Umiatsiaararsortut illoqarfinni
anginerusuni najugaqartut, umiatsiaararsortunut illoqarfinni mikinerusuni
nunaqarfinnilu avinngarusimasuni najugalinnut naleqqiullugit, pisaminnik
tunisinissaminnut periarfissarissaarnerupput.
Atugassarititaasullu assigiinnerulissappata
sumi najugaqarneq apeqqutaatinnagu pisarineqartartut tamarmik tunitsivissaqartariaqartut,
Inatsisartunut ilaasortaq Adam Kristensen, Inuit Ataqatigiit, aamma
nunaqarfimmi aqutsisunut, Avannaata Kommuniani kommunalbestyrelsimut,
Inatsisartunullu qinigassanngortittoq oqarpoq.
Umiatsiaararsortut illoqarfinni
anginerusuni najugaqartut, umiatsiaararsortunut illoqarfinni mikinerusuni
nunaqarfinnilu avinngarusimasuni najugalinnut naleqqiullugit, pisaminnik
tunisinissaminnut periarfissarissaarnerupput.
Atugassarititaasullu assigiinnerulissappata
sumi najugaqarneq apeqqutaatinnagu pisarineqartartut tamarmik tunitsivissaqartariaqartut,
Inatsisartunut ilaasortaq Adam Kristensen, Inuit Ataqatigiit, aamma
nunaqarfimmi aqutsisunut, Avannaata Kommuniani kommunalbestyrelsimut,
Inatsisartunullu qinigassanngortittoq oqarpoq.
Kalaallit Nunaanilu kalaalimernik imminut
pilersorsinnaaneq anguneqassappat, suliffeqarfimmik kalaaliminernik
tunisassiorfimmik nunatta iluani nunattalu avataanut tunisassiortussamik
pilersitsisoqartariaqartoq, taanna isumaqarpoq.
Periusissiaq periarfissiisoq
Imminut pilersornerulernissamut
periusissiaq Kalaallit Nunaanni Imminut Pilersornissamut Periusissiaq 2025-2030,
Naalakkersuisut siorna decemberimi saqqummiuppaat. Innuttaasut amerlanerusut
inuussutissanik najukkaneersunik pitsaasunik peqqinnartunillu pissarsisinnaanissaat,
tassungalu ilanngullugu nunatsinni tunisassiat aqqutigalugit innuttaasut
amerlanerusut inuussutissanik pilersuinerup isumannaassusia pitsaanerusoq
atugarilissagaat, periusissiami anguniakkat pingaarnerit ilagaat.
Imminut pilersornissamut periusissiaq
atorlugu inuussutissalerinermut suliassaqarfiup iluani imminut
pilersorsinnaanerup annertusarnissaanut nunatut unammilligassat oqaluuserisassanngortillugillu
aaqqiissuteqarfiginissaat Naalakkersuisut siunnippaat. Inuussutissalerinermut
suliassaqarfiup iluani imminut pilersorsinnaanerup pitsanngorsarneqarneratigut
annertusarneqarneratigullu, inuussutissanik tunisassiornermut
sunniuteqarnerusussamut najukkanilu tunngaveqarnerusumut sinaakkutissanik
pitsaanerusunik pilersitsinissaq siunniunneqarpoq. Sinaakkusiussallu taakku
inuussutissanik najukkaneersunik pissarsisinnaanermik pitsaanerulersitsissasut,
suliffissanillu amerlanerusunik pilersitsissallutik, nunatsinnilu
piujuartitsinissaq tunngavigalugu ineriartortitsinissamut periusissiaq
atorneqassasoq, Nunalerinermut, Imminut Pilersornermut, Nukissiutinut
Avatangiisinullu Naalakkersuisoq Kalistat Lund, Inuit Ataqatigiit, siorna
decemberimi oqarpoq.
Inuussutissanik avammut niuerneq suli
danskit naalagaaffiannit akisussaaffigineqarpoq, akisussaaffiulli Kalaallit
Nunaannut nuunneqarnissaa ukiuni arlalinngortuni politikkikkut kissaatigineqartarsimammat,
Danmarkimi Inuussutissalerinermi Aqutsisoqarfik 2025-mi januaarimiit
tamakkiisumik ingerlasumik inuttalimmillu Nuummi allaffeqalersoq, Danmarkimi
Inuussutissalerinermut Naalakkersuisoqarfik una qaammat nalunaarpoq.
Misissuinerit aallartittariaqartut
Imminut pilersornerulernissamut
periusissiaq kiisalu Inuussutissalerinermi Aqutsisoqarfiup Nuummi
allaffeqalernera atorluarneqartariaqartut, Adam Kristensen, aamma Innaarsunni
aalisartuullunilu piniartuusoq, oqarpoq.
- Isorliunerusuni
nunaqarfippassuarnilu piniarnerinnaq inuussutissarsiutaavoq, amerlasuutigullu
pisat soorlu puisit, qilalukkat, aarrit, aalisakkat timmissat allallu tamaani
tunitsivissaqarneq ajorput, naallu illoqarfinni anginerusuni tamakku piumaneqarluartaraluartut
atuisunut apuunneq ajorput, taanna oqarpoq.
Illoqarfiit arlaanni tunitsivimmik
kalaaliminernik tunisassiorfimmik nutaamik pilersitsisoqartariaqartoq,
sinerissamilu illoqarfinni nunaqarfinnilu kalaalimernit tunineqarsimasut
tassunga assartorneqartassasut tunisassiarineqarlutillu, taanna isumaqarpoq.
- Isorliunerusuni
tunitsiveeqqanik containerinik qeritsitsivittalinnik
tunitsiviliortoqarsinnaavoq, taamaalilluni siornatigut
tunitsiveqarsimanngitsuni ukioq kaajallallugu tunisisoqarsinnaalissaaq.
- Nunatsinni imminut
pilersorsinnaanissaq politikkikkut anguniagaavoq, nutaaliornermillu
eqqarsanngikkutta tamatuma piviusunngortinnissaa ajornakusuussaaq.
- Taamaattumik suliffeqarfimmik
nunatta pissaritaannaaviinik tunisassiorfissamik ammaanissamut periarfissat
piaartumik misissorneqartariaqarput, taanna oqarpoq.
1980-ikkut ingerlaneranni Adam Kristensen
Innaarsunni tunitsivimmik nammineerluni ingerlataqarnikuuvoq pinakkallu
assigiinngitsorpassuit tigoorartarsimavai, taamaatumillu tunitsiveqarnikkut
misilittagaqarluarpoq.
