Jens-Frederik Nielsen: Danmarkimik suleqateqarneq nukittorsarneqassaaq
Ullumikkut Danmark Kalaallillu Nunaat nukittuumik suleqatigiittut, Jens-Frederik Nielsen oqarpoq.
Jens-Frederik Nielsen (D) naalakkersuisooqatigiinnik tallimanngormat ilisaritinneqartunik suleqatigiinnissamik isumaqatigiissusiorpoq. Sapaatip akunnerata tulliani ataasinngorpat naalakkersuisooqatigiit Inatsisartunit qinigaarlaanit akuerineqassapput.
Foto: Oscar Scott Carl
Kalaallit Nunaata nunatut namminersortunngornissaata tungaanut, nunatta Danmarkimik suleqatigiinnini nukittorsassavaa.
Taama Naalakkersuisunut siulittaasunngortussaq Jens-Frederik Nielsen (D) nutaarsiassaqartitsivimmut Reutersimut oqarpoq.
- Ullumikkut naalagaaffeqatigiinnut ilaavugut, aaqqissuussinermullu tassunga ilaatilluta ullut ilaani nunatut namminersortunngornissatta tungaanut, peqatiginnerput suleqatigiinnerpullu inerisaqqittariaqarparput, ataasinngormat taanna oqarpoq.
Ullumikkut “patajaatsumik suleqatigiittoqartoq” Jens-Frederik Nielsenip ilassutigaa.
Nangillunilu Kalaallit Nunaata USA-mik suleqatiginninnissaa aamma kissaatigalugu oqarpoq. Tamannali ataqqeqatigiittumik ingerlanneqassaaq, politikeri Demokraatineersoq, partiialu nunatsinni qinersinermi annerpaanngortoq oqarpoq.
Danmarkimik isumaqatiginninniarumavoq
Tallimanngormat Jens-Frederik Nielsenip naalakkersuisooqatigiit Demokraatit, Inuit Ataqatigiit, Siumut Atassullu ilisaritippai.
Danmarkimik siunissami aningaasaqarnikkut suleqatigiinnissamik Naalakkersuisut isumaqatiginninniarnerit aallartissagaat, naalakkersuisooqatigiinnermi isumaqatigiissummi allassimavoq, tassani nunatsinni ineriartornermik pilersitsiniarluni aningaasaliinerit pisariaqartut ilanngullugit.
Isumaqatigiissut naapertorlugu aamma Danmarkimit akisussaaffinni tigusinissaq, Namminersorneq pillugu inatsimmik nutarterinissaq § 21-ilu naapertorlugu isumalioqatigiissitaatut taaneqartup nanginneqarluni suliaminik naammassinninnissaa sulissutigineqassapput. Isumalioqatigiissitaq Kalaallit Nunaata qanoq namminersortunngorsinnaanera pillugu inatsisitigut naliliinermik saqqummiussissaaq.
Trumpip oqaaseqarnerata kingorna qisuariartoq
Jens-Frederik Nielsenip oqaaseqarnera, USA-p præsidentiata Donald Trumpip ulluni kingullerni USA-p Kalaallit Nunaannik tigusisariaqarneranik oqaaserisaminik uteqqiinerata kingorna saqqummiunneqarput.
- Kalaallit Nunaat tigussavarput, aap, 100 procentimik qularnanngilaq, taanna sapaatip akunnerata naanerani NBC Newsimik apersorneqarnermini taama oqarpoq.
Kalaallit Nunaata pisiarineqarsinnaannginnera kalaalillu namminiilivinnissartik kissaatigigaat, Danskit kalaallillu tungaannit erseqqissaatigineqarpoq.
Oqariartuut tamanna Jens-Frederik Nielsenip Reutersimit apersorneqarnermini uteqqippaa.
- Kalaallit Nunaat USA-p ilaginngisaannalissavaa. Isumaqatiginninniarnissaq kissaatigaarput. Soorunami nunatta isumannaatsuunissaa eqqarsaatigalugu nukittuumik suleqateqarnissaq kissaatigaarput. Tamannali illuatungeriit ataqqeqatigiinnerannik toqqammaveqassaaq.
- Tunineqarnavianngilagut, Amerikarmiunngunngisaannassaagullu, taanna oqarpoq.
Vicepræsident Danmarkimik avoqqaarinnittoq
USA-p vicepræsidentia J.D. Vance tallimanngornermi Amerikamiut nunatta avannaani sakkutooqarfiannut tikeraarpoq.
Tusagassiortunut katersuutsitsinermut atatillugu Danmarki nunatta innuttai pillugit “iluamik suliaqarsimanngitsoq” oqaatigaa.
Vancep isumaa naapertorlugu Danmarki Kalaallit Nunaata isumannaatsuunissaa pillugu naammattumik suliaqanngilaq.
