Isumannaallisaanikkut piginnaasanik annertusaasoqassaaq

Illersornissamut isumaqatigiissutip ilaanik isumaqatiginninniarnermi unammillernartoq annerpaaq, Issittumut Atlantikullu Avannaanut tunngasoq, tassaavoq Naalagaaffeqalernissamut Nunanullu Allanut Naalakkersuisoq Vivian Motzfeldt (S) naapertorlugu nunarsuup ukiut marluk matuma siornatigutut innginnera.

- Nuna sorsussimanngisaannartoq, akaareqatigiinnermi piusoq, kisianni ullumikkut killiffimmi nunat issittumi sineriallit isumaqatigiissutaanni tunngaveqartumik issittup qaqugukkulluunniit akersuuffiunngisaannarnissaanik isumaqatigiissummik tunngaveqarluni ingerlatsiviuvoq.

- Oqaatigerusuppara naqissuserlugu, suli taanna tunngavittut pingaarnerpaatut tunngavigaarput, qaquguluunniit akersuunnerit issittumut appakaatinnginnissaat taassuma malitsigisaanik, taanna piuinnassappat attanneqassappat, taava piumasaqarpoq piginnaasatigut ineriartitsissasugut, tamatuma qularnaarsimaneqarnera attanneqarsinnaammat, tassa oqimaaqatigiitigiissaarinermi tassani inissisimavugut, Vivian Motzfeldt oqarpoq.

Issittoq Atlantikullu avannaa pillugit isumaqatigiissummut 14,6 milliarder koruunit immikkoortinneqarput, taakkulu ilaatigut umiarsuarnut Thetis-inut pingasunut, dronenut ungasissumut ingerlasinnaasunut, satellitsikkut attaveqarnermut, Danmarkimi Kalaallit Nunaannilu suliaqarfinni misissuinermut, isumannaallisaanermut ilisimatusarnermullu suleqateqarnermut aningaasaliissutigineqassapput.

Isumannaallisaaneq pitsanngorsarneqassasoq

"Isumannaallisaanermi politikikkut unammilligassat ilungersunartut ornippavut. Illersornissaqarfiup kilitsisiaqarfiata Issittup Atlantikullu Avannaata aarlerinartorsiornera ajornerulersoq nalilerpaa. Taamaammat Illersornissaqarfiup sumiiffinni najuunnera annertuumik nukittorsassavarput. "

"Kalaallit Nunaanni sumiiffinni ilisimasat ilaatigut Illersornissaqarfiup suliassanik isumaginninnerani, aammali Illersornissaqarfiup inuiaqatigiit isumannaatsuuneranik nukittorsaaneranut ilapittuutitut iluaqutinngortillugit, nukittorsaataassapput.” Illersornissamut minitseri Troels Lund Poulsen Vivian Motzfeldt peqatigalugu tusagassiutitigut nalunaarummini oqarpoq.

Issittup nakkutiginissaanut qaammataasanut aningaasaliisoqassaaq, ilaatigut radarimik ikkussuisoqarlunilu dronet anginerusut mikinerusullu, umiarsuarmi nunamiluunniit assigiinngitsuni inissinneqartussat, pisiarineqassapput.

- Massakkut piginnaasat ineriartortitat nunatta imminut illersorsinnaanerata qaffassarneqarnissaa pingaarnerpaatullu avatangiisitsinni susoqarnerani sumiiffiit ilaat ullumikkut annertunerusumik paasissutissanik aallerfigisinnaanngisagut taakku matussuserneqassapput, tassa imminut qajannaarsarsimanerusumik nunap inissinnissaanut qularnaarinninnerit tassaniipput, Vivian Motzfeldt oqarpoq.

USA-p isumannaatsuunerata nunarput isumannaatsuutikkaa

Kissaatigineqartut arlallit Naalakkeruisut isumaqatigiinniarnermi saqqummiussimasaat, ilaatigut Kangerlussuup droninut atorneqarnissaanut aammalu issittumi tunngaviusumik ilinniarnermi dronit atorlugit sulinissamut ilinniartitsinerup ilanngunneqarnissaanut tunngasut, pillugit 2025-p affaani siullermi aamma misissueqqissaartoqassaaq. 

Illuatungeriit isumaqatigiissummut immikkoortoq 2-mut, aamma Issittumi Atlantikullu Avannaani fregatit, sikusiutit aamma inuttaqanngitsut atorlugit illersornissap isumannaallisaanerullu nukittorsarnissaannut aasaanerani isumaqatigiissuteqarnissartik naatsorsuutigaat.

- Soorlu TV2 oqallitsitsinerani Naalakkersuisut siulittaasualu oqaatigisarput, Amerikap illersorneqarnera aamma nunatta illersorneranut tunngassuteqarpoq taannaanaani aamma imartarujussuaqarnitta malitsigisaanik, kujammut imartaq Kalaallit Nunaanninngaannniit Islandimut Tuluit Nunaanullu atasoq, taassuma annertunerusumik illersorneqarnissaa pilersaarutip tulliani aasamut naammassineqartussaami ilaassaaq, Vivian Motzfeldt oqarpoq.