Isumaqatigiissutip akerleriissutaasup taasissutiginera naligiimmik inerneqartoq
Peqqissaasut isumaqatigiissut nutaaq pillugu taasitinneqarnerat naligiimmik inerneqarpoq.
Assi: Oscar Scott Carl
Peqqissaasut aningaasarsiaat pillugit isumaqatigiissut nutaaq oqallisaangaatsiareersorlu taasissutigineqarnerani inernerit naligiipput.
Tassa ilaasortat isumaqatigiissummut akuersisut naaggaartullu amerlaqatigiipput.
Peqqinnissaq Pillugu Kattuffimmi siulittaasup Ken Jensenip Sermitsiamut tamanna uppernarsarpaa.
Peqqinnissaqarfimmi sulisut qaammatini 15-ini isumaqatigiissut atorunnaarnikoq malillugu sulipput, tamatumalu saniatigut Peqqinnissaqarfik sulisusoqarniarnikkut tatineqaqqalluni. Taamaammat aningaasarsiat pillugit isumaqatigiissut sivisuumik utaqqineqarpoq.
Isumaqatigiissulli nutaaq saqqummiunneqarluni ilaasortanut taasissutaasussanngormat, isumaqatigiissuummi immikkoortoq ataaseq apeqquserneqarpoq. Tassa peqqinnissaqarfimmi sulisut marlunnik oqaasillit suleqatiminnut oqaluttaasarnissaat oqallisigineqartorujussuanngorpoq, kingornalu peerneqarluni.
Peqqinnissaq Pillugu Kattuffiup peqqissaasut aningaasarsiaat kisiisa isumaqatiginninniuunnagit peqqinnissaqarfimmi sulisut allat aamma aningaasarsiaat isumaqatiginninniutigaat. Peqqissaasut tassani kisimik naligiillutik taasipput, ilaasortalli allat isumaqatigiissut akuersissutigalugu.
