KL

DK

Inuit teqqialinnik amerikamiullu aningaasaataannik Nuummi agguaasut

Amerikamiut aningaasanik nasanillu teqqialinnik marlunngornermi agguaassipput. Politiit nalunaarfigineqarsimasut pisoq uppernarsarpaat.

Assimi takuneqarsinnaapput inuit amerikamiut erfalasuata qalipaat atorlugit atisalersorsimasut aningaasanik inuusuttunut agguaasut.
KASSAALUK KRISTENSEN
Digitalredaktøri
Saqqummersinneqarpoq

Angutit amerikamiut erfalasuannut assingusunik atisaqartut nasanik teqqialinnik, erfalasunik allarpassuarnillu agguaassiartorlutik angerlarsimaffinnut kasuttoqattaartut pillugit innuttaasunit tupigusuttunit arlalinnit Sermitsiaq saaffigineqarpoq. Amerikamiorpaluttumik taakku oqalupput.

Inuit taakku Amerikamiuugunartut Amerikamiut erfalasuat Donald Trumpillu assiganik tigummiarlutik angalaarput.

Pisumit assilisat inuit nittartakkatigut attaveqatigiittarfianni Facebookikkut siammarterneqarput, tassani inuit natsanik amerikamiullu aningaasaataannik agguaasut takuneqarsinnaallutik.

Politiinut nalunaarutigineqartut

Illoqarfiup qeqqani pisoq politiinit uppernarsarneqarpoq:

- Illoqarfiup qeqqani dollarinik natsanillu agguaassisoqarneranik nalunaarfigineqarsimanerput uppernarsarsinnaavara. Aammattaaq politiit ilaata biilinik allamut suliaqariartorluni ingerlaartilluni pisumik takunnissimanerat uppernarsarsinnaavara, Kalaallit Nunaanni Politiini pigaartut pisortaat Jeppe Andsager Sermitsiamut oqarpoq.

- Maannakkut iliuusaat inatsisinik unioqqutitsinerua?

- Tamanna pillugu oqaaseqarsinnaanngilanga, oqaannarsinnaavungali inuit akerliussutsimik takutitsinermut assigusunik iliuuseqarusukkunik pilersaarutitik politiinut nalunaarutigissagaat. Taamaalillutik politiinit siunnersorneqassammata, Jeppe Andsager oqarpoq.

Angerlarsimaffinnut kasuttoqattaartut politiinut nalunaarutigineqarsimanngitsut pigaartut pisortaat oqarpoq.

Nutaarsiassaqartitsivik: Youtubemi tusaamasaasut

Qallunaat tusagassiorfiat TV2 allappoq tusagassiorfiup Nuummi aallartitaasa marlunngornermi Amerikamiut eqimattat Nuummi naapissimagaat, taakkulu tamat attaveqatigiiffiini sunniiniarnermik suliaqartartuusut, 'Nelk Boys'-imik taaguuteqartut. Nalunarpoq inuit politiinut nalunaarutigineqartut taakkuusimassanersut.

TV2 allappoq eqimattat YouTubemi kanaliat 8 millioninit amerlanerusunit malinnaaffigineqarpoq, tassanilu quiasaarutaat angalanerillu saqqummiunneqartarput:

- Videoliat ilaat Nelk Boysimi sunniuteqarniarluni suliaqartartumit Andrew Tatemit, 2023-mi Romaniami inunnik niuertitsisartutut, pinngitsaaliilluni arnerisutut aaqqissuussaasumillu pinerluuteqartutut unnerluutigineqartumik imaqarpoq, videoliarlu alla præsidentiusimasup Donald Trumpip timmisartuanut Trump Force One-mut ilaaqquneqarnermut tunngalluni.

inuiaqatigiit donald trump nuuk samfund politi

ATORFIIT Se alle jobs

Powered by Labrador CMS