Issittumi Tunngaviusumik Ilinniarfik matunik ammaavoq – aamma inunnut artornartunik nassataqarsimasunut
Issittumi Tunngaviusumik Ilinniarfik ilinnialerfissatut siammasissumik periarfissiivoq. Ilaatigut pinerluuteqarsimasut ilinnialernissaminnut akuerisaasinnaapput. Pinerlussimanermut uppernarsaatillit qinnuteqaraangata pinerlussimanerup suunera piginnaasaalu nalilersorneqartarput, kiisalu qinnuteqartup timikkut tarnikkullu piginnaasai aamma isiginiarneqartarlutik.
Issittumi tunngaviusumik ilinniarfik / Illersornissaqarfik
Foto: Arktisk Basisuddannelse / Forsvaret
Tarnikkut peqqissuunermik unammillernartuuteqarneq Illersornissaqarfiup Kangerlussuarmi Issittumi tunngaviusumik ilinniarfianut nutaamut ilinnialernissamut akornutaassanngilaq. Imminut toqunnissamik eqqarsaateqarnikuugaluartut imaluunniit pinerlussimanini pillugu allagartallit ilinnialersinnaapput.
Qinnuteqartup maannakkut qanoq inneranik naliliilluarnissaq pingaaruteqarptq, Issittumi Sakkutooqarfimmi tusagassiornermut attaveqaqatigiinnermullu akisussaasoq Camilla Schouw Broholm oqarpoq.
-Issittumi Tunngaviusumik Ilinniarfik inuunermi ingerlalluarsimasut kisimik ilinniarfiginngilaat.
- Taamaattumik siornatigut pinerlussimagaluarluni ilinnialertussatut akuerineqarluni ilinnialertoqarsinnaavoq. Tamanna qinnuteqartup piginnaasaanik tamakkiisunik, pinerluttuliorsimanerata imaanik allanillu – ilaatigut eqqarsartaatsikkut timikkullu qanoq inneranik – immikkut ataasiakkaarluni nalilersuisoqartarpoq, Camilla Schouw oqarpoq.
Ilinniartut kalaallisuinnaq oqaasillit
Kalaallisuinnaq oqaasillit, qallunaatut oqalussinnaanngitsut aamma ilinnialersinnaapput. Ukioq manna kalaallisuinnaq oqaaseqartut arlallit ilinniartuutigineqartut attaveqaqatigiinnermi pisortap oqaatigaa. Ilinniarfik kalaallisut qallunaatullu ingerlasarpoq, oqaatsinillu akunnattoorfini ilinniartut imminut tapersersoqatigiittarput.
- Qallunaatut oqalussinnaanngitsunik arlalinnik ukioq manna ilinniartuuteqarpugut. Issittumi Tunngaviusumik Ilinniarfik kalaallisut qallunaatullu oqaluttunik ilinniartitsisoqarpoq, aamma ilinniartut oqaatsit tungaatigut imminnut ikioqatigiissallutik pikkoriffigaat. Taamaattumik aap, qallunaatut oqalussinnaanngikkaluarluniluunniit ilinnialernissamut akuerisaasoqarsinnaavoq.
Tarnikkut peqqissuseq ukkatarineqartoq
Ilinniarnerup nalaani tarnikkut peqqissuseq annertuumik ukkatarineqarpoq. Ilinniartoq arlaat ilinniarnermi nalaani tarnikkut unammillernartunik aqqusaagaqarpat ikiorneqarnissamik arlalinnik periarfissaqarpoq, ilaatigut inuttut siunnersorneqarneq, suleqatinit tapersersorneqarneq, ulloq unnuarlu oqarasuaatikkut attaveqarsinnaaneq tarnillu pissusaanik immikkut ilisimasalimmik oqaloqateqarsinnaaneq.
- Ilinniartut ilinniarnermi nalaani ajornartorsiulerunik oqaloqateqarnissaminnut arlalinnik periarfissaqarput.
Illersornissaqarfilli immikkut ittumik neqerooruteqanngilaq
Ilinniartut tunngaviusumik ilinniarnertik naammassigaangamikku ilinniartitsisuminnit naliliiffigineqartarput, tamannalu Illersornissaqarfimmi sulilernissaminnut tunngaviliisarpoq. Ilinniartut kalaallisuinnaq oqaluttut ilinniarnerup nalaani qallunaatut oqalussinnaanermik pitsanngorsartariaqartarput, atorfinitsinneqarsinnaajumallutik qallunaatut paasisariaqarmata.
- Atorfinitsitsisoqassaguni qallunaatut paasisinnaasarnissaq paasineqarsinnaanissarlu piumasaqaataavoq. Aamma qinnuteqartut allat assigalugit ilinniagaqarnissamut piukkunnarsaammik naammassinnittoqartariaqarpoq.
Illersornissaqarfik Issittumi tunngaviusumik ilinniarsimasunut immikkut atugassaqartitsinngillat, sakkutuulli tamarmik, tunngaviusumik ilinniarsimanermut tunngatillugu qanoq ilinniagaqarsimanerat apeqqutaatinnagu, immikkut atugassaqartinneqarput.
- Ilinniartut eqqarsartaatsikkut ajornartorsiuteqarsimasut imaluunniit pinerlussimasimasut Illersornissaqarfimmi suli atorfinissinnaapput.
- Illersornissaqarfimmi atorfinitsinneqarsinnaanermut qinnuteqartut ataasiakkaat piukkunnaataat aalajangiisuusarput. Pinerlussimaneq atorfinitsitsinissamut akornutaasinnaavoq, amerlasuunili qinnuteqartup piginnaasai ineriartorneralu tunngaviusumik ilinniarnermi aalajangiisuusarput, Camilla Schouw Broholm Issittumi Sakkutooqarfimmi tusagassiornermut attaveqaqatigiinnermullu akisussaasoq oqarpoq.
