Issittumi Sakkutooqarfimmi pisortaq: Kalaallit Nunaata illersornissaanut pilersaaruteqarpoq
Kalaallit Nunaata illersornissaa taama ajornakusoortiginngitsoq Issittumi Sakkutooqarfimmi pisortaq Reutersimit apersorneqarluni oqarpoq.
Issittup Atlantikullu Avannaani illersuinissamik isumaqatigiissutip immikkoortuani siullermi Issittumi Sakkutooqarfik, ilaatigut inuttaqarnerulernikkut, pitsanngorsarneqassaaq.
Assi: Jesper Hansen
Issittumi Sakkutooqarfimmi pisortaq Søren Andersen nutaarsiassaqartitsivimmit Reutersimit apersorneqarnermini taama oqariartuuteqarpoq.
- Kalaallit Nunaat taama illersoruminaatsiginngilaq. Illersuinissami suliaqarfiit amerlanngillat, tamannalu soorunami pilersaarusiugaalluni. Nato aamma taama pilersaaruteqarpoq, Søren Andersen Reutersimut oqarpoq.
Illersornissaqarfiup Kalaallit Nunaanni Savalimmiunilu suliassai Nuummi Issittumi Sakkutooqarfimmit isumagineqarput.
Issittumi Atlantikullu Avannaani isumaqatigiissummut siullermut atatillugu sakkutooqarfik annertusarneqassaaq, ilaatigut inuttat amerlinerisigut.
Trumpip Kalaallit Nunaat sammineqarlersikkaa
Kalaallit Nunaat 2025-p ingerlanerani nunanit tamalaanit sammineqartorujussuuvoq, Christiansborgimilu pingaarutilinnik oqaluuserineqartarluni.
USA-p præsidentiata Donald Trumpip arlaleriarluni Kalaallit Nunaata tiguarusunneranik kissaateqarnini oqaatigisarmagu taamaattoqarpoq.
Søren Andersenilli isumakuluutiginngikkaa Reuters allappoq.
- Sakkutooqarnikkut suleqatigiittuartarnerput suli ingerlapparput.
Ruslandi Kinalu eqqarsaatigalugit Kalaallit Nunaat ukiumi kingullermi navianartorsiornerulersimanngitsoq ilanngullugu oqaatigaa.
Russit kinamiulluunniit umiarsuaat takuneqarneq ajortut
Donald Trumpip Kinamiut Ruslandillu umiarsuaat Kalaallit Nunaata eqqaani angalasarnerarlugit, Danmarkimiillu unitsinneqarneq ajornerarlugit isornartorsiutigaa.
Søren Andersenip tamanna ilumuunnginnerarpaa.
- Russit Kinamiulluunniit naalagaaffiisa umiarsuaat maani takuneq ajorpavut, oqarpoq.
Nunalli immikkoortua taanna "akerleriissutaajunnaassappat" iliuuseqarnerusoqartariaqartoq oqarpoq.
- Ruslandip Kalaallit Nunaannut tunngatillugu pissusilersornera allanngorpat iliuuseqarsinnaasariaqarpunga, Søren Andersen oqarpoq.
Søren Andersen generalmajoriuvoq 2023-milu Issittumi Sakkutooqarfimmi pisortaalerluni.
/ritzau/
