Iranip Israel saassuppaa qaartartut 200-it tungaanut amerlatigisut atorlugit
Iranip Israel qaartartunik saassuppaa, Israelip illersornissaqarfia taamak ilisimatitsivoq. Ilanngullugu nalunaarutigineqarpoq sumiiffinni arlalinni qaartartut qaartarneri sakkortoqisut.
Hizbollahip raketinik saassussineranit Israelimiut qimaaffissianut qimarngupput. Assilisaq Israelip qiterpasissuaneerpoq ullumi marlunngornermi siusinnerusukkut assilisaq.
Assiliisoq: Ronen Zvulun/Reuters
Iran qaartartunik igeriussisaqattaarluni Israelimut saassussivoq, Israelimilu innuttaasut siusinnerusukkut mianersoqquneqarsimapput, sakkortuumik saassussisoqarsinnaanera ilimagineqarmat.
Qaartartunik saassussisoqarneranik nalunaarutit marlunngornermi nunatta nalunaaqutaa naapertorlugu nal. 15.30 takkupput, piffissallu taamaalinerani saassunneqartoq siulleq tassaavoq Jerusalem, kingornalu Israelimi nunap immikkoortuini assigiinngitsuni saassussineq ingerlanneqarluni.
Kalerrisaarutit sumi tamani tusarsaasut malitsigisaannik inuppassuit qimaaffissianut qimarngutsippaat.
Maannamut saassussinerup annertussusaa pillugu paasissutissat erseqqissut suli saqqummiunneqanngillat.
Israelip sakkutuuisa radiuatigut oqaatigineqarpoq, Israelimut qaartartut 200-ngajaat igeruíunneqarsimasut.
Jerusalemip nalaani qaarujussuarnerit arlallit pisimasut nalunaarutigineqarpoq.
Suli paasinarsinngilaq qaartartut nunamut tutsinnagit silaannarmi qaartinneqarnerisa kingunerisaanik taamak annertutigisumik qaarujussuartoqaqattaarnersoq.
Reuters allappoq, qaartartut Iranimeersut ilai Jordanip silaannartaani ingerlaarnerminni nakkartinneqartarsimasut.
Netavisen Ynetnews allappoq, qaartartut Iranimeersut Israelimut ingerlaarneranni, Hizbollah Libanonimeersoq Israelimut aamma qaartartunik igeriussisimasoq.
Israelimut timmisartuussinerit tamarmik unitsinneqarput.
Teheranimi, Iranip illoqarfiisa pingaarnersaanni, Iranip sakkutuuisa qullersaat Irans Revolutionsgarde nalunaarummik saqqummiussaqarput. Tassani allassimavoq, missilinik saassussineq Israelip Iranip illersuisuinik saassussinikkut toqutsisoqarsimanermut saassussineq akiniutaasoq.
Toqutaasut ilagaat Hamasip siulittua Ismail Haniyeh, taanna Teheranimi, Iranip illoqarfiisa pingaarnersaanni, juulip 31-ani toqutaavoq, aamma Hassan Nasrallah, Hizbollahip siulittaasua, taanna Beirutimi septembarip 27-ani toqutaavoq.
Amerikami oqartussat marlunngornermi siusinnerusukkut mianersoqqussutigaat, missilinik saassussinissaq ilimanarluinnalersimasoq.
Amerikami tusagassiorfik Axios vestimit paasissutissanik tunngaveqarluni oqaluttuarpoq, Iran Israelimut qaartartunik ballistiskiusunik saassussissasoq naatsorsuutigineqartoq.
Axios naapertorlugu qaartartoq taamaattup Iranimit Israelimut ingerlaarnera 12 minutsinik sivisussuseqarpoq.
Apriilimi Iran Israelimut missilinik droninillu hunnurujulikkaanik sakkoqarluni saassussivoq.
Taamanikkut USA Tuluillu Nunaat Israelimut ikiuupput qaartartunik droninillu saassussissutaasunik nakkakaatitsillutik.
Taamanikkut qaartartut ikittuinnaat Israelimut apuupput Israelimilu ajoqusiinngitsutsut taamani ilisimatitsissutigineqarpoq.
