Island: Imermik tissaluttaatit lavamut atorneqarput
Islandimi Reykjanesip qeqertaasa ilaanni qaqqap innermik anitsinerata kingunerisaanik nukissiornerit imermillu pilersuinerit ulorianartorsiortinneqarput, taamaattumillu lava nillorserniarlugu upalungaarsimasut imermik tissaluttaatinik atuipput.
Sapaatip-akunnerata siuliani Islandimi Reykjanesimi innermik anitsisoqarmat assilisaq.
Foto: Civilbeskyttelse i Island/Reuters/Ritzau Scanpix
Attaveqaatit pingaarutillit lavap aqqusaannginniassammagit qarmagaliortoqarpoq.
Svartengimi nukissiorfimmut takornariallu ornigarluartagaannut Blue Lagoonimut lavap qanilliartornera qarmakkat unitsikkallarsimagaat, Islandimi tusagassiorfik icelandreview.com allappoq. Blue Lagoonimili biilit unittarfiat lavamit qarsunneqarpoq.
Maannamut suliniutit iluatsilluarsimasut, Helgi Hjörleifsson, lavap nillorsernissaanut akisussaasoq, tusagassiuutinut nalunaarummi oqarpoq.
Annikilliartortoq
Islandimi silasiorfik nalunaarpoq innermik anitsineq annikilliartorpasittoq.
- Innermik anitsisut pingasut suli innermik anitsisarput. Innermik anitsisarfik qeqqaniittoq, lavaqarnerpaaffik, ullumikkut innermik anitsivallaarunnaarsimavoq, tamannalu Svartsengip aamma Blå Lagunep tungaanut lavakillineranik kinguneqartussaassaaq, icelandreview.com allappoq, illoqarfillu ajornartorsiortoq Grindavik silaannaap mingutsitsineranik eqqugaasoq tassani aamma ilisimatitsissutigineqarpoq, kingullermillu innermik anitsisoqarmat tassani innuttaasut qimagussortinneqarsimapput.
Oqartussaasut innuttaasut anitsiviusumut qanillattoqqunagit suli kajumissaarpaat.
