Isumaqatigiissitsiniarnermi suliassap unitsikkallarneqarnissaata kissaatigineqarnera Naalakkersuisut akuerinngikkaat
Uranisiornissamik inerteqquteqarnissaq Kalaallit Nunaanni aalajangerneqarnikuuvoq, suliallu tamatumunnga tunngasut taamaallaat Kalaallit Nunaanni eqqartuussivinni suliarineqassasut naalakkersuisoq Naaja H. Nathanielsen oqarpoq.
Kujataani uranimik piiaanissaq politikikkut inatsisitigullu akerleriissutaaqaaq.
Assi: Trine Juncher Jørgensen
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup, Naaja H. Nathanielsenip, ulloq 6. maj 2025 Energy Transition Minerals-imi (GME A/S-ip ingerlatseqatigiiffik qullersaqarfia Australiameersoq) aqutsisut Københavnimi ataatsimeeqatigai.
GME A/S-ip aamma Energy Transition Mineralsip Kuannersuarni uranimik piiaanissamut pisinnaatitaaffeqalerniarlutik imaluunniit milliardilikkaanik taarsiiffigitinniarlutik Kalaallit Nunaat Danmarkilu suliassanngortinneqarnikuunerat ataatsimiinnermut pissutaapput.
Ataatsimiinnermi Naalakkersuisut uranimik piiaanissamik inerteqquteqarneq aalajangiusimagaat aammalu uranimut inatsisip allanngortinneqarnissaa pilersaarutaanngitsoq Naaja H. Nathanielsenip erseqqissarpaa.
- Naalakkersuisut tungaanniit tunngaviusumik tunngaviatigullu suliassaavoq, Naalakkersuisut aalajangiisinnaatitaanerannut aammalu inatsisitta atuuffissannut tunngassuteqartoq, Naaja H. Nathanielsen oqarpoq.
- Suliassat Københavnimi Byret-imi imaluunniit isumaqatigiissitsiniarnermut eqqartuussivimmi misilinneqarsinnaannginnerat aalajangiusimavarput aammalu apeqqut taanna paasinarsisinneqartariaqaraluartoq isumaqarluta.
Taamaattumik isumaqatigiissitsiniartarfimmut Københavnimilu eqqartuussivimmut suliassat piaarnerpaamik naammassineqartariaqartut Naalakkersuisut tusagassiuutinut nalunaarummi allapput:
- Suliassap Kalaallit Nunaanni Eqqartuussivimmi ingerlanerani isumaqatigiissitsiniarnermut suliassap unitsikkallarneqarnissaa pillugu illuatungiusup eqqartuussissuserisua ukioq manna siusinnerusukkut piumasaqarpoq. Tamanna Naalakkersuisut akerlilerpaat, tassami tamatumani suliassat sivitsorsaqqiinnarneqartussaammata aammalu suliap ingerlanera akitsorsaannarneqartussaalluni. Tamatuma kingorna isumaqatigiissitsiniarnermut eqqartuussiviup piumasaqarneq akuerinngilaa.
