- Isumakuluttoqarsinnaanngilaq

USA-p 47-ssaattut præsidentia Donald Trump qanorsuaq oqarusiutigineqartaraluaqaluni inunnik qaninnerulersitsisarpoq. 

Nunatsinni, Danmarkimi. Tassa nunani Kunngi Frederiup siuttuuffigisaani. 

– Tamaaniitilluni isumakuloqqajaajuaruminaappoq, kunngi qanittukkut tassa apriilip 29-aniit 30-anut Nuummiinnermini oqarpoq. 

Nunatsinnut tikeraarnini Danmark sinnerlugu aalajangersimasumik anguniagaqarfiginngikkini, kunngip ilanngullugu erseqqissaatigaa. Kisianni tassa nunatta tiguarneqarataannaanerata najummassimaarutaaleruttornerani nunatsinnut tikeraarpoq. Amerikamiummi præsidentiata nuna sanilertik ikinngutinnersuusoq sakkutuuliinikkut tiguarniarini ataasiaannarnani sioorasaarutigaa, Amerikamilu isertortumik paasiniaasartut nunatta Danmarkillu akornanni avissaartuutsitsiniarnerminnut aamma suleqatissarsiorlutik. 

Kunngi Frederik pisassaqaalulluni, ilaatigut illoqarfimmi pisuttuartussaalluni UTV-millu asimi angallanneqartussaalluni, ullualunni nunatsinniinnermini ilassilluarneqaqalunilu tikilluaqquneqalaavippoq, massa amerikamiut sakkutuuisa timmisartorsuat biilinik aqerlumit pitarneqarsinnaanngitsunik usisoq kunngip nunatsinnut tikeraarnissaanut sapaatit akunnialuit sioqqullugit tikimmat akerlerlianik pisoqartoq. Tassa kunngi Frederiup nunatsinnut tikeraarnera inuinnartut kunngikkormiuneersutullu naalagaaffeqatigiinnik ataqatigiissitsilluinnartuuneranik uppernarsaavoq. 

1968-imi inunngortoq 

Kunngi Frederik maajip 26-ani 57-iliissaaq, tamannalu pisortatigoortumik malunnartinniarlugu ulloq taanna nunatsinni erfalasulertoqassaaq. 

Kunngi Frederik ilaquttanilu kunngi Frederiup arfineq-pingajuata illussaarsuata Amalienborgip aneersuartarfianut inuuimmini Danmarkip nalunaaqutaa naapertorlugu ullup qeqqanut sassassapput. Kikkulluunniillu kunngikkormiut nittartagaatigut, tassa www.kongehuset.dk-kkut allallutik kunngip inuuiani pilluaqqussuteqarsinnaajumaarput. 

Kalaallit allakkeriviat kunngikkormiut assingannik frimærkelianik tulleriiaanik 1963-imi saqqummersitsisalerpoq. Dronning Margrethe siorna tunuarpoq, kalaallillu allakkeriviat kunngi Frederiup assinganik frimærkeliamik nutaamik ataasinngorpat inuuissiornera iluatsillugu saqqummersitsissaaq. Kigartuisartoq Martin Mörck frimærkemut saqqummersinneqartussamut Steen Brogaardip assilisaa najoqqutaralugu assiliartaliisuuvoq. 

Kunngip assilineranik frimærke nutaaq allanik assiliartalikkanik qalipaasersukkanillu tulleqartarumaarpoq. Frimærke nutaaq ataaseq 20,00 koruuneqassaaq, tassa nalinga allakkanut 100 grammit inorlugit oqimaassusilinnut nunatsinni umiarsuakkut nassiussanut naapertuuppoq.