Innuttaasut ukiumut 1 milliardi koruuninik soraarnerussutisiaqalernissamut ileqqaagaqartarput
Soraarnerussutisiaqarnissamut aaqqissuussinermut pinngitsoorani ilaanissaq isumaqarpoq Kalaallit Nunaanni innuttaasut utoqqalinissaminnut ukiumut 1 milliardi koruuninik ileqqaagaqartartut. Soraarnerussutisiaqarnissamut aaqqissuussinermut pinngitsoorani ilaanissaq pillugu inatsit ukiut arfineq-pingasut qaangiuttut akuerineqareersorlu, Akileraartarnermut Aqutsisoqarfiup naatsorsuisimaneranit tamanna erserpoq.
Innuttaasut soraarnerussutisiaqarnissamut aaqqissuussinermut pinngitsoorani ilaanissaat isumaqarpoq Kalaallit Nunaanni innuttaasut utoqqalinissaminnut ukiumut 1 milliardi koruuninik ileqqaagaqartartut.
Leiff Josefsen
Soraarnerussutisiaqarnissamut aaqqissuussinermut pinngitsoorani ilaanissaq pillugu inatsisip akuerineqarneranit maanna ukiut arfineq pingasut qaangiussimalersullu, ukiumut 1 milliardi koruuninik innuttaasut ileqqaagaqartarput. Innuttaasut toqqissisimallutik utoqqalinissaat aningaasatigullu naammaginartumik atugaqarnissaat inatsisip siunertaraa.
Innuttaasut 75 procentit missaanniittut naammattumik ileqqaaruteqartartut, Akileraartarnermut Aqutsisoqarfiup misissuinerata takutippaa.
- Innuttaasut inatsimmut ilaatinneqartut ukiumullu 125.000 koruunit qaangerlugit isertitaqartut 75 procentii naammattumik ileqqaaruteqartarput. Arnat pisortanilu suliffeqartut soraarninngornissamut pisussaaffimminnik naammassinnikkajunnerusarput. Angutit amerlasuut namminersortullu assersuutigalugu aalisarnermit nikerartunik isertitaqarnerat, taamaammallu ileqqaarnissamut toqqammavimminnik naatsorsuinissamik ajornakusoortitsinerusarnerat, tamatumunnga nassuiaatissaasinnaavoq, Akileraartarnermut Aqutsisoqarfik nittartakkamini allappoq.
Innuttaasut 6.000-ingajaat ileqqaaruteqarnissamut pisussaaffik naammassinngitsoorsimavaat
Innuttaasut 5.874-it 2024-mi aggustimi ileqqaaruteqarnissamut pisussaaffik naammassinngitsoorsimagaat, Akileraartarnermut Aqutsisoqarfiup naatsorsuinerata takutippaa. Aningaasarsianik isertitaqartunut ileqqaaruteqarnissamut pisussaaffik 2023 ileqqaaruteqarnissamik toqqammaviup 7 procenteraa.
Namminersorlutik inuussutissarsiortunut ileqqaaruteqarnissamut pisussaaffik ileqqaaruteqarnissamik toqqammaviup, suliffeqarfiup sinneqartoorutaata akileraarutinut akiligassarititaasup 5 procenteraa.
- Soraarnerussutisiaqalernissamut aaqqissuussinermut akiliisimanngikkuit, akiliutiginngitsuukkatit aappaagu skattekortinni akileraarutinnut ilanngaativit procentiata qaffanneqarneratigut akilersinneqassapput. Aningaasaatitit soraarnerussutisiaqalernissamut aaqqissuussivimmut Akileraartarnermut Aqutsisoqarfiup kingorna akilissavai, Akileraartarnermik Aqutsisoqarfik ilisimatitsivoq.
Innuttaasut aappaagumut akileraarutiminnik qaffaavigineqarusunngitsut soraarnerussutisiaqalernissamut ileqqaagassanut akiliutiginngitsuukkanik akiliisinnaapput, uppernarsaatillu Akileraartarnermut Aqutsisoqarfimmut takutinneqassapput.
