Jens-Frederik akitsuineq pillugu: Aalajangerneq nuanniitsoq

KNI-p ikummatissat akitsornera marlunngornermi nalunaarutigimmagu isornartorsiuineq imaaginnavippoq. Ikkumatissat assigiinngitsut pingasuusut tassa benziina, dieseli petroliumilu tamarmik liiterimut akii 85 oorimik qaffaaviigineqarput.

KNAPK-p SIK-llu Naalakkersuisut qineqqusaarnerminni neriorsuutiminnik eqquutitsinnginnerarlugit isornartorsiorpaat, tassa Kalaallit Nunaanni inuuniarneq akikinnerulernissaanik, taamaalillunilu innuttaasut inuuniarnermikkut atugaat pitsaanerulernissaannik neriorsuuteqarnikuunerat eqqarsaatigalugu.

Naalakkersuisut siulittaasuata Jens-Frederik Nielsenip (D) isornartorsiuineq maanna akissuteqarfigaa, aalajangernerlu ajornaatsuinnaanngitsoq Sermitsiamut oqarpoq:

- Aalajangiineq soorunami nuannerpallaanngitsoq siullertut oqaatigerusuppara. Ikummatissanut akitsuineq nuanninngilaq, ilisimavarpulli akit nunarsuup sinnerani akigitinneqartut aallaavigalugit aalajangersarneqartartut, Jens-Frederik Nielsen oqarpoq, nangipporlu:

- Nunatsinni ukiorpassuarni akit aalajangersimasumik inississimanerisigut ilaannikkut iluatsitsisarpugut, nalunngilarpulli ilaannikkut akerlerluinnaanik pisoqartartoq. Nunatsinni najugaqarnerup akikinnerulernissaa pitsaanerulernissaalu Naalakkersuisunit sulissutigiuaannartussaavarput.

Nielsen: Akitsornissaa naluneqanngereerpoq

Jens-Frederik Nielsenip isornartorsiuineq paasilluarnerarpaa:

- Uatsinnut nuanninngilaq, kisianni tamanna aqussinnaanngilarput.

Apeqqut: Politikikkut aqunneqarsinnaanngitsut akikinnerulernissaat neriorsuutigiaartoorsimaviuk?

- Naamik, taama isumaqanngilanga. Naalakkersuisut qaammatini marlunni issiapput. Naalakkersuisut sulinerat aatsaat aallartisaleruttorpoq, nunamilu inuuniarnerup akikinnerulernissaa pitsaanerulernissaalu anguniartuaannassavara, tamakkualu saniatigut aamma allanik pissuteqarpoq.

- Ikummatissat akii aqukkuminaatsuupput.

Siorna upernaakkut akit 60 oorimik qaffanneqarmata kingusinnerusukkut akit qaffanneqaqqinnissaat naluneqanngereersoq Jens-Frederik Nielsenip aamma eqqaavaa.

- Polar Oil ukiuni marlunni kingullerni immikkut ittumik sinneqartoortarmat akit appasinnerulersinneqarput.

- Aningaasat taakku maanna nungummata maanna taama pisoqarpoq, Jens-Frederik Nielsen oqarpoq.

Ikiorsiissuteqarnissaq maanna periarfissaanngitsoq

Naalakkersuisut ikummatissap akiata apparneqarnissaa siunertaralugu tapiissuteqartalissasut SIK-p KNAPK-llu oqariartuutigaat, tamannali Jens-Frederik Nielsenip suli piareersimaffiginngilaa:

- Pingaarnersiornissaa ajornakusoorpoq. Ikummatissaq akia maanna nikisissimanngitsuugutsigu ukiumut 130 mio. koruuninik naleqartussaagaluarpoq.

- Aningaasarpassuupput, oqarpoq nangillunilu:

- Nunami inuuniarnermi atukkat qanoq innersut malinnaaffigiuassavarput, nunattali karsianut aningaasanik amerlanernik aamma pisariaqartitsivugut. Taamaattumik maannakkorpiaq tapiissuteqarnerulernissaq eqqarsaatiginngilarput, inuuniarnermili atukkat pitsaanerpaanissaat sulissutigiuarparput.

Naalakkersuisut siulittaasuata KNI-p niuerneq tunngavigalugu akilersuinerulernissaa ilimaginngilaa:

- Niuernermi akigititat malinnerulissagutsigit, nunarsuarmi pissutsit maanna taama itsillugit, suli akit nikerarnerulernissaat pisinnaavoq. Ukiup ataatsip ingerlanerani akit arlaleriarlutik qaffanneqartassapput, tamannalu aamma aqukkuminaannerussalluni.

- Periaaserpulli nalilersortuassavarput. Qanoq ililluta ikummatissap akiata appasinnerpaaffissaa qulakkeersinnaanerlugu. Nalunngilarpummi Kalaallit Nunaanni inuuniarnermi atugassarititaasut eqqarsaatigalugit tamanna pingaaruteqarluinnartoq, Jens-Frederik Nielsen oqarpoq.