Isumapiloqarluni tatiginnilersitsiniaanermut inerteqquteqarnermut inatsit nutaaq politiiusimasumut atorneqartoq
Politiiusimasoq peqatigiiffimmilu suleqataasarsimasoq pinngitsaaliisimasutut unnerluutigineqartumut suliaq Eqqartuussisoqarfik Sermersersuumi marlunngornermi ullaakkut nanginneqarpoq. Isumapiloqarluni tatiginnilersitsiniaanermut inerteqquteqarnermut inatsit siorna atuutilersoq naapertorlugu aamma unnerluutigineqarpoq.
Eqqartuussisoqarfik Sermersuumi suliaq ulluni arlalinni suliarineqassaaq, sapaatip-akunneratalu tulliani naammassinissaa naatsorsuutigineqarpoq.
Foto: Morten Okkels
Politiiusumasumit suliami annertuumi, maanna Eqqartuussisoqarfik Sermersuumi suliarineqartumi, ullut aappassaat ingerlavoq. Suliaq ataasinngornermi aallartimmat niviarsiaqqanut marlunnut ukiukitsunut, angutip peqatigiiffimmi sulinermini naapitaanut, pinngitsaaliisimasutut kannguttaatsuliorsimasutullu unnerluutigineqarnera sammineqarpoq.
Unnerluutigineqartoq pisuni amerlanerni pinngitsuunerarpoq, niviarsiaqqalli aappaa 14-inik ukioqartoq atoqatigisimaluug nassuerutigaa, tassa atoqateqarsinnaanermut ukiui inuuttut.
Unnerluussisup niviarsiaqqamik allamik, aamma pisumi 14-inik ukiulimmik, isumapiloqarluni tatiginnilersitsiniaasimasutut unnerluussut nangeqqippaa. Taanna angutip unnerluunneqarnera ilaminiinnaraa, unnerluussisussaatitaasullu angut ukiuni arfineq-marlunni pineqaatissinneqarsimasunut inissiisarfimmiittussassanngortinneqarnissaa piumasaraa.
Taamaakkaluartoq una sammissavarput, tassa isumapiloqarluni tatiginnilersitsiniaaneq inatsimmi nutaajuvoq. Tassa isumapiloqarneq tunngavigalugu tatiginnilersitsiniaanerup (grooming) inerteqqutaanera siorna apriilip aallaqqaataani atuutilerpoq.
Taamaattumik suliaq una inatsisip allanngortinneqarnerata kingorna qanoq kinguneqarsinnaaneranik takussutissat siulliit ilagaat, tamatumalu kinguneri siunissami pisunut isumapiloqarluni tatiginnilersitsiniaanerit imaluunniit taamaaliorsimasutut unnerluutigineqartunut sunniuteqarsinnaapput.
Isumapiloqarluni tatiginnilersitsiniaaneq tassaavoq meeqqamik inuusuttumilluunniit kinguaassiuutitigut kunnguttaatsuliornissaq imaluunniit atornerluinissaq siunertaralugu tatiginninnermik ineriartortitsineq.
Allaqatigiinnerit saqqummiunneqartut
Politiiusimasup peqatigiiffimmi suliaqarnini aqqutigalugu niviarsiaraq qanoq attaveqarfigilersimanerlugu eqqartuussivimmi oqaluttuaraa. Illoqarfeqatigiinngillat Snapchatili aqqutigalugu attaveqatigiittarlutik, immaqa aamma Facebookikkut.
Unnerluussisup taakkua marluk allaqatigiissimanerisa takussutissartaat saqqummiuppai. Tutitaqarani kiserliornassaaq, politiiusimasoq ilaatigut allappoq.
Aamma niviarsiaq ilaquttaminit taaguutaa politiiusimasup atorlugu taagorpaa, illoqarfimmullu nammineq najugaqarfigisaminut nooqqullugu peqatigiiffik soqutigisartik ingerlannissaanik kajumissaarlugu.
Unnerluutigineqartup niviarsiaq taanna kinguaassiuutitigut arlaannik iliuuseqarnissani siunertarinagu attaveqarfigisarlugu eqqartuussivimmi oqaatigaa. Niviarsiaqqap soqutigisaminni ineriartornissamik periarfissaqartoq, nuukkunilu ineriartorluarsinnaanera oqaatigaa.
Marlunngornerup sinnera ilisimannittut apersorneqarnissaannut atorneqassaaq. Siullertut niviarsiaqqat ilaata pisimasut pillugit oqaluttuarneranit immiussaq eqqartuussivimmi takutinneqassaaq. Niviarsiaraq illersorniarlugu immiussaq matoqqasumik takutinneqassaaq. Marlunngornermi ualikkut malinnaanerput nangeqqissavarput, eqqartuussineq tamanut ammaqqippat.
Suliamut atatillugu atinik saqqummiussisoqaqqusaanngimmat unnerluutigineqartup kinaanera tamanut saqqummiunneqanngilaq.
