KL

DK

Kalaallisut oqaasillit salliutinneqartariaqarput

Naligiissitaaneq assigiinngisitsinnginnissarlu pillugit inatsit Inatsisartuni akuerineqangajalerpoq. Assigiinngisitsisutut isigineqanngitsumik kalaallisut oqaasillit atorfinitsitsinermi salliutinneqarnissaat, ataatsimiititaliap allanngortitsinissaminut piumasaqaatigisatuaraa.

Naalakkersuisup Naaja H. Nathanielsenip (IA) Inatsisinut Ataatsimiititaliap piumasaqaatai akuerai, tassa inatsimmut nutaamut akerliunngitsumik kalaallisut oqaaseqarnissamik piumasaqartoqarsinnaasoq.
Thomas Munk Veirum
Tusagassiortoq
Saqqummersinneqarpoq

Sapaatip-akunnerani matumani naligiissitaaneq assigiinngisitsinnginnissarlu pillugit inatsit Inatsisartuni akuerineqarnissaa naatsorsuutaavoq. Ilaatigut ammip qalipaataa, naartuneq kinguaassiuutitigullu sammiveqarneq tunngavigalugit immikkoortitsineq inatsimmi inerteqqutigineqarpoq, aamma Naligiissitaanermut Ataatsimiititaliamik pilersitsisoqassaaq.

- Inuit innarluutillit ullumikkut assigiinngisitsinissamik inerteqquteqarnermi ilaatinneqannginnerat inuppassuit tupaallaatigisarpaat. Tamanna aamma LGBT+-inut atuuppoq. Pitsaanerusumik iliorsinnaasugut Naalakkersuisut isumaqarput, inatsisissatut siunnersuutip aappassaaneerneqarnerani taamatut ilaatigut naalakkersuisoq Naaja H. Nathanielsen (IA) oqarpoq.

Siunnersuut 2023-mi ukiakkut ataatsimiinnermi saqqummiunneqarpoq, tamatumalu kingorna Inatsisinut Ataatsimiititaliap siunnersuut misissorpaa, aalajangersimasumillu ataatsimik allannguisoqarnissaa ataatsimiititaliap piumasaraa.

Tassa 'atorfinitsitaanermi atugassarititaasuni kalaallit oqaasiisa atorneqarnissaat pillugit piumasaqaatinik aalajangersaasoqarnissaanut' inatsit nutaaq akornutaassanngitsoq.

Kalaallisut oqaatsinik atuisinnaasariaqarneq piumasaqaataasinnaavoq

Tamanna tunngavigalugu Naalakkersuisut allannguutissatut siunnersuuteqarput, ataatsimiititaliap piumasaqaataa naammassiniarlugu:

- Assigiinngisitsinissamut inerteqquteqarnerup unioqqutinneqarneranik kinguneqanngitsumik, allannguutissatut siunnersuut aqqutigalugu atorfilinnut atorfinitsitaanermi atugassarititaasuni kalaallisut oqaatsinik atuisinnaasariaqarneq pillugu piumasaqaateqartoqarsinnaavoq.

- Piviusut naapertorlugit atorfiup suliarinissaanut tamanna pisariaqartinneqarpat, siunertanullu pisariaqartunut inatsisitigut akuerisaasunut tamanna tunngavissaqarpattaaq, atorfinitsitaanermi atugassarititaasunut atatillugu oqaatsit allat atorneqarsinnaanerannik aamma piumasaqaateqartoqarsinnaassaaq. Taamaalilluni sulianut tunngatillugu tamanna tunngavilersugaassaaq, atorfiullu pineqartup suliarineqarsinnaanissaanut naleqquttuussalluni, allannguutissatut siunnersuummut isumaliutissiissutini Naalakkersuisut allapput.

Naligiissitaaneq assigiinngisitsinnginnissarlu pillugit inatsit marlunngorpat pingajussaaneerneqassaaq.

samfund inuiaqatigiit

ATORFIIT Se alle jobs

Powered by Labrador CMS