Inoorususseqarluni utoqqalineq

Qanittumi allaaserisaq ikinngutitta 80-iliilersup nassiussaa atuarpara, oqariartuutaa nuannaralugu, tassalu utoqqanngorluni toqunissaq allatut qanoq isiginiarneqarsinnaanersoq.

Allaaserisaqartuuvoq psykologi aqqa taaneqanngitsoq allaaserisaanilu titarnertaat kingulliit imaapput:

”Arlaannattaluunniit inuunerup naggatissaa qanoq ikkumaarnersoq ilisimanngilaa. Immaqamiuna taannartaa immini tunissutaasoq, naggatissamik  naluneq.  Tunissutaavoq inuunerup kapitaliani kingullermi nutaanik qupperaajuarnissaq – ilassiorluni, alapernaalluni sapiissuseqarlunilu – aamma utoqqarsuanngornermi. Immaqamiuna tassanerpiarmiittoq: pinnguarusussuseq uummaarissuserlu iperanngikkaluarlugit utoqqalineq – taamalu nuannersumik inoorusussuseq pigalugu utoqqarsuanngorluni toqunissaq”.

Taamatut utoqqalisinnaavutit, inuunerit annaanniarlugu ilungersuutiginngikkukku.

Hm, iperaaneq

Inuuninnut ilaapput tassanngaannartumik toqukkut annaasaqarnerup aliasutsitsineri, nukimmik aammalu timikkut tarnikkullu peqqissutsinnik tiguaasimasut.

Aamma annaasaqarnissamut ernummateqartarnermik malitseqarsimasut. Annaasimasat ikittuunnginnamik paasivarali aliasuutit itissutsimikkut annertussutsimikkullu assigiinngitttartut. Assersuutigalugu alianarpoq siusissukkut ataataarunneq, ikinngutinik inuusoqatinik annaasaqarnerit, imminut toquttunik alianartumik annaasaqarnerit, taakkulu ilagaat aqqaluara asasara.

Inuuninni kapitali taanna taarsiorfiullunilu alianaqisoq. Ukuli utoqqaat, soorlu aanaakkut, anaanaga qatanngutaalu qimagupput, pissusissamisoortutullusooq ittumik akueriuminarnerusumik, qasullutik napparsimallutillu.

Utoqqaliartorninni nuannaarnissaq isumaqarneruleraluttuinnarpoq nuannequtiginerpaavaalu soqutigisanik aallussisinnaaneq inuunermillu pingaartitsinerulerneq. Nukissaajaatit piunnaarlugit pisinnaagallartilluni nuannersussarsiulerneq, isumaqarnerusunik.

Kapitali nutaaq

Inuuninni kapitali nutaaq iserterfigeqqammerpara, ukiorpassuarni nuannaralugu aallussara iperarlugu: aqutsineq inuusuttunillu ilinniartitsineq.

Tassani ussat isumassarsisavara oqartarmata aallaqqaammut ilungersunartartoq. Atuuttuarsimasunik iperaaniarneq ajornaatsuinnaanngilaq, akuersaarnaqaarli inuuneq sulerulunnermut tiguartisimaarnerujussuarmullu atorunnaarlugu.

Nuannernikooqaaq piffissanngortarporli inuusunnerusunut nangitassiinissaq, piniinnarani. Tassa tunissut uannut isumalik!

Ulluinnaat naalagaaffeqatigiit sorsunnermut piareersarfigiligaat nunarsuarmilu sorsuffiulersumi soqqusaatsumi inuuffigileratsigit eqqaasinneqartuartarpugut toqusussaalluta.

Meeraagallarama inuusunninnilu toqu taarsiornertut anniaateqarfittullu isigisarpara. Maanna ernumanartua aanngariartulersimasutut ippoq. Uteriiffiginerulersimavakka peqqikkusunneq nuannaarnissarlu. Suli ukiorpassuarni inuunissaq kissaatigalugu.

Pensionistitut inuulernissara qanilliartupiloormat aalajangiunnikuuvara peqqikkallartillunga kiffaanngissuseqarneq pingaartillugu utoqqaliartorusullunga – angusaqarusussuseq atorfigissaarnissarlu aqutsisuutinnagit, pisinnaatillungali qanilaarnermik alapernaassusermillu ingerlateqarusullunga, soorlu allaaserisami sammisanni inassut akorluarlugu. Misigisaqarnaqaaq inuuneq allatut atulerlugu.

Ernummatit isumakuluutillu iperarlugit iluaq. Soorunami pisoqartarpoq ernumanarsinnaasunik taakkuli aqutassarinngilaannga. Inuuneq soorlu oqinnerulersoq piuminarnerulerlunilu. Allaaserisaqartoq issuagara ilaatigut ima oqarpoq: Pilimannginneq iluaqutissanngorsinnaavoq annaasaqaataanani.

Inuuninnguaq!