Kalaallinut Københavnimi ilinniagaqartunut kollegiami inissat amerlanerusut
Københavnimi Kalaallit Illuata Fonden DIS-imik isumaqatigiissutaata, kalaallit ilinniagaqartut Københavnip qeqqani kollegiami inisamik attartorsinnaanermut nutaanik periarfissaqalernissaat qularnaassavaa.
Assi: DIS
Københavnimi Kalaallit Illuat Fonden DIS-illu kalaallit ukioq siulleq ilinniartut Københavnimi pitsaasunik akigissaartunillu inissarsisinnaanerulernissaannik isumannaarinnittumik nutaamik suleqatigiinnissamik isumaqatigiissuteqaqqammipput .
Taama Københavnimi Kalaallit Illuat tusagassiuutinut nalunaarummini allappoq:
– Ulloq 1. August 2025 aallarnerifigalugu DIS’ip Georg Brandes Pladsimi kollegiaani inissat aqqaneq marluk kalaallinut, Kalaallit Nunaat qimallugu Danmarkimut ukioq siulleq ilinniariartortunut inniminneerneqassapput, pisortaq Leise Johnsen oqarpoq.
– Kalaallit inuusuttut ukiumi ilinniarfimminni siullermi toqqissisimanartumik qiterpasissumilu ineqarnissaminnut periarfissinnerat nuannaarutigisorujussuuarput. Kalaallit ilinniagaqartut tikilluaqquneqartutut misiginissaat, Danmarkimilu ilinniarnerminni allartilluarnissaat pingaartipparput.
DIS danskit ilinniartitaanermut ingerlatsivigaat, isumaqatigiissutikkullu kalaallit Danmarkimi ilinniartut ineqarneranni ajornartorsiutaannik aaqqeeqataasuussaaq, DIS’illu nunat tamat akornanni ilinniartuutaannik kulturikkut paarlaateqatigiinnermik nukittorsaasuussalluni.
– Kalaallit ilinniagaqartut kollegiatsinnut tikilluaqqunissaat qilanaaraarput. Tamanna DIS’ip Kalaallillu Nunaata akornanni attaveqaatinik nukittorsaanissamut anguniagaqarnitsinni alloriarneruvoq pingaarutilik, Helle Rykønen, Fonden DIS’imi academic director oqarpoq.
Ukiup siulliup qaangiunnerani Sølvgademi DIS’illuunniit kollegiaani allami niuerfimmi akit malillugit ineqarnerup sivitsornissaanut periarfissaqassaaq.
