Islandimi rektori Ilisimatusarfimmi siulittaasunngorpoq
Ilisimatusarfimmi siulersuisunut ilaasortat nutaat ukiuni sisamani tulliuttuni atuuttussat inissipput. Siulersuisuni siulittaasunngortoq tassaavoq Akureyrip ilisimatusarfiani rektori, Eyjólfur Guðmundsson.
Ilisimatusarfik nutaamik siulersuisoqalerpoq.
Assiliisoq: Leiff Josefsen
Ilisimatusarfimmi siulersuisut nutaat inissipput.
Siulersuisunut ilaasortat nutaat juunip aallaqqaataanit atuutilersumik toqqarneqarsimasut Ilisimatusarfiup qaammatip ingerlanerani nalunaarutigaa. Siulersuisunngortulli aatsaat sapaatip-akunnerani matumani isumasioqatigiinnermi inissipput.
Siulersuisuni siulittaasunngorpoq Eyjólfur Guðmundsson, Islandimi Akureyrimi ilisimatusarfimmi rektoriusoq. Ilisimatusarfik 2023-mi 2700-t sinnilaarlugit ilinniartoqarpoq, Eyjólfur Guðmundssonilu 2014-imiilli rektoriuvoq.
Suzanne Møller, 2020-miit 2024-mut siulersuisuni siulittaasuusoq, taarserpaa.
Suliffimmi avatangiisit unamillernartut
Siulersuisunut ilaasortani avataaneersuni Karsten Høy kisiartaalluni ilaasortani ingerlaqqippoq.
Ilisimatusarfimmi sulisunut atugassarititat ajornartorsiutaasut upernaaq manna saqqummiunneqarpoq. Ajornartorsiuteqarnerup kingunerisaanik ilisimatusartut aqutsisullu ilisimatusarfik qimappaat.
- Siulersuisut nutaat maanna siulersuisut APV-mut malitseqartitsinermik aallartitaanik nangitsinissaat kiisalu suliffimmi avatangiisinik pitsanngorsaanissaat naatsorsuutigineqartoq, naalakkersuisoq Aqqaluaq B. Egede (IA) siusinnerusukkut oqarpoq. Ilisimatusarfimmi aqutsisut ajornartorsiutit iliuuseqarfigineqassasut aamma neriorsuutiginikuuaat.
Siulittaasut saniatigut siulersuisunut ilaasortat avataaneersut tassaapput:
- Kathrine Tveiterås, UiT Norges Arktiske Universitetimi prorektori (siulersuisuni siulersuisup tullia)
- Karsten Høy, Greenland Rubymi pisortaaneq
- Ulunnguaq Markussen, Perorsaanermik Ilinniarfimmi pisortaq
- Aqqalu Sørensen, Pinngortitaleriffimmi ilisimatusartoq
- Kista Høegh-Niclasen, Nuna Advokaterini advokati
Ilaasortat Ilisimatusarfimmeersut tassaapput:
- Lars Jørgen Kleist, ilinniartunit qinigaq
- Jørgen Rosbach, ilinniartunit qinigaq
- Javier Arnaut, ilisimatuunit ilinniartitsisunillu ph.d.-nngorniatullu atorfilinnit qinigaq
- Kevin Perry, ilisimatuunit ilinniartitsisunillu ph.d.-nngorniatullu atorfilinnit qinigaq
- Maren Mikkelsen-Lennert, teknikkilerisunit allaffimmiunillu qinigaq
