Salling Groupimiit Polar Seafoodip kapisilinnik tunisassiorfianut Polar Salmon Hjerting Laksimut, kapisilinnik pujuukkanik mamarsaasikkanillu tunisassiortumut, annertuumik piumasaqaateqartoqarpoq.
Tunisassiorfimmit kapisillit suliarineqartut piffissami 2018-imiit 2024-mut inuit ikinnerpaamik 27-t listeriamik nappaateqalersimanerannut attuumassuteqartut Statens Serum Institutimiit uppernarsereeraalu taama pisoqarpoq.
Salling Groupimiit Polar Seafoodip kapisilinnik tunisassiorfianut Polar Salmon Hjerting Laksimut, kapisilinnik pujuukkanik mamarsaasikkanillu tunisassiortumut, annertuumik piumasaqaateqartoqarpoq.
Tunisassiorfimmit kapisillit suliarineqartut piffissami 2018-imiit 2024-mut inuit ikinnerpaamik 27-t listeriamik nappaateqalersimanerannut attuumassuteqartut Statens Serum Institutimiit uppernarsereeraalu taama pisoqarpoq.
Tunillatsissimasut ilaasa sisamat listerialimmik nerinertik toqqutigaat.
- Nerisassat isumannaatsuunissaat Salling Groupimi pingaartinneqarpoq, pissutsillu isornartut ilungersunartullu nalunaarutigineqareersullu niuerneq attatiinnarneqassappat piumasaqaaterpassuarnik atuutsitsilerpugut.
- Piumasaqaativut annertupput, nerisassat isumannaatsuunissaasa saniatigut aamma aaqqissuussaanikkut allannguisoqartariaqarsimavoq.
- Suliffeqarfik soorunami malinnaaffigiuarparput, pingaarnerpaatikkatsigumi pisisartut nioqqutitsinnik tatiginnissinnaanissaat.
Danmarkimi ulluinnarni nioqqutissat niuertarfiit annersannik Nettomik, Bilkamik Føteximillu pisiniarfiutillip Salling Groupimi tusagassiornermut pisortaa Jacob Krogsgaard Nielsen Sermitsiamut allakkatigut taama akivoq.
Kapisilinnut listeriamik napparsimasunik niuerutigineqarsimasunut pisumut atatillugu suliffeqarfissuup kapisilinnik tunisassiortumut niueqateqarnini kinguneqartissimaneraa tusagassiornermut pisortaq aperigatsinni taama akivoq.
Kapisilinnik listeriaqartunik tunisassiortoqarsimanera danskit tusagassiorfiata Jyske-Vestkystenip qulaajaaffigisaa maannakkut oqaluuserineqarpoq. Danskit tusagassiorfiini aamma Sermitsiami sapaatit akunnerni kingullerni sammineqarluni.
Polarimi pisortaq: Pisisartuvut attaveqarfigilluarpagut
Pisoq pillugu pisisartut arlaatigut qisuariarsimanersut Polar Salmon Hjerting Laksimik piginneqataasumi Polar Seafood Denmarkimi pisortaaneq Henrik Leth Sermitsiap aperaa.
- Pisisartuvut attaveqarfigilluarpagut paasissutissittarlugillu. Ajornartorsiutit taakkulu qanoq annertutiginersut paasigatsigit nutaanik aqutsisoqalerpugut suleriutsillu tamaasa misissorlugit, Henrik Leth mailikkut allappoq.
Polar Salmon Hjerting Laksip tunisassiai Danmarkimi pisiniarfinnut tunisat tamarmik maanna listeriaqarnersut misissorneqartalertut aatsaallu listeriaqanngitsut uppernarsarneqareerput tunisassiorfimmiit anninneqartalertut pisortaq oqarpoq.
- Misissuisarneq sukaterneqarmatali 400-t sinnerlugit misissuisoqareerpoq, tamarmillu listeriaqanngitsut paasineqarluni, Polar Seafoodimi pisortaaneq oqarpoq.
Kalaallit Nunaanni tunisaanngitsut
Pisiffik Brugsenilu Polar Salmon Hjerting Laksimeersunik pisiassaateqanngitsut niuertarfiit ilisimatitsipput.
Polar Seafood Denmark, Aalborgip eqqaani Vodskovimi qullersaqarfeqartoq, kalaallit suliffeqarfissuannit Polar Seafood Greenlandimit qallunaallu ingerlatseqatigiiffiannit S-13 Holdingimit 50-50 procentimik pigineqarpoq.
S-13 Holding Islandimiunit Brimimit pigineqarpoq, pisortaallunilu Gudmundur Kristjansson. Taanna Polar Seafood Denmarkimi siulersuisuni siulittaasuuvoq.
