Jens-Frederik Nielsen: Trump Jr.-ip Nuummut tikeraarnera takornariarneriinnaanngilaq
Donald Trump Jr.ip Nuummut takornariarluni tikeraarnera ussatigineqaqaaq. Tikeraarnerli USA-p Kalaallit Nunaannik soqutiginninnera pillugu takussutissaalluartoq, Demokraatit siulittaasuat Jens-Frederik Nielsen isumaqarpoq.
- Takornariaannarunanngilaq, Trumpip ukiut kingulliini qanoq oqariartorsimanera eqqarsaatigissagaanni eqqumiippoq takornariaannartoqassappat. Soorunami siunertaqarlutik maaniippoq, asuliinnaanngilaq.
Assi: Leiff Josefsen
Donald Trumpip nunarput soqutigingaarpaa, allaammi nunarput pisiarerusullugu oqaaseqarnikuulluni, naggataatigullu tigunissaanut aamma kissaateqarnerarluni.
- Maannakkut taanna eqqaaneqanngilaq, kisianni ernerata nunatsinnut tikeraarnera eqqarsarnarpoq, Jens-Frederik Nielsen oqarpoq nangillunilu:
- Takornariaannarunanngilaq, Trumpip ukiut kingulliini qanoq oqariartorsimanera eqqarsaatigissagaanni eqqumiippoq takornariaannartoqassappat. Soorunami siunertaqarlutik maaniippoq, asuliinnaanngilaq.
Takussutissaq sakkortooq nassiunneqarpoq
Demokraatit siulittaasuata Jens Frederik Nielsenip tikeraarneq Trumpip periusissiaanut ilaasoq, ingammik Donald Trumpip præsidentinngorteqqinneqarsinnaanera eqqarsaatigalugu, oqaatigaa.
- Trumpip ernerivaa. Siunertaqarput aamma siunertaa soorpiaanersoq soorunami ilisimaqqissaanngilarput maannakkut, kisianni piareerismaffigisariaqarparput.
Namminiilivinnissatsinnut USA sunniuteqarsinnaava? Qanoq?
- Siunniuteqarsinnaavoq. Ukiut kingulliit Inatsisartutigoortut qiviarutsigit, Free Association periarfissat eqqratorneqaannaavipput. Namminiilivinnissamut oqallinneq soorlu sakkortusaataassasoq.
Tamannali mianersuutigineqassasoq naqissuserpaa. Uagut nammineq naleqartitatsinnut qitiusariaqarnerput oqaatigaa.
- Asuliinnaanngitsumik tikippoq. Naleqartitatsinnut uagut qitiusariaqarpugut. Suleqatigiinneq annertunerusoq pissappat ajunngilaq. Kisianni uagut imminut aallaafiulluta suliarineqartariaqarpoq.
