KAK 2024-mi sinneqartooruteqartoq
Kalaallit Arsaattartut Kattuffiat, KAK, aningaaqarnera 2024-mi sinneqartoorfiuvoq.
Arkivfoto: Leiff Josefsen
KAK-p 2024-mi ukiumoortumik naatsorsuutai sinneqartoorfiupput. Tamanna 2023-mi ukiumoortumik naatsorsuutinut sanilliullugu pitsanngoriaataavoq, taamanikkut nammineq aningaasaatit amigartooruteqarmata.
KAK tusagassiuutinut nalunaarummi allappoq.
Kalaallit Arsaattartut Kattuffiani KAK-mi siulittaasup angusarissaarneq nuannaarutigaa.
- Ukioq manna naatsorsuutit saqqummiussavut tulluusimaarutigeqaakka. Sulilluarnerup, pingaarnersiuinerit oqitsuinnaanngitsut minnerunngitsumillu kattuffiup tamarmi suleqatigiilluarnerata kinguneraat, KAK-mi siulittaasoq Kenneth Kleist oqarpoq.
Amigartooruteqarnermiit sinneqartooruteqarnermut
KAK 2023-mi 634.000 koruuninik amigartooruteqarpoq. Aningaasaqarniarnermili sukannersumik pingaarnersiuinerup kingunerisaanik KAK 2024-mi sinneqartooruteqarpoq, nammineq aningaasaatit naatsorsuutini 111.000 koruuninik sinneqartooruteqarfiullutik.
- Imaannaasimanngilaq – pilliuteqartariaqartarsimavugut, sivisuumik sulisariaqartarluta oqittuinnaanngitsunillu aalajangiisariaqartarluta. Qanorli siuarsimatiginersugut unammilligassallu killormut saallugit periarfissatut pilersissimanerat takugaangakkit, taava naluneq ajorparput tamaviaarluta sulisimanerput imminut akilersimasoq. Tamanna kisitsisiinnaanngilaq – Kalaallit Nunaanniliuna arsaannerup siunissaa kattuffittut ataatsimoorullugu siumut ingerlasimanitsinnik takussutissaasoq, Kenneth Kleist oqarpoq.
KAK-p 2024-mi sinneqartoorneranik kattuffimmi suut pingaarnersiorneqarsimanersut paasissutissiissutigineqanngillat.
