Avannaata Kommuniani borgmesterip Palle Jerimiassenip
(attaviitsoq) isumaginninnermut, ilaqutariinnermut, suliffeqarnermut nunamullu
namminermut naalakkersuisoq Jess Svane (S) Ilulissani qaammammi kingullermi
ataatsimeeqatigaa, tassanilu Avannaata Kommuniata avinneqarnissaa pillugu
innuttaasunik taasititsinissamik kommunalbestyrelsip kissaateqarneranik
allakkamik tunineqarpoq.- Kommunalbestyrelsimillu borgmesteri peqquneqarsimavoq
ikaarsaariarneq qulakkeerniarlugu Namminersorlutik Oqartussanut qinigaaffimmik
sivitsuisoqarnissaanik qinnuteqaqqullugu.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Avannaata Kommuniani borgmesterip Palle Jerimiassenip
(attaviitsoq) isumaginninnermut, ilaqutariinnermut, suliffeqarnermut nunamullu
namminermut naalakkersuisoq Jess Svane (S) Ilulissani qaammammi kingullermi
ataatsimeeqatigaa, tassanilu Avannaata Kommuniata avinneqarnissaa pillugu
innuttaasunik taasititsinissamik kommunalbestyrelsip kissaateqarneranik
allakkamik tunineqarpoq.- Kommunalbestyrelsimillu borgmesteri peqquneqarsimavoq
ikaarsaariarneq qulakkeerniarlugu Namminersorlutik Oqartussanut qinigaaffimmik
sivitsuisoqarnissaanik qinnuteqaqqullugu.
- Avannaata
Kommuniata avinneqarnissaanut kommunalbestyrelsip saaffiginnissutaa maannakkut
aappimik naamimillu akisinnaanngilarput. Maanna inatsit
misissorpavut, Inatsisartulli kisimik
kommunit killeqarfiinik allannguisinnaatitaapput, Jess Svane oqarpoq.
Inatsisartut inatsiseqarnermut ataatsimiititaliaanni
siulittaasoq Anders Olsen (S) Avannaata Kommuniata kommunip avinneqarnissaanik
kissaateqarnera pillugu oqaaseqarsinnaanngikkallarluni
oqarpoq.
- Ataatsimiititaliap Avannaata Kommuniata kommunip avinneqarnissaa pillugu innuttaasunik
taasititsinissamik aalajangernera suli oqaluuserinngilaa, ukiaruli
ataatsimiinnermi oqaluuserineqassaaq, Anders Olsen oqarpoq.
Kommunerujussuit
iluatsinngitsoorput
Avannaata Kommuniani kommunalbestyrelsip kommunip
avinnissaa innuttaasunut taasissutigitinniarpaa, qanorlu
avinneqarnissaa immikkut ataatsimiinnermi oqaluuseriniarlugu.
- Kommuni innuttaasunik taasititsiuaannarsinnaavoq,
taasititsinerullu inernera Naalakkersuisunit suliarineqareerpat soorunami
Inatsisartunut ingerlateqqinneqassaaq, Jess Svane oqarpoq, isertuutinngilaalu
kommunerujussuit ilaatigut iluatsinngitsoormata.
Naalakkersuisoq Jess Svane borgmesterinik
naalakkersuisunillu politikkikkut ataqatigiissaarinermut Nuummi qaammatip
tulliani ataatsimeeqateqarniarpoq, ataatsimiinnermilu tamanna
oqaluuserineqassaaq.
- Kommunit avinneqarnissaat pillugu innuttaasut
kissaataat tusaavavut. Naalakkersuisut
borgmesterillu ataatsimiinnissaannut oqaluuserisassanngortippara, tassani pisoq
qanoq isumaqarfigineraat paasiniarlugu, Jess Svane oqarpoq.
- Innuttaasut aamma misigipput kommunerujussuit
iluatsinngitsoorsimasut. Suliat qitiusumik ingerlanneqarput, najugaqarfiit
mikinerusuni sullissinerit innuttaasunit pisariaqartinneqartut illoqarfinnut
anginerusunut nuunneqarnikuupput. Illoqarfiit annerit nukittorsarneqarput,
najugaqarfiillu mikinerusut sanngiillisinneqarlutik, taamaattumik kommunit
aaqqissuussaanerlu oqaluuserisariaqarparput. Kommunit
oqimaatsunik akisussaaffeqalernikuupput, assersuutigalugu
isumaginninnermut tunngasuni, Jess Svane oqarpoq.
Kommunit avinneqarnerinit aningaasartuutit
amerlanerulersut
Jess Svanep Avannaata Kommuniata avinneqarnerata
kingunissai pillugit BDO-p kukkunersiuisup
nalunaarusiaa suli takusimanngilai, Kommuneqarfik Sermersuumili Qaasuitsullu
Kommuniani assingusunik nalunaarusiaqareerpoq.
- Misissuinerit siuliini erserpoq kommunit
avinneqaraangata aningaasartuutit qaffasinnerulernerannik kinguneqartartoq.
Innuttaasut naammagisimaarinninnerat oqallinnermi aamma pingaaruteqarpoq,
aningaasartuutit kisiisa isiginiarneqaratik. Aamma oqallisigisariaqarparput
kommunit suliassanik oqimaatsunik suliaqarnerminni unammilligassaat, Jess Svane
oqarpoq, inunnik isumaginninnermut tunngasut, inuit innarluutillit,
assersuutigalugit. Kommunit taakkunani suliaqarnissamut sulisunik
piukkunnaatilinnik amigaateqarmata.
- Isumaginninnermut tunngasut aamma inuit
innarluutillit pillugit suliat politikkikkut oqallinnermi
sammineqangaatsiarput, suliassaqarfiit kommuninut mikinerusunut
agguaanneqaqqissappat? Oqallisigisariaqarparput suliassat siornatigutut
qitiusumik inissinneqaqqissanersut, kommunillu suliassanik oqimaannerusunik
tigusinissaminnut piginnaasaqarnerulernissaat, Jess Svane oqarpoq.
