Inuit innarluutillit tapersersorneqarnissaat pillugu inatsisissamut isornartorsiutit misissorniarlugit Aqqaluaq neriorsuivoq

Naatsorsueqqissaartarfiup kisitsisaataasa kingulliit takutippaat Kalaallit Nunaanni innuttaasut innarluutillit 2018-imi 1.131-usut.

Inuit innarluutillit isumagineqarnissaat kommuninit 2011-miilli isumagineqarpoq, Kalaallit Nunaat Naalagaaffiit Peqatigiit inuit innarluutillit pillugit isumaqatigiissutaanut 2012-imiillu ilannguppoq.

Nunatta karsianit ukiumut 65 millionit koruunit missaat inuit innarluutillit atugassanut (60 millionit koruunit missaat) aamma inuit innarluutillit oqaaseqartartuannut (5 millionit koruunit sinnilaarlugit) atorneqartarput.

Sinaakkutit maanna taamaapput. Naalakkersuisut inuit innarluutillit tapersersorneqarnissaat pillugu inatsimmik nutaamik atuutsitsilernikkut pitsaanerusumik atugassaqarnissaat anguniarpaat. Inatsisissatullu siunnersuutigineqartoq aallaqqaammut tusarniaassutigineqarpoq.

Inuilli innarluutillit sinniisaat minnerunngitsumillu kommunit akerliusut amerlammata Naalakkersuisut inatsisissatut siunnersuut allanngorteriarlugu tusarniaassutigeqqissallugu aalajangerput.

Maanna tusarniaanerit naammassineqarpoq sinniisulli suli naammaginninngilluinnarput. Akerliuneq ima annertutigaaq inuit innarluutillit oqaaseqartartuat aamma kattuffiit inuit innarluutillit sinnerlugit sinniisuusut unitsitsigallarnissamik piumasaqarlutik inuit innarluutillit tapersersorneqarnissaannut inatsisissatut siunnersuut Inatsisartut ukiakkut ataatsimiinneranni oqaluuserisassanit peerneqarnissaanut kissaatigalugu.

Inatsit piffissami uani qinigaaffimmi naammassineqassasoq aalajangiusimagaa

Naalakkersuisut inuit innarluutilinnut tapersersorneqarnissaat pillugit inatsisip nutaap qinigaaffimmi matumani naammassineqarnissaanik pilersaarutitik allanngortissimanngikkaat Meeqqanut Inuusuttunullu Naalakkersuisoq, Aqqaluaq Biilmann Egede (IA), erseqqissaavoq.

- Qinigaaffik naangajalerpoq. Naalakkersuisut inatsimmik nutaamik atuutsilersitsinissartik sooruna nukingissutigigaat?

- Inatsisiliorniaannarluta inatsisiliorneq ajorpugut. Inunnut innarluutilinnut pitsaasunik toqqissisimanartunillu atugassaqartitsinissaq siunertaraarput. Innuttaasut taakku inatsisitigut erseqqissunik atugassaqartinneqarnissaat pisariaqarluinnarpoq, tamannalu qinigaaffiup naannginnerani naammassiniarparput. Piffissalli ingerlanerani suliassaq kinguartinneqarsiinnaanera eqqartorneqarsinnaavoq. Suliamut attuumassutillit tusarnaarusullugillu peqataatikkusuppavut, kisianni inatsisip nutaap akuersissutigineqarnissaa suli anguniarparput, Aqqaluaq Biilmann Egede erseqqissaavoq.

Naalakkersuisut naalakkersuisoqarfimilu inatsisissamik atuisussanit isornartorsiuineq tunngavissaqarnersoq misissorlugulu nalilerumaaraat aamma erseqqissarpaa.

Kalaallit Nunaata isumaqatigiissut eqqortissinnaaneraa apeqquserneqarpoq

Aqqaluaq Biilmann Egedep apeqquserpaa sooq Kalaallit Nunaata inuit innarluutillit pillugit isumaqatigiissutip malinnissaa taama ajornakusoortitsigigaa:

- Kalaallit Nunaat nunanit allanit inuit innarluutillit pillugit isumaqatigiissummik atuutilersitsisimasunit allaanerulluinnarpoq. Inoqarfinni mikisuni avinngarusimasuni najugaqarpugut. Assersuutigalugu inunnut innarluutilinnut paaqqinnittarfinnik 70-inik pilersitsisinnaanngilagut. Attaveqaasersuutit allaanerulluinnarput, inunnullu innarluutilinnik isumassuisinnaasunik ikittunik peqarpugut.

- Taamaattumik isumaqatigiissutip immikkoortuisa misissornissaat pisariaqarluinnarpoq, nalilerlugulu immikkoortut inuit innarluutillit oqaaseqartartuata sinniisaatalu isornartorsiugai naammassisinnaanerlugit, meeqqanut inuusuttunullu naalakkersuisoq Aqqaluaq Biilmann Egede (IA) naggasiivoq.