Isumaginninnermut ineqarnermullu ministeri: Assigiinngitsuni suleqatigiinnerunissaq pillugu oqaloqatigiippugut
Isumaginninnermut ineqarnermullu ministerip Sophie Hæstorp Andersenip Naalakkersuisut arlallit ataatsimeeqatigimmagit oqaluuserisassaqaqaaq. Kalaallit Nunaanni meeqqat inuusuttullu atugarliortut pitsaanerusumik iliuuseqarfigineqarnissaat qallunaat naalakkersuisuisa tapersersorusuppaat, ilaatigut ineqarnermut tunngasutigut unammilligassat eqqarsaatigalugit.
Isumaginninnermut ineqarnermullu ministeri Sophie Hæstorp Andersen (Soc.) isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen (A) ilagalugu Nuummi Frelsens Hærimut sisamanngornermi ualikkut pulaarpoq.
Assi: Trine Juncher Jørgensen
Danmarkimi isumaginninnermut ineqarnermullu ministeri Sophie Hæstorp Andersen (Soc.) Nuummut marlunngormat tikinnerminiit tallimanngornerup ullaavata tungaanut Naalakkersuisunik arlalinnik ataatsimeeqateqarpoq.
Peqqissutsimut isumaginninnermullu tunngasut
Peqqissutsimut naalakkersuisoq Anna Wangenheim (D) marlunngormat ataatsimeeqatigaa, Nuummilu angerlarsimaffiit marluk pulaarlugit. Tamatuma kingorna meeqqat pillugit oqaaseqartartoq Stina Sværd ataatsimeeqatigeriarlugu suliniut Mind Your Own Business-imik taaguutilik pulaarpaat. Taanna nukappiaqqanut 13-iniit 19-inut ukiulinnut aallarnisaanermik suliaqarfiuvoq.
Aamma meeqqanut, inuusuttunut ilaqutariinnullu naalakkersuisoq Maasi Pedersen (IA) ataatsimeeqatigaa, marluullutillu Inulerivimmi - Nuna Tamakkerlugu Tarnikkut Piginnaanngorsaavik Siunnersuisarfillu - meeqqanut, inuusuttunut inersimasunullu tarnikkut ajornartorsiortunut ikiuinissamik neqerooruteqartarfiusumi saqqummiussisoq tusarnaarpaat.
Inissiat qungujulasut
Sapaatip akunnerani ingerlanerani inissianut tunngasut aamma sammineqarput. Ineqarnermut attaveqaasersuutinut naalakkersuisoq Aqqaluaq B. Egede (IA) illoqarfimmi pisuttuaqatigaa, tassani suliniummi "Inissiaq Qungujulasut"-mik taagutilimmi inissiat nutarterneqartut takusarpaat.
Ineqarnermut susassaqarfik angerlaanneqarnikoq pillugu Danmarkip Kalaallit Nunaatalu oqaloqatigiinnerat nutaajuvoq, ministerili naapertorlugu isumaginninnikkut ajornartorsiutit inissaaleqinerlu imminnut atassuteqarluinnartarnerat tamatumunnga pissuteqarpoq.
– Meeqqat inuusuttullu atugarliortut pitsaanerusumik ikiorserniarlugit sapinngisatsinnik iliuuseqassasugut qallunaat naalakkersuisuisa tunngaviusumik isumaqatigiissutaanni allassimavoq. Oqaaseq taanna siammasippoq suliassaqarfinnullu angerlaanneqarnikunut arlalinnut tunngassuteqarluni, isumaginninnermulli tunngasuni apersersuinitsinni assinguvoq. Taamatuttaaq ineqarnermut tunngasutigut unammilligassat pillugit misilittakkanik paarlaasseqatigiinnissaq soqutiginartippara, meeqqammi inuusuttullu periarfissaat angajoqqaavisa ineqarnissamut periarfissaannut attuumassuteqakkajuttarput, Sophie Hæstorp Andersen oqarpoq. Danmarkimi naalakkersuisut Kalaallit Nunaanni inissaaleqinerup iliuuseqarfiginissaanut qanoq tapersersuisinnaanersut oqaloqatigiissutigineqartoq aamma uppernarsarpaa.
Kisitsisit ilanngunneqarsimanngitsut saqqummiunneqassapput
Sophie Hæstorp Andersenip isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen (A) peqatigalugu Frelsens Hærimut ullormi kingullermi sisamanngornermi pulaarpoq.
Bentiaraq Ottosen ministerimik oqaloqateqarnermini inuuniarnermik ajornartorsiortut Kalaallit Nunaanniit Danmarkimut qanoq amerlatigisut nuuttarnerat, sumut nuuttarnerat aamma sooq Danmarkimut nuuttarnerat ilaatigut eqqartorneqartut sermitsiamut oqarpoq.
- Kisitsisit ilanngunneqarsimanngitsut soqutiginissaannut tamatta pissutissaqarluarpugut. Ilaqutariinni alianartumik pisoqaraangat ilaatigut Danmarkimut nuuttoqartarpoq, kisitsisillu taakkua sumik tunngaveqarnersut paasiniarnissaat pikkoriffiginerusariaqarparput, Sophie Hæstorp Andersen oqarpoq.
