Akueriinnangaaratsigit ulloq akissarsiffissaq qanillisorlu inuiaqatigiittut erngerluta piareersartarpugut, pisussanut ernumatsassimaarluta. Qanoq? Meeqqat eqqissiviilliulersarput ersillutik. Inersimasorpassuit aallaamalersarput, pingaartumik taakku inersimasut qilattut aammali allat sulisussaanngikkaluarlutik suliartoqqusaariataarnissamut ernumasut. Tupinnanngitsumik tallimanngorneq qaangiuppat aamma arfininngorneq sapaallu ilaatigullumi ataasinngorneq ilanngullugit sulisariaqassagamik. Minnerunngitsumik tamanna pisarpoq ukiut tamaasa aggustip naanerani, akileraartartut akissarsiamik nalinginnaasut qaavatigut utertooraangata.
Alianaq
Akueriinnangaaratsigit ulloq akissarsiffissaq qanillisorlu inuiaqatigiittut erngerluta piareersartarpugut, pisussanut ernumatsassimaarluta. Qanoq? Meeqqat eqqissiviilliulersarput ersillutik. Inersimasorpassuit aallaamalersarput, pingaartumik taakku inersimasut qilattut aammali allat sulisussaanngikkaluarlutik suliartoqqusaariataarnissamut ernumasut. Tupinnanngitsumik tallimanngorneq qaangiuppat aamma arfininngorneq sapaallu ilaatigullumi ataasinngorneq ilanngullugit sulisariaqassagamik. Minnerunngitsumik tamanna pisarpoq ukiut tamaasa aggustip naanerani, akileraartartut akissarsiamik nalinginnaasut qaavatigut utertooraangata.
ISUMAGA
Isuma allaaserinnittup inuttut nammineq isumaanik ersersitsisuuvoq.
Alianaq
Alianarluinnartuuvoq. Aamma akuersaarneqarsinnaanngilaq!
Tallimanngorneq aggustip 29-at nipiliorfioqaaq, minnerunngitsumik Nuummi. Kalerrisaarutit imaaginnavipput. Politiit, qatserisartut ambulancenilu ingerlatsisut aqqusinermi takussaaqaat, tuaviinnaq sukkaqalutillu. Bussit tippassimaarput ilaasullu ilaat oqallorissisimaalersimapput. Nipaakkunnaarlutik qissimigaarunnaarlutillu. Ittoqqoortoormiini angut tigusaavoq toqutsisimasutut pasisaalluni. Allami angut inuusuttunnguaq ujaarineqarpoq. Aamma angerlarsimaffippassuarni toqqissiviilliortitsisoqarpoq, persuttaasoqarpoq perulluliortoqarlunilu. Aasimmiaa.
Iliuutsigut inoqatitsinnut sunniuttarput. Tamanna politiit ilisimaaraat qaammatit tamakkiallugit akissarsiffiup nalaa immikkut piareersarfigiuaannaramikku. Taamatullu nakorsiartarfiit. Isumagittuni nakkutilliisuusup. Sanilip. Atilip. Qulip. Meeqqat. Meeqqat nalinginnaasumik angerlarsimaffimmiittut aammali paaqqinnittarfinni inissinneqarsimasut. Uffa sumiginnagaareerlutik misigititaaqqittaraat.
Motzfeldtip aamma erloqinartumik tamanna misigaa, tallimanngormat ulloq naallugu sulisussarsioraluarami sulisinnaasunik (atuaruk: imersimanngitsunik), utoqqaat illuanni suliffigisamini sulisinnaasunik. Qatsussingaaramilu Facebookikkut pisut oqaluttuarai paasivarpullu aatsaat kingusissukkut ikiortissaminik ataasituannguamik nassaarsimasoq, pulaartoq suliumalluni akuersimmat. Taava marluinnaallutik utoqqarpassuit ikiortariallit sullissimavaat.
Akuerisamik ueriinnarneq
Hello, tassa ueriinnarneq! Ileqqupalaaq inuttullu nakkaanneq inuiaqatigiinnit tapersersorneqartoq. Soormi akuersaaginnarneqassava qaammatit tamaasa ukiortoqarsiorlunilusooq silaarulluni aalakkuttarnersuaq? Naak killissaa kinaluunnimmiuna killiliiniartoq perorsarsimanngilluinnartumik iliortunut inoqatinillu ataqqinninngilluinnartunut?
Ilagut oqartaraat suliffissatigut allamiunit ingiagaaneq pisoq, kiffartuussivinni assigiinngitsuni. Kiami sulisitsisup imminut ataqqisup sulisorerusussagamigit inuit akissarsiffiup nalaani tammartartut napparsimanerartuartulluunniit? Naalakkisaarsinnaaneq ajornarsimaqigami.
Isumaqarpunga ueriinnarnerit allanngortinneqarsinnaasut. Inuiaqatigiittut uisitsisumik iliuuseqarutta, allatut iliorluta aaqqiittariallillu iliuuseqarfigalutigit. Iliuusissaanngitsut naalakkisaarsinnaannginnerlu akuersaaginnarutsigit siumut aallarnavianngilagut. Ilatsiinnarneq inuiaqatigiinnguanut akisoorsuuvoq. Immitsinnut artukkeqqavugut imerajussuseq susinnaanngitsutut ikkatsigu.
Ila akisugaluassusia. Naammalerujussuaqaaq!
