Isummat pigiliutiinnakkat immikkoortitsinerlu pillugit kalaallit ilinniartut ministeriuneq oqaloqatigissavaat
Danmarkimi kalaallit ilinniartut pillugit isummat pigiliutiinnakkat, ammillu qalipaataa tunngavigalugu immikkoortitsineq pillugit nalunaarusiap malitsigisaanik, kalaallit ilinniartut Marienborgimi oqaloqatigiinnertalimmik ataatsimiissapput.
Annonse
Isummat pigiliutiinnakkat immikkoortinneqarnerlu kalaallit ilinniartut ilinniakkaminnik ingerlatseqqinnerminni ajornartorsiutigigaat, Inuit Pisinnaatitaaffii pillugit Ilisimatusarfiup siorna nalunaarusiaani erseqqissarneqarpoq.
Nalunaarusiap inerneri tunngavigalugit ilinniartut atugarissaarnerat Kalaallit Nunaannullu attuumassuteqarnerat pillugit oqaloqatigiinnissamut, Inuit Ataqatigiit aamma Siumut Folketingimiittut kalaallit Danmarkimi ilinniartut ataatsimoortissavaat:
- Kalaallit ilinniartut atugaat, ilinniakkamillu naammassinninnerup kingorna amerlanerusut angerlarsinnaatinniarlugit nunatsinnut atassuteqarnerat qanoq nukittunerulersinneqarsinnaanersoq ataatsimiinnermi ukkatarineqassapput, folketingimut ilaasortaq Aaja Chemnitz (IA) Sermitsiamut ilisimatitsivoq.
Marienborgimi inissiami ministeriunermut atugassiami, nalinginnaasumillu ataqqinaammik aaqqissuussanut atorneqartartumi, ataatsimiinneq pissaaq.
- Anguniagarput ungasissorujussuuvoq
Naalagaaffeqatigiinneq pillugu Folketingimi oqallinnermi ministeriunerup Mette Frederiksenip tamanna saqqummiuppaa.
Ilinniagaqarneq inuiaqatigiinni tunngaviliisuusut ilagigaat, kalaallinullu inuusuttunut ilinniagaqarniarlutik Danmarkimut nuunnissaq allannguerujussuarnerusoq, tassani ministeriuneq oqarpoq:
- Minnerunngitsumik kalaallit Folketingimi ilaasortat kajumissaarutaat tunngavigalugu, Danmarkimut isernissamut tikilluaqqusinermullu pitsaanerusumik aaqqissuussinissaq taamaattumik pingaartinnerujartuinnarparput, inuusuttut atugarissaarnissaat tapersersorniarlugu ilinniakkaminnillu taamaatitsiinnartartut ikilisarniarlugit, ministeriuneq oqarpoq, unammillernartoqartorlu nassuerutigalugu:
- Kalaallit maani najugallit kalaallillu ilinniartut isummanik pigiliutiinnakkanik, immikkoortitaanermik, ilinniakkaminnik taamaatitsinerpassuarnik allaallu ilaat ammip qalipaataa tunngavigalugu nikagineqarnermik aqqusaagaqartunik tusaraangama, taava paasisarpara anguniagarput ungasissorujussuusoq.
Inuusuttunut aammali Kalaallit Nunaannut iluaqutaassaaq
Oqaloqatigiinnertalimmik ataatsimiinnissaq, kalaallit inuusuttut isiginnittariaatsiminnik isumassarsiaminnillu Marienborgimut oqaluttuariartornissaannut qaaqqusissutaasoq, ministeriunerup nuannaarutigaa:
- Ikaarsaarnerup pitsaanerulersinnissaanut taamaaliornikkut alloriarnissarput neriuutigaara. Tamanna inuusuttunut aamma Kalaallit Nunaannut iluaqutaassaaq, amerlanerusummi ilinniakkaminnik naammassinnissinnaassapput, piginnaanitillu pisariaqartinneqangaartut angerlarlutik atorsinnaassavaat, Mette Frederiksen oqarpoq.
Naalagaaffiup Naalakkersuisoqarfia aamma Ilinniartitaanermut Ilisimatusarnermullu Naalakkersuisoqarfik suleqatigalugit, maajip arfineq-aappaani aaqqissuussineq tamanna ingerlanneqassaaq.
