Pisiffik illoqarfinni annerni arfinilinni
pisiniarfiuteqartoq aamma Kalaallit Nunaani Brugseni illoqarfinni
arfineq-pingasuni 17-inik pisiniarfiuteqartoq, kalaaliminernik
assigiinngitsorpassuarnik aalisartunit piniartuniillu pisisarput, taakkulu
nillataartunngorlugit ullut tamaasa tuniniarneqartarput.
Kalaalimernit tamakku
soqutigineqarlutillu piumaneqarnerluartut, pisiniarfiinnit
oqaatigineqarpoq.
Pisiffik illoqarfinni annerni arfinilinni
pisiniarfiuteqartoq aamma Kalaallit Nunaani Brugseni illoqarfinni
arfineq-pingasuni 17-inik pisiniarfiuteqartoq, kalaaliminernik
assigiinngitsorpassuarnik aalisartunit piniartuniillu pisisarput, taakkulu
nillataartunngorlugit ullut tamaasa tuniniarneqartarput.
Kalaalimernit tamakku
soqutigineqarlutillu piumaneqarnerluartut, pisiniarfiinnit
oqaatigineqarpoq.
Pilersuisoq illoqarfinni nunaqarfinnilu
katillugit 65-inik pisiniarfiuteqartoq kisiartaalluni kalaaliminernik pisineq
ajorpoq, tamannalu pisiniarfinni neqilerfeqannginneranik peqquteqartoq
oqaatigineqarpoq.
Tunisat aatsaat taama amerlatigisut
Pisiffimmi tuniniaanermut,
attaveqaqatigiinnermut aamma CSR-imut pisortaq Tina Hansen naapertorlugu,
Pisiffiup periusissiami pingaarnertut sammisassai piujuartitsinermullu
anguniagai aqqutigalugit kalaallit nerisassaataannik tuniniaanerup
nukittorsarneqarnissaa qulakkeerniarneqarpoq, pisiniarfiutileqatigiiffiullu
2021-mut sanilliullugu nunatsinneersunik nerisassanik tuniniaanerup 2030-p
tungaanut ukiumut 5 procentimik qaffannissaanik anguniagaqarpoq. Anguniagaq
tamanna anguniarlugu assigiinngitsunik suliniuterpassuaqartoqareerpoq, taakkulu
kinguneqarluareerput, siornatigumullu naleqqiullugu kalaalimernit tunisat
aatsaat taama amerlatigisut, taanna erseqqissaavoq.
- 2021-mut sanilliullugu 2022-mi 2023-milu
Pisiffimmi 9,8 aamma 23 procentimik kalaliminernik assigiinngitsunik
tunisassiaqarnerulerpugut. Tamanna tulluusimaarutigaarput, soorluttaaq ukioq
mannaannaq nunaqavissut 250-it sinnillit niueqatigisarsimaneri tulluusimaarutigigipput,
Tina Hansen oqarpoq.
Pisiffiup nunaqavissunit kalaaliminernik
allanillu nerisassaanngitsunik niueqateqartarnermigut nioqqutissanik
nunatsinninngaanneersunik assigiinngitsorpassuarnik nioqqutissaateqalersimasoq,
taassuma erseqqissaatigaa.
Imminut pilersorneq innuttaaqatigiinnilu
akisussaaffik
Nunatsinni imminut pilersorsinnaaneq kalaallit
pingaartingaaraat Pisiffiup maluginiarpaa.
- Nunaqavissut kalaaliminernik
allanillu tunisassiortut uagullu pitsaasumik suleqatigiinnitsigut Kalaallit
Nunaani imminut pilersorsinnaanerulernissaq qulakkeersinnaavarput.
- Taamaattumik inuiaqatigiit
nammineernerulernissamik kissaateqarnerat pillugu Pisiffimmi inuiaqatigiinnut
akisussaaffeqarnerput ilisimaarilluarparput. Pisiniarfivut naatsiianik, majruuanik,
savaaqqanik, qullukkanik allarpassuarnillu nunatsinnit tunisassianik peqartuarnissaat,
kiisalu nioqqutissanik nerisassaanngitsunik kalaallit isumassarsiaannik
assaannillu sanaanik peqartuarnissaat sulissutigaarput, Tina Hansen oqarpoq.
Nuannarineqarluartoq
Kalaaliminernit naatitat allallu nunatsinni
tunisassiarineqarsimasut nioqqutaasarnerat Pisiffiup pisisartui kiisalu
Pisiffimmit nuannaarutigineqartoq, Tina Hansenip oqaatigaa.
Pisiffik suli allamik iliuuseqarpoq, tassa
aningaasatigut iluanaaruteqarneq kisiat eqqarsaatiginagu, aammali Kalaallit
Nunaanni ajunngitsuliornermut iluaqutaasunik isumassarsianik
ineriartortitseqataallunilu tuniniaaqataasarpoq.
- Ukiut tamaasa
assigiinngitsorpassuarnik suliniuteqartarpugut, soorlu maannakkut
ilaqutariinnut juullimut ikiorsiissutinik tunissuteqartarnitsinni NANUBØRN
suleqatigaarput, taanna oqarpoq.
Assigiinngitsorpassuit
Jonas Pedersen, Nuummi Brugsenimi neqilerisut
sulisuuvoq sulisartoq - ilaatigut puisip neqaanik, arferup neqaanik, tuttup
umimmaallu neqaanik aalisakkanillu assigiinngitsunik suliffeqarfimmit
illoqarfimmiittumit aamma Nuummi aalisartunit piniartunillu pisisarlutik,
taassuma oqaatigaa.
- Pilersuisoqarpugut
aalajangersimasumik, assersuutigalugu ilaannikkut saarullinnik suluppaakkanillu
100-150 kiilunik tikisitsisartumik, taamaattumik isumaqarpunga nunaqavissut
suleqatigilluarivut.
- Tuttukkat iluitsuutillugit
pisiarisarpagut taakkunanngalu spegapølsenik, grillpølsenik, tuguliamik
neqinillu pujuukkanik assigiinngitsorpassuarnillu sanasarpugut.
- Nunatsinni tunisassianik, soorlu
suppilianik, neqinik siatassanik aalisakkanillu assigiinngitsunik
assigiinngitsunik nioqquteqartarnerput pisisartutta nuannaarutigisarpaat, neqilerisoq
oqarpoq.
Nuummi Brugseni oktobarip naanissaata tungaanut
tuttunik 2 tonsinik piniartunit pisisamavoq, kalaaliminernillu pisiortortarneq
niuertarfinni neqileriffilinni allani aamma atorluarneqarsinnaasoq, Jonas
Pedersenilu isumaqarpoq. neqiterivimmik
piginnittunit allanit aamma taamaaliortoqarsinnaasoq. Sinerissami Brugsenip
pisiniarfii allat aamma nunaqavissunit tunisassianik pisisarput.
Kalaallit Nunaani Brugsenip aamma kalaallit
illuinut Danmarkimiittunut Københavnimilu napparsimasunut angerlarsimaffimmut kalaaliminernik
tunisaqartarpoq.
Neqileriffeqanngitsut
Pilersuisoq pisiniarfiit annersaraat illoqarfinni
qulini nunaqarfinnilu 53-ini 65-inik pisiniarfiuteqarluni, taakkunanili
neqileriffeqanngimmat kalaaliminernik allanillu nunatsinni tunisassianik
pisineq ajortoq, Pilersuisumi pisortaq Brian Weuge Chemnitz oqarpoq.
- Pisiniarfitsinni
neqileriffeqanngimmat kalaalimernit suliarisinnaaneq ajorpagut, taanna oqarpoq.
Pisiniarfinni inuussutissalerinermut
akuerisaasinik neqileriffiuteqarneq akusummat Pilersuisup pisiniarfiini
neqileriffinnik siunissami pilersitsinissaq pilersaarutaanngitsoq pisortap
ilanngullugu oqaatigaa.
