Inuuti Fleischer: Peqqinnissaqarfimmi ukiunik 40-nngortorsiortoq

Inuuti Fleischerip ukiunik 40-nngortorsiornera Dronning Ingridip Napparsimmavissuani ataatsimiittarfiit ilaanni nallittorsiorpalaartumik malunnartinneqarmat, iserlugu kalaallit nerisassannaavialaarsunnillunilu qaaqqusat ataqqinnippalaarlutik tipaatsupput.

Nunap immikkoortuini peqqinissaqarfinnut pisortap tullersortaa, Ella Skifte, Peqqinnissaqarfik Sermersuumilu nakorsaaneq, Jesper Olesen, qaaqqusat sassaallikkanik soorlu savap neqaanik aqitsunik mattannillu tamulunneranni oqalugiartunut ilaapput.

Inuuti Fleischerip suliaminut pikkorilluinnartuunera, tunniusimajuartuunera inuttullu piginnaasaqarluarnera Peqqinnissaqarfimmi ukiuni 40-ni sulinerani maluginiarneqarsimasut, taakkua marluullutik oqalugiarnerminni erseqqissarpaa. Inuuti Peqqinnissaqarfimmi ukiorpassuarni sulinerminut Namminersorlutik Oqartussanit allagartamik Naalakkersuisunut Siulittaasumit Jens-Frederik Nielsenimit atsiorsimasaanik nersornaaserneqarpoq.

Malunnaateqarluartoq

Inuuti Fleischer Peqqinnissaqarfimmi ukiuni 40-ni sulinermini malunnaateqarluarsimaqaaq. Peqqissaasunngorlaatut Dronning Ingrip Napparsimmavissuani 1985-imi sulilerpoq – ullumilu tassa ukiut 40-t qaangiussimalereertut Peqqinnissaqarfik Sermersuumi peqqissaasunut pisortaavoq, Dronning Ingridip Napparsimmavissuani allaffeqarluni.

Peqqinnissaqarfimmili ukiorpassuarni sulinermini naammassisarpassuaqaannanngilaq. Piffissammi ingerlanerani aamma ilinniartitsisuusarsimavoq, siulersortaasarsimavoq aaqqissuusseqataasarsimallunilu – nunatsinnilu peqqissaanermi sinaakkusersueqataalluni. Nunatsinni Peqqissaanermik Ilinniarfiup pilersinniarnerani 1980-kkut ingerlaneranni aamma suleqataavoq, tamatumalu kingornatigut ukiut ingerlaneranni Aasianni forstanderiulluni, ilinniartitsisuulluni, peqatifigiiffimmi siulittaasuulluni nunatsinnilu peqqissaanermi ileqqorissaarnissamut siunnersuisoqatigiinnik pilersitseqataalluni.

Aqutsisutut ilinniarsimasuunini peqqissaanermi inunnik sullissinermi allaffissornermilu suliami ataqatigiissarluarnissaannut atorluartarsimavaa – maannalu pisortatut ulluinnarni aamma sulinermini.

Peqqinnissaqarfimmi ukiuni 40-ni sulinini kingumut maanna qiviariaannanngorpaa – tassanilu tassa ineriartortitseqataangaatsiarsimasutut nangaarianngivilluni imminut taasinnaakutsoorpoq.