INNERMIK ANITSINEQ KINGULLEQ
Islandimi innermik anitsisartoq ukiuni 800-ni sunngereerluni anitsisoq
Innermik anitsisartoq decembarip kingorna sisamassaanik arfininngormat anitsisoq aatsaat taama sakkortutigaaq. Innermik anitsisartoq suli amerlanernik anitsissasoq ilisimasalik naliliivoq.
Islandip kujataata kitaani
qeqertami Reykjanesimi arfininngormat unnukkut innermik anitsineq
decembarimiilli sisamassaajusoq aatsaat taama sakkortutigaaq.
Tamatuma takutippaa
qeqertap innermik anitsisartui ukiuni 800-ngajanni innermik
anitsisarsimanngitsut maanna innermik anitsilersimasut.
Islandip universitetiani
Nordisk Vulkanologisk Centerimi pisortaq Rikke Pedersen oqarpoq.
- Islandimi nunap qaava
nikeriartorpoq, nunallu qaava nikeriarsinnaajunnaarluni itinerusumit
qallorneqartariaqaraangat innermik anitsisartoqalertarpoq, oqarpoq.
Inuit
700-t qimagutitinneqartut
Illoqarfiup
umiarsualivillip Grindaviup avannaata kangiani 2 kilometerisut
ungasitsigisumi innermik anitsisoqarmat inuit 700-t
takornariartarfiup Den Blå Lagunip nalaaniittut arfininngormat
unnukkut qimagussuunneqarput.
Marsimi 2021-miilli
qeqertani arfineq-marloriarluni innermik anitsisoqarpoq, sumiiffimmi
1241-mili innermik anitsisoqarsimaneranik
nalunaarsuisoqarsimanngikkaluartoq.
Rikke Pedersen
naapertorlugu qaqqap innermik anitsilernera ukiuni hundredilinni
sivisussuseqarsinnaavoq.
- Innermik
anitsisoqartillugu qeqertap innermik anitsisarfiini tallimaasuni
paarlakaattoqalersartoq takusarparput.
- Ukiuni hundredilinni
arlalinni sivisussuseqarsinnaavoq, oqarpoq.
Sapaammi
qaqqap innermik anitsisartup anitaa annikilliartortoq
nalunaarutigineqarpoq
Innuttaasut
illersorneqarnissaat pillugu oqartussaasut maanna kiassarnermut
aqqutit, imermut aqqutit fiberoptikkimullu kabelit qaarsumit
aserortinnginnissaat qulakkeerniarpaat.
Rikke Pedersen
naapertorlugu oqartussaasut suliassaminnut piareersarluarsimaqaat.
- Blue Lagunimit
qimagutsitsineq ingerlalluarpoq, inunnillu
navianartorsiortitsisoqarani.
- Oqarsinnaavunga
eqqissisimasinnaalluta, soorunamili pinngortitap nukiga sakkortuvoq,
tamannalu ataqqisariaqarparput. Aserorterinissaata
pinaveersaartinnera iluatsittuaannanngilaq, Rikke Pedersen oqarpoq.
Qaqqap innermik
anitsisartup anitsinera qanoq sivisutigissanersoq suli
ilisimaneqanngilaq, sapaatilli ullaavani anitsineq
sakkukilliartuinnartoq nalunaarutigineqarpoq.
/ritzau/