Jens-Frederik Nielsen: - Oqaloqatigiinnerit aappassaat ingerlapput

Maanna Inatsisartunut qinersinermiit sapaatip akunnerluinnaa qaangiuttoq , suli oqaatigineqarsinnaanngilaq siammasissumik naalakkersuisooqatigiinnik pilersitsinissamik kissaateqarneq qanoq timitalerneqarsinnaanersoq, maannamullu partiit tamarmik suli isumaqatigiinniarnerni peqataapput. Tamanna Demokraatit siulittaasuata, Jens-Frederik Nielsenip, Sermitsiamut uppernarsarpaa.

- Piffissami matumani inuuffigisatsinni aatsaat taamak pingaaruteqartigaaq , Kalaallit Nunaanni inuiaqatigiit ataatsimoornissaat, taamaalilluta siunissatsinnut ataatsimoorussamik anguniagaqarnissarput siunnerfigisinnaagatsigu. Uagut immitsinnuinnaq pinnata, siunissamili kinguaariit tullinnguuttussat pillugit. 

- Immitsinnut akornatsinnilu nukissaajarnissarput pinngitsoortittariaqarparput. Tassami aamma eqqaamasariaqarparput  avataanit sakkortuumik tatisimanninniartoqarneranik nalaataqarpugut. Kimigiisertoqarnera ataatsimoorluta aammalu ataatsimik oqaaseqarluta anigorniagassaraarput, nunatta tatiginassusia ataqqinassusialu innarlernagit, Demokraatit siulittaasuat, Jens-Frederik Nielsen oqarpoq.

Partiit tamarmik suli peqataapput

Ullumikkut marlunngornermi marsip 18-iani sapaatip akunnera qaangiuppoq qinersinerup ingerlanneqarneraniit, qinersinermilu ilisimaneqartutut Demokraatit ajugaapput, taamaalillutillu naalakkersuisooqatigiinnik pilersitsinissamut siunertaqarluni oqaloqatigiinnerni siuttunngorlutik.

Jens-Frederik Nielsenip uppernarsarpaa, partiip periarfissat misissuiffigigai, ilaatigut toqqaannartumik oqaloqatigiinnerit/isumaqatigiinniarnerit aqqutigalugit, tamatumalu saniatigut partiit qineqqusaarutaannik nalilersuisoqarluni, ilaatigut takuniarlugu sumi ataatsimoorussaqartoqarnersoq aammalu qanoq iliorluni assigiinngissutsit akimorlugit ataatsimoortoqalersinnaanersoq pillugu.

- Uppernarsarsinnaavara partiit tamarmik suli peqataammata, aammalu suli piumasaqaatinik naammassineqarsinnaanngitsunik saqqummiisoqanngilaq, taamaattumik periarfissat tamarmik suli ammapput, taanna oqarpoq.

Taamaattorli maannangaaq oqaluttuarisinnaaviuk Demokraatit politikkikkut pingaartitat suut aalajangersimasumik piumasaqaataanersut?

- Naamik, partiit akornanni oqaloqatigiissutigisagut pillugit paasissutissiisinnaanngilanga, oqaloqatigiinnerit ataatsimiittarfiit iluanniiginnassapput, ersarissumik nalunaaruteqarsinnaanngorutta taamaaliorumaarpugut.

Demokraatit Inatsisartunut qinigaatitai arlallit aamma Kommunalbestyrelsimut qinersinissamut sassarnerat ajornartorsiutinik pilersitsiva?

- Naamik, kalluaanertalimmik ajornartorsiuteqartoqanngilaq, kisianni ingerlaqqittariaqarpunga, oqaatigeriikakkalu ilassutissaqartinngikkallarpakka, Jens-Frederik Nielsen akivoq.

Partiit allat Demokraatit avaqqullugit iliuuseqanngillat - maannamut

Qinersinermi inernerit isigalugit, innuttaasut ersarissumik nalunaaruteqarput Jens-Frederik Nielsen Naalakkersuisut siulittaasuattut tullinnguuttussatut takorusukkitsik.

Politikkili ilisimaneqartutut tassanngaannaq allanngorsinnaavoq, naatsorsuutigineqanngitsunillu pisoqaratarsinnaajuaannarpoq.

Sermitsiamit partiit sinnerisa siulittaasuinut attaveqarniaraluarpugut, ilaatigut paasiniarlugu suna pisariaqartinneqarnersoq isumaqatigiinniarfimmiiginnassappata, aammalu Demokraatit siuttoralugit naalakkersuisooqatigiinnik pilersitsisoqarsinnaaneranut periarfissat tamakkiisumik ammatinneraat.

Demokraatit qinersinermi Inatsisartuni qulinik ilaasortaatitaqalerpoq, tamannalu mattussinngilaq allatigut politikkikkut isumaqatigiissuteqarnissamut, Demokraatit avataatigut 16-inut kisitsisinnaaneq tassani apeqqutaalluni. 

IA aamma N taamaaliussagaluarunik kisimiillutik aaqqiissutissamik nassaarniarsinnaanngillat. Taakkumi katillugit 15-inik ilaasortaatitaqarput, taamaattumik S imaluunniit A imaluunniit taakku tamaasa peqatigisariaqarpaat, Demokraatinik avaqqutsillutik naalakkersuisooqatigiiliornialissagaluarunik.