsillutik ilaasut siulliit tikilluaqqussavaat, tamatumalu kingorna timmisartoqarfiup iluani qaaqqusanut aaqqissuussineq ingerlanneqassaaq, tassani ilaatigut Naalakkersuisut Siulittaasuat
Múte B. Egede oqalugiassalluni.
Tuukkap mittarfimmi minnera takusarneqarsinnaavoq, kisianni timmisartoqarfik pisoqarfiuallaanngimmat eqqumaffigineqartariaqarpoq, taamaattumik inissaqarpallaannngilaq aammalu security aqqutigineqarsinnaanani.
Katersortarfimmi ammasumik kaffisortitsineq aliikkusersuinerlu nalunaaqutaq ullup qeqqaniit tallimat tungaanut pingaarnertut nalliuttorsiornernut katersortarfik qitiussaaq.
- Tassani innuttaasut tamarmik kaffisoriaqquneqarput, tassanilu Tuukkap mittarfimmi minnera pisullu skærmersuami toqqaannartumik aallakaatinneqartut, toqqaannartumik malinnaavigineqarsinnaapput. Ilaatigut Hinnarik, Naja P ammalu Paaliit ilaqutariinnut tamaginnut aliikkusersuissapput nipilersussallutillu aammalu soorunami kaffeqarpoq kaageqarlunilu.
- Qaaqqusanut nereqatigiinnermik aammalu illoqarfiup qeqqani nalunaaqutaq 21.30 - 21.40 alutornarluinnartumik nipilersortoqarluni qummoroortartoqarlunilu, nalliuttorsiornerit naggaserneqassapput.
Nuuk tamakkerlugu nalliuttorsiornermi tassani, qilaap taartup tungaani qaamasussami katersuunnissamut misigisaqarnissamullu aammalu Nuuk International Airportip ammarneqarnerata malunnartinneranut, qaaqquneqarpoq.
- Greenland Airportsip Kalaallit Nunaanni sanaartukkat annersaata, piffiit nutaat, Nuummuinnaanngitsoq, kisianni Kalaallit Nunaat tamakkerlugu periarfissat nutaat silarsuaannik ammaassisussat, aallartinnerannik malunnartitsilluni, nalliuttorsiornissamut tassunga sapinngisamik amerlanerpaat takunissaat qilanaaraa, attaveqaqatigiinnermi pisortaq, Mikkel Bjarnø Lund allappoq.
