Justusi Rigshospitalimiit qineqqusaarsimasoq nuannaartoq

Kommuneqarfik Sermersuumi qinersiviup Nuummi illorsuarmi timersortarfiup silataani qinigassanngortittoq nuannaangaartoq ippoq. Demokraatineersoq Justus Hansen inunnik, ikinngutiminik, ilisarisimasaminik qinersiartortunillu ilassiorpoq.

Justus Hansen ukiup ataatsip missaani kræfteqarnerminik akiuereerluni immikkut ittumik ulloq nuannaarfiuvoq. Taanna katsorsartinnermi nalaani Inatsisartunut kommunimullu qineqqusaarpoq.

- Ukiumi kingullermi inuttut aqqusaakkanik ulikkaarpunga, kræftimut katsorsarneqarlungalu allarpassuartigut aqqusaagaqarlunga. Maaneeqqinnera inunnillu ilassiornera qujamasuutigaara, Justus Hansen Rigshospitalimi katsorsartilluni qineqqusaarsimasoq oqarpoq.

- Nuannequtaa tassaavoq napparsimmavimmiit Inatsisartunut kommunimullu Facebookikkut Instagramikkullu qineqqusaartarsimagama, suliaritilluareerlungalu maannarpunga qineqqusaarneralu nangeqqillugu Inatsisartunullu qinigaallunga, Justus Hansen nuannaartoq oqarpoq.

Napparsimmavimmit nutaarsiassat nuannersut

Ullumikkut, kommunimut qinersiffiusumi, ulloq nuannersuuvoq. Taassumami aaversinnini kingulleq paasisaqarfigaa:

- Sapaatip-akunnerata siuliani aaversinnera nalornissutigineqalaarpoq, ullumilu pitsaasumik akissutisivunga. Soorunamilu eqqarsarpunga peqqissuseq, ilaquttat, ikinngutit maani pisuniit pingaarnerulaartut. Qanorluunniimmi pisoqaraluarpat politikkikkut sunniuteqarsinnaaneq atorlugu inunnut allanut uattut aqqusaagaqartunut ajornannginnerulaamik aqqusaagaqartoqarsinnaanera anguniarneqarsinnaammat.

- Suli tamanna sorsuutigissavara, namminermi qanigisamik ikinngutimillu kræftimut annaasaqarneq timikkut aqqusaarnikuugakku nalunngilara qanoq misinnarnersoq. Nuannaarutigaarali rigshospitalimut katsorsartikkiartortoqarsinnaammat.

- Inuugama nuannaarpunga, ullorlu una nuannaarutigalugu, Justus Hansen oqarpoq. Taanna Demokraatit sinnerlugit Inatsisartunut aamma qinigaavoq.

Inatsisartuni ajugaaneq nuannaarutigigaa

- Ajugaavugut, tamatumalu takutippaa nuna allamut sangusoq, tamannalu sorsuutigisimavarput. Aallaqqaataaniilli peqataasimavunga, maannalu killiffipput qamannga pisumik nuannaarutigaara, oqarpoq neriuutigalugulu kommunimut qinersinermi aamma taamaaliortoqarumaartoq:

- Soorunami aamma qanimut oqartussaaqataanerm kommuninilu assigiinngitsuni Demokraatit siuariarnissaat neriuutigingaarpara. Piffiit allaalluinnarput, aamma nunanit allanit tatineqarneq eqqarsaatigalugu, tamannalu qanorluunniit isumaqaraluarutta qanimut oqartussaaqataarnerup aqqani ataatsimoortariaqarnermik ersersitsipput. Nuannaarutigaaralu qinersisinnaagatta, Justus Hansen oqarpoq.