Island: Timmisartortitseqatigiiffiit annertuumik annaasaqartut
Islandimi timmisartortitseqatigiiffik Play ukiup sisamararterutaata aappaani 8,1 millionit dollarinik annaasaqarsimavoq, tassa koruuninngorlugit 56 millionit koruuninik amigartooruteqarluni.
Timmisartortitseqatigiiffimmi akikitsumi WOW-imi sulisuusimasut Playimik ingerlatitsiniarlutik ilungersorput.
PR
Timmisartortitseqatigiiffiup akikitsumik timmisartuussisartup Play-ip isertitaqarniarluni ilungersunartorsiorluni ukioq mannalu siusinnerusukkut naatsorsuutigineqartumik angusaqarsinnaanani aktianik tuniniaasartut nalunaarfigimmagit, aktiaasa nalingat sisamanngormat 17 procentimik appariarpoq.
PLAY kisimi ajornartorsiuteqanngilaq, aammali Icelandair ajornartorsiuteqarpoq.
Islandimi tusagassiorfik ruv.is naapertorlugu 2024-mi ukiup affaani siullermi Icelandair 490 millionit koruuningajannik Playilu 150 millionit koruuningajannik annaasaqarsimapput.
Takornariat Islandimukartut ikinnerusut
- Qaammatini kingullerni pissutsit imminermini ilimagisatsinnit ajornerunngikkaluarput, pissutsilli unammillernarput. Atlantikup avannaani niuerfimmi timmisartukkut angalanissamut neqeroorutit amerleriarujussuarsimapput. Siornatigornit takornariat ikinnerusut Islandimut tikeraartarput, taamaattumik niuerneq ajornakusoorpoq, ingerlatseqatigiiffiup pisortaanera Einar Örn Ólafsson Ruv.is-imut oqarpoq.
Kattunnissaq eqqarsaatigineqanngitsoq, ingerlatsinerli naleqqussarlugu aallartissimasoq,Play-ip pisortaata oqaatigaa. Pissutsillu taamaatsillugit nammineq aningaasaatinik qaffatsitsiniaasoqassanngitsoq taassuma erseqqissaatigaa.
