Issittumi Siunnersuisoqatigiinni suliniuteqaqqilerneq ICC-p nuannaarutigaa

Issittumi Siunnersuisoqatigiit sulinerata ilaat aallarteqqinneqarmat ICC-p nuannaarutigaa.

ICC-p Siulersuisuunerisa ukioq manna ataatsimiinneranni siullermi Inuit siuttui Nuummi katersuupput, ornigullutillu peqataasinnaanngitsut qarasaasiakkut ataatsimeeqataapput, ICC-p siulittaasua Sara Olsvig ilisimatitsivoq.

Naalagaaffiit akornanni suleqatigiinnermi pissutsit atuunnerini Issittumi Siunnersuisoqatigiit ataannarsinnaanerat ICC-p ilungersuutigisimavaa.

Issittumi naalagaaffiit arfineq-pingasut issittumilu nunap inoqqaavisa kattuffii arfinillit Issittumi Siunnersuisoqatigiinni ataavartumik ilaasortaapput. Ukrainemik Ruslandip tiguaaneratali kingorna siunnersuisoqatigiit sulinerata ilaat uninngatinneqarpoq, tamannalu pissutigalugu issittumi Ruslandimik suleqateqarnermik naalagaaffiit allat unitsitsigallarput.

Issittumi Siunnersuisoqatigiit suleqatigiissitaasa sulinerata ilaat ukioq manna februarimili ingerlateqqinneqalersimasoq, aammalu 2023-mi ukiakkulli nunap inoqqaavisa kattuffii arfinillit taakku Norgemi siulittaasoqarfimmik ataavartumik naapeqateqartarsimasut, ICC-p siulittaasua Sara Olsvig Sermitsiamut ilisimatitsivoq.

Maannakkut siunnersuisoqatigiinni nunap inoqqaavi kisimik naapittartut, maannali sulineq ingerlateqqinneqartoq, siunnersuisoqatigiinnilu suleqatigiissitat ataatsimiinneri qarasaasiakkut ingerlanneqartartut, oqaluttuarpoq.

Ingerlatitseqqilerneq tapersersoraat

Ingerlatitseqqilerneq ICC-mit nuannaarutaavoq:

- Issittumi Siunnersuisoqatigiinnik ICC pilersitseqataasimavoq. Aqutsinermik suleqatigiiffimmi pingaarutilimmi taassani sulinerup tamakkiisumik ingerlaleqqinnissaa tapersersorparput, Issittumilu Siunnersuisoqatigiinni ataatsimiititaliani aqutsinermilu nunap inoqqaavisa annerusumik akuutinneqarnissaat  kaammattuutigaarput, tusagassiuutinut nalunaarummi Sara Olsvig oqarpoq.

Atorfilittalli qullersaasut diplomatit ataatsimiinnerat suli uninngatinneqarallassaaq.

ICC-p siulersuisuunerisa ulluni pingasuni Nuummi ataatsimiinnerisa kingorna Sara Olsvig taama oqarpoq.

Imartat aqunneqarnerat EU-llu inerteqquteqarnera

Nunat tamalaat akornanni imarsiornermik aqutsinermi, inuussutissanik nammineq pilersuisinnaatitaanermi kiisalu puisinit tunisassianik eqqussuinermut EU-p inerteqquteqarneranut tunngatillugu Inuit immikkut pisinnaatitaaffiisa maannakkut misissorneqarnerat pillugit isumaqatigiinniarnerni, Inuit sunniuteqarnerulernissaat ataatsimiinnermi aamma sammineqarput.

- Inuit nipaasa nunallu tamalaat akornanni isumaqatiginninniarnerni sunniuteqarsinnaanerallu pillugit sulinitta ingerlatiinnarnissaat Inuit sinnerlugit nunat tamalaat akornanni sulinermut nunap inoqqaavisa suliniaqatigiiffiattut aalajangiusimalluinnarparput.

- Imartat aqunneqarnerat maleruagassallu allat najukkatsinnit ungasissorsuarmi aalajangersaaffigineqartartut toqqaannartumik Inuit inuunerannut, inuussutigisaannut inuiaqatigiinnullu sunniuteqartarput. Inuit nunallu inoqqaavisa allat pisinnaatitaaffiinut tunngassuteqartumik allannguinerit akuutitsinerillu ICC-p nunat tamalaat akornanni sulineratigut pisarput, Sara Olsvig oqarpoq.

Powered by Labrador CMS