KL

DK

NAARTUSUNIK ISUMAGINNINNEQ ERNISUSSANILLU KIFFARTUUSSINEQ

Juumuut amerlanerusut nerisassarsiutissallu

IA, S, N aamma A-p peqqinnissaqarfik pillugu politikkikkut 2023-mi isumaqatigiissuteqarnerat malitseqartillugu Naalakkersuisut maanna naartunermut aamma erninermut atatillugu kiffartuussinissamik pilersaarummik saqqummiussipput. Ernisussat suli ernisarfimmut qaninnerpaamut angalasariaqarput, kisianni Naalakkersuisut aaqqiissutissanik suliniuteqarput, taamaalilluni ilaquttat najornagit ernisarnerni toqqissisimanngissutaasartut annikillisinniarlugit.

Jensine Berthelsen
tusagassiortoq
Saqqummersinneqarpoq

Ernisarfiit akuerisaasut makkuninnga minnerpaamik sulisoqartussaapput:

Erninermut upalungaarsimasussat pigiinnarniarlugit peqqinnissaqarfiup immikkoortuani sulisussat ilisimasallit makku minnerpaamik atorfeqartinneqassapput:

    • Nakorsaq immikkut ilisimasalik pilaalluni ernisitsinissamut piginnaasalik. 
      Ernisimasunut immikkoortortaqarfimmi nakorsiartitsinermik sulinermillu ukiut pingasut kingulliit misilittagaqarnissaa pillugu piumasaqarneq.

  • Peqqissaasoq sinitsitsisartoq ataaseq arlallilluunniit.
    Peqqissaasoq sinitsitsisartoq tassanngaannartumik pilaalluni ernisitsinissamut aamma ernitilluni aanaarnernut nammineerluni sulisinnaasoq.

  • Juumooq ataaseq juumuulluunniit arlallit.

  • Bioanalytikeri ataaseq.

  • Nunap immikkoortuani peqqissaasut pisortaattut imaluunniit nunap immikkoortuani nakorsat pisortaattut nunap immikkoortuani aqutsineq.

Nuna tamakkerlugu ernisarfinnik tallimanik peqqinnissaqarfik ullumikkut peqarpoq.

Taakku tassaapput Dronning Ingridip Napparsimmavissua Nuuk, Peqqinnissaqarfik Tasiilaq kiisalu nunap immikkoortuini napparsimaviit Sisimiut, Ilulissat aamma piffissap ilaani Qaqortoq.

Maniitsumi Uummannamilu peqqinnissaqarfinni inunngortarnermi periarfissat unitsinneqarput ukiuni 2012-mi 2017-imilu kiisalu kingullertut Aasiaanni nunap immikkoortuani napparsimavik 2019-mi unitsinneqarallarnikuuvoq, tassani naartunermut erninermullu atatillugu sulisussat pisariaqartut amigaatigineqarnerat pissutaalluni.

Naartusut erniffissaminnut suli angalasariaqarput

Tamanna isumaqarpoq naartusut ernisussanngornerminnut atatillugu napparsimavinnut ernisarfittalinnut angalasarnerat suli ingerlanneqassasoq. Tassa peqqinnissaqarfimmi atorfiit inuttassarsiuunneqartartut aammalu sulisut sulisoriinnarnissaannik ajornartorsiuteqarneq annikilliartunngimmat siunissami naartusut suli angalasassapput erninissaminnut atatillugu.

Taamaattorli matumani pilersaarummi suliniutigineqarpoq naartusut, meeraq inunngortoq ilaqutaasullu erninermut atatillugu ataatsimoortutut misigisinnaanissaat annertusarniarlugu. Ilanngullugu pilersaarutigineqarpoq siunissami erniartortut ingiaqateqarsinnaatitaalernissaat, taamaattorli tamanna misissorneqareerpat pilersaarutit erseqqinnerusut piviusunngortinneqarsinnaalissapput.

Pilersaarutit matumani saqqummiunneqartut tassaapput peqqissutsimut Naalakkersuisoq, Agathe Fontainip saqqummiussai, naartusunik isumaginninnermut ernisussanillu kiffartuussinermut iliuusissanut pilersaarusiassatut siunnersuutigalugit.

Naalakkersuisut iliuusissatut saqqummiussaasa qulequtaat aajuku. Naalakkersuisut siunnersuutigaat iliuusissat 1,2,3,4, aamma 8 ukioq manna timitalerneqassasut, sinnerilu aappaagumiit timitalersorneqassasut.

Naartusut isumassorneqartarnerat pitsaanerusoq

Naalakkersuisut erseqqissaatigaat sinerissami peqqinnissaqarfinni naartusunik sullissisarneq sinerissami peqqinnissaqarfimmit ingerlanneqartartoq pitsanngorsaavigineqassasoq, naartuneq peqqinnartoq, ernineq isumannaatsoq aammalu meeqqap ukiuani siullermi peqqissutsikkut malinnaasoqartarnera eqqarsaatigalugit.

Ukioq manna sulisussat atorfinitsinnissaat isumaginiarneqarpoq:

- Suliniut taanna atorlugu sinerissami peqqinnissaqarfiup qitiusumik immikkoortuini sulisut juumuunik pingasunik meeraaqqerisunillu pingasunik amerlineqassapput. Peqqinnissaqarfiup qitiusumik immikkoortuini sulisut sumiinnissaannut tunngasut inaarutaasumik erseqqissarneqarsimanngillat, aamma najukkami pisariaqartinneqartut kiisalu sulisussarsiortarnermi periarfissat apeqqutaajumaarput.

Tamatuma saniatigut DIH-p ernisarfiani sulisut amerlineqassapput:

- Suliniut taanna atorlugu Dronning Ingridip Napparsimavissuata ernisarfiani arnat nappaataannut nakorsat immikkut ilisimasallit marluk juumuullu ataatsip atorfinitsinnerisigut sulisut amerlineqartussaapput. Dronning Ingridip Napparsimavissuata ernisarfiani sulisut amerlinerisigut nuna tamakkerlugu naartusunik isumaginnittarneq erninernullu sullissisarneq (Suliniuteqarfik 1) nukittorsarneqassapput.

Erniartorlutik angalasunut nerisassarsiutissat

Ilaqutariit aningaasaqarnikkut piginnaasaat assigiinngisitaartuupput, taamaattorli naartusut ikigisassaanngitsut aningaasaqarnikkut qajannartumik inissisimasuunerat pissutaannguatsiarluni erninissaminnut atatillugu angalasartut nerisassarsiutissaannik tunineqartalernissaat siunniunneqarpoq, taamaalilluni DIH-p kantiinaanut neriartortariaqartarneq pituttorfigiunnaarlugu nerisaqarnikkut allaanerusumik pilersaarusiorsinnaaneq siuarsarniarneqarluni:

- Ullumikkut arnat naartusut nerisarfimmi nerisassanik pingaarnernik pingasunik neqeroorfigineqartarput. Naartusoq nerisassarsiutissaminik tunineqaruni maanaannaq suunngitsumik nerisarnermigut ulloq unnuarlu sinilluartarnissani anguniarlugu pilersaarusiorsinnaanerussaaq. Nuummiinnerup nalaani inuussutissaqarniarnerup inuunerullu pitsaasuunissaata tungaatigut tamanna pitsanngoriaateqassasoq naatsorsuutigineqarpoq.

Piumassuserinngisaminnik qitornartaarsinnaanngitsut ikiorneqarnerat annertusarneqassaaq

Naalakkersuisut pilersaarusiaminni ilanngullugu erseqqissaatigaat aappariit amerliartuinnartut qitornartaarusukkaluarlutik naartulersinnaannginnerat ajornartorsiutaasoq annertusiartortoq.

- Kinguaassiorsinnaannginneq inunnut meerartaarnissamut ajornartitsisunut immikkut ajornartorsiutaaginnanngilaq, kisiannili inuiaqatigiit ajornartorsiutaattut isigisariaqarluni.

Kinguaassiorsinnaannginnermi unammilligassat tunngavigalugit inuiaqatigiillu ineriartorfiunerat ataatsimut isigalugu Naalakkersuisut isumaqarput piumassuserinngisamik meerartaarsinnaannginnermut nukittunerusumik suliniuteqarnissap sulissutigineqarnissaa pingaartuusoq, taamaaliornikkut Peqqinnissaqarfiup aappariinnut meerartaarusuttunut ikiuinissaa periarfissaanerulissammat.

Naalakkersuisut pilersaarutaat tamakkiisoq atuaruk una toorlugu.

inuiaqatigiit samfund

Atorfiit tamaasa takukkit

Powered by Labrador CMS