ARKTISK RÅD
Issittumi siunnersuisoqatigiit sulinissamut pilersaarutaat Vivian-ip saqqummiutissavaa
Kunngeqarfik Danmark Issittumi Siunnersuisooqatigiinnut maajimi siulittaasunngussaaq. Tamanna sioqqullugu nunanut allanut tunngasunut Naalakkersuisoq, Vivian Motzfeldt (S) ukiuni tulliuttuni marlunni sulinissamut pilersaarut saqqummiutissavaa. Saqqummiussineq pissaaq ullumi nal. 14:00, taannalu issittumi siunnersuisoqatigiit nittartagaat aqqutigalugu malinnaavigineqarsinnaassaaq.
USA, Finland, Island, Rusland, Norge, Danmarkip Naalagaaffia aamma Sverige 1996-imiilli ukiut marlukkkarlugit siuttuuffik paarisarpaat. Maajimi Danmarkip Naalagaaffia Norgemit siuttuuffimmik tigusissaaq.
Assiliisoq: Arctic Council Secretariat / Linnea Nordström
Ukiuni 30-nngulersuni naalagaaffiit issittumiittut, USA, Finland, Island, Rusland, Norge, Danmarkip Naalagaaffia aamma Sverige, apeqqutini suliassanilu issittumut tunngasuni ataatsimoorfeqarput Issittumi Siunnersuisooqatigiit aqqutigalugit.
Issittumi Siunnersuisoqatigiit anguniagaraat nunarsuup issittortaani eqqissisimasumik, patajaatsumik suleqatigiilluarnermik tunngsavilimmik, piujuartitsinermik isumannaatsumillu najugaqarfiussasoq, tamannalu pissasoq nunap inoqqaavisa pisinnaatitaaffii atugarissaarnissaallu ataqqineqarlutik.
Ukiut marlukkaarlugit nunat paarlakaajaallutik siulittaasunngortarput, maannalu Kalaallit Nunaat Danmark kiisalu Savalimmiut siulittaasunngussapput, tamanna pissaaq maajimi Tromsømi, Norgemi.
Kalaallit Nunaat siuttuussaaq
Naluneqanngitsutut Kalaallit Nunaat piumasaqaateqarnikuuvoq issittoq pineqartillugu Nunarput peqataasassasoq aammalu siuttuusassasoq. Tamanna iluatsippoq, taamaalillunilu Kalaallit Nunaat Naalagaaffiup siulittaasuunerani siuttunngussaaq.
Tassunga atatillugu, nunanut allanut tunngasunut Naalakkersuisoq, Vivian Motzfeldt (S) Kunngeqarfiup Danmarkip pilersaarutaanik 2025-2027-mik saqqummiussissaaq.
Taanna pissaaq ullumi ualikkut tallimanngornermi nal. 14:00 Katuami, saqqummiussinerlu malinnaavigineqarsinnaavoq Issittumi Siunnersuisoqatigiit nittartagaatigut.
Issittoq pillugu aallartitaq nutaaq ilisaritinneqassaaq
Sermitsiap paasisai naapertorlugit Naalakkersuisut tassunga atatillugu Kunngeqarfiup Danmarkip issittoq pillugu aallartitaa nutaaq ilisaritissavaat, ilisarititsinerlu pissaaq sulinissamut pilersaarutip saqqummiunneqarnerata kingorna.
Ilisimaneqartutut aamma Kalaallit Nunaat, Danmarkimut piumasaqarnikuuvoq issittumi aallartitap toqqarneqarnerani sunniuteqarnissaq piumasaqaatigineqarluni, tamannalu Danmarkimit aamma malinneqarpoq.
