Inuussutissalerinermut Aqutsisoqarfiup allaffittaava namminersorlutik inuussutissarsiortunut avammullu niuernermut iluaqutaassasoq

Inuussutissalerinermut, Nunalerinermut aalisarnermullu Ministereqarfik, ulluinnarni Inuussutissalerinermut Aqutsisoqarfimmik taaneqartartoq, tallimanngormat Nuummi Industrivejimi Aalisarnermut, Piniarnermut Nunalerinermullu Naalakkersuisumit Peter Borgimit (D) danskillu Inuussutissalerinermut ministeriannit Jacob Jensenimit (V) atoqqaarfissiortinneqarpoq, ullorlu malunnartinniarlugu champagniatorfinnut champagniamik sassaallertoqarpoq, ministerillu tamarmik oqalugiarput.

- Uanga isiginninnera malillugu namminersorlutik inussutissarsiortortatta nunanut allanut niuvertut, maanna toqqaannarnerusumik qanimullu inuussutissalerinermut aqutsisoqarfimmik attaveqarsinnaalerput. Ungasinnerusoq isigalugu immikkoortoq tigusinnaalerparput, maannalu piginnaaasanik qaffassaanissamut periarfissaqalerpugut, taamaalillunga siunissamik tigusisinnaanngussalluta, Peter Borg oqarpoq.

Siunissami immikkoortup tigusinnaaneranik kissaat tunngavilerumallugu, Peter Borgip Jacob Jensenillu kalaallit danskillu oqartussaasuisa akornanni sulisunik paarlaateqatigiittarnissamik piginnaanngorsaanissamillu suleqatigiinnissamut isumaqatigiissut atsiorpaat.

- Inuussutissalerinermut immikkoortumi oqartussaaffiit amerlanerusut tigunissaat politikikkut toqqaraanni, suliatigut piginnaasatigullu piffimmiittoqartuarnera pissutigalugu taamaaliornissamut aamma periarfissaqalissaaq, Jacob Jensen oqarpoq.

Timmisartorluni pulaartoqartassanngilaq

Inuussutissalerinermut aqutsisoqarfiup Nuummi immikkoortuata nutaap ammarnera iluaqutaasoq Jacob Jensen isumaqarpoq, taamaaliornikkut taanna inuiaqatigiinnut kalaallinut attuumassuteqarnerulissaaq, taakkulu piffimmi ilisimasanik pissarsillutillu pissutsinik paasinnissapput, taamaalillutillu suliassanik pilertornerusumik naammassinnissinnaalissallutik.

- Unammilligassat periarfissalluunniit pileraangata timmisartumik tikeraaginnarnani piffimmi najuunneq iluaqutaavoq, taamaalilluni namminersorlutik inuussutissarsiortut allaffimmut saaffiginnissinnaalissapput, sulisullu misissuiartorlutilluunniit nakkutilliiartorsinnaallutik, imaluunniit aamma ingerlaannaq siunnersorneqarneq ilitsersorneqarnerlu aamma pisinnaapput.

- Sapaatip akunnerini arlalinni qaammatiniluunniit utaqqeqqaarnani qanoq pitsaanerusumik iliorsinnaanermut ikiuisoqarsinnaalissaaq. Maannami piffissaq tamakkerlugu maaniilerpugut, piffimmilu periarfissanik unammilligassanilluunniit aaqqinneqartussanik takusaqarfiusinnaasuni toqqaanartumik oqaloqatigiittoqarsinnaalerpoq, Jacob Jensen oqarpoq.

Royal Greenlandimik ataatsimeeqatigiinneq

Jacob Jensen aamma Royal Greenlandimiippoq, tassanilu Kalaallit Nunaannit toqqaannartumik avammut niuersinnaanermik siuarsaanissaq, avammullu niuernermi suleriaatsinik pisariinnerusunik ineriartortitsinissaq oqallisigineqarput.

“Immitsinnut ungasinnerput ukiumoortumillu ornigulluni nakkutilliiartortarnerni unammillernartut patsisigalugit, attaveqaatitigut ataatsimeeqatigiinnikkut akuersissutinik tunniussisoqartalernissaa oqaloqatigiissutigineqarpoq. Taamaaliornikkut qinnuteqaatinik suliarinninnermi akuersissutinillu tunniussinermi suliamik ingerlatsineq sivikinnerulersinneqassaaq, ingammik nunanut allanut soorlu Kinamut Vietnamimullu il.il.” Royal Greenland pulaarneq pillugu allappoq. 

Tassanilu EVT aamma HR-imi attaveqarnermullu akisussaasup Bodil Marie Damgaardip suliffeqarfiup danskit inuussutissalerinermut ministerianut kissaatai saqqummiuppai, ilanngullugulu nakkutilliiartornermi nalunaarusiat kalaallisut danskisullu allanneqartarnissaat kisaatigaat, taamaaliornikkut piumasaqaatit malinneqartussat paasilluarneqarnerusinnaaqqullugit.