Silassorissuusiap — AI — assit piffissap sivikitsuinnaap, iluani pilersissinnaavai. Kalaallit nipilersuusiai amerlasuut issuarneqarlutillu assingusumik sananeqarlutik inuit nittartakkatigut attaveqaqatigiittarfiini, saqqummersinneqartarput.
Kikkut nipilersukkanut piginnittussaatitaanerannut, aamma eqqumiitsuliortut nipilersugaat silassorissuusiamik issuarlugit sananeqartut atorneqaraangata taakkua nersorneqartarlutillu akilerneqartarnersut pillugit, apeqqut qaqilerneqarpoq.
Silassorissuusiap — AI — assit piffissap sivikitsuinnaap, iluani pilersissinnaavai. Kalaallit nipilersuusiai amerlasuut issuarneqarlutillu assingusumik sananeqarlutik inuit nittartakkatigut attaveqaqatigiittarfiini, saqqummersinneqartarput.
Kikkut nipilersukkanut piginnittussaatitaanerannut, aamma eqqumiitsuliortut nipilersugaat silassorissuusiamik issuarlugit sananeqartut atorneqaraangata taakkua nersorneqartarlutillu akilerneqartarnersut pillugit, apeqqut qaqilerneqarpoq.
Kalaallip eqqumiitsuliortup maluginiarpaa suliffeqarfissuit siornatigut suleqatigisartakkami, silassorissuusiaq atorlugu ussassaarutinik assinik atuinerulertut. Tamanna isumaqarpoq suliassat tassunga siornatigut suliakkiutigineqartaraluartut, silassorissuusiaq atorlugu silassorissuusiap pilersitaanik taarserneqartut.
- Silassorissuusiap atugaanerulernerata kingorna suliassaqarpallaarunnaartarpunga, Marc Fussing Rosbach oqaluttuarpoq. Taanna filmiliornermik aamma visual effectsinik ukiuni 15-ini suliaqartuuvoq, Kalaallit Nunaannilu siulliit ilaanniittutut tamanna inuussutissarsiutigaa.
Marc naapertorlugu allat suliaat silassorissuusiaq atorlugu assilineqaraangata tamanna tillinneruvoq.
- Uannut tamanna akueriuminaalluinnarpoq. Eqqumiitsuliortup misilittakkani ukiuni arlalinni inerisakkani, atorlugit pilersitsisarpoq. Silassorissuusiaq atorlugu pilersitsineq isumaqanngilaq nammineq pilersitsinerusoq, taanna oqarpoq.
Eqqumiitsuliat nutserneqaraangata Kalaallit Nunaanni eqqumiitsuliortut kattuffianni, Eqqumiitsuliornikkut Pinngorartitsisut Ingerlatsisuinilu (EPI), siulittaasoq aamma taama isumaqarpoq.
- Eqqumiitsuliortut eqqumiitsuliaannik akerlilersuisumik aamma akuersissuteqaratik assiliinerinik atuinermik kinguneqartillugu silassorissuusiamik atortorissaaruteqarneq akerleraarput, EPI-p siulittaasua Ilannguaq Petrussen oqarpoq.
Taassuma tikkuarpaa eqqumiitsuliortut aningaasaqarniarnerannut tamanna attuumassuteqaannanngitsoq, aammali inuiaqatigiittut eqqumiitsuliornermut isiginnittaatsitsinnik tamanna allanngortitsisinnaasoq.
- Ernumanarpoq suliaq kusanartoq ullutsinni saqqummersinneqarnerani, isumaqartoqarsinnaammat silassorissuusiaq atorlugu suliaq suliarineqarsimasoq eqqumiitsuliortup pikkoriffia eqqarsaatigineqarani, oqarpoq.
Eqqumiitsuliortutut inuussutissarsiortut suliarisartagai, sialssorissuusiamit tiguarneqarnissaat, Marc Fussing Rosbachip isumakuluutigaa.
Assi: Oscar Scott Carl
Isumakuluutigineqartorli tassaaginnanngilaq eqqumiitsuliortut pisinnaatitaaffii aningaasaqarnerallu.
Marc Fussing Rosbachip aamma inuit kakiorneri silassorissuusiaq atorlugu eqqunngitsumik saqqummiunneqartarneri suliffeqarfissuup ussassaarutaani saqqummertartut qisuariarfigai.
Kakiuinermik ileqqutoqaat uummarsarniarlugit attatiinnarniarlugillu inunnik suliniuteqartoqarnerani, Kalaallit kulturiata eqqunngitsumik saqqummiunneqarnera ajornartorsiutaasoq, eqqumiitsuliortoq isumaqarpoq
- Kultoorerput ataqqissagaanni, taama isiortoqarsinnaanngilaq. Inuit kakiornerit atugaaleqqinnissaat piffissami sivisuumi sulissutigaarput, silassorissuusianillu maanna atuisoqalerpoq. Tamanna mamarsaarnarpoq, oqarpoq.
Aamma taassuma ernummatigaa inuit nunanit allaneersut assit taamaattut aqqutigalugit Kalaallit Nunaat pillugu eqqunngitsumik paasisaqartalernissaat. Kalaallit kulturiat pillugu eqqunngitsumik paasissutissiineq tamanna nunamut ileqqunullu tunngatillugu eqqunngitsumik isiginnittaaseqalersitsisarpoq.
Silassorissuusiaq pillugu eqqumiitsuliortullu pisinnaatitaaffii pillugit politikkikkut siunnersuut Inatsisartut ukiakkut ataatsimiinneranni, Aqqalu C. Jerimiassenip Atassummeersup oqallisissiatut siunnersuutaa, tassa eqqumiitsuliornermi silassorissuusiap atorneqarnera pillugu oqallisigineqassaaq.
Nipilersuutit, assit suliallu allat silassorissuusiaq atorlugu sanaat erseqqissumik ilisarnaateqartinneqarnissaat kiisalu kalaallit eqqumiitsuliortut pisinnaatitaaffiisa aningaasatigullu soqutigisaasa pitsaanerpaamik illersorneqarsinnaanerat, siunnersuummi ilaatigut pineqarput.
Atassutip kissaatigaa Naalakkersuisut ilaatigut Koda Kalaallit Nunaat aamma eqqumiitsuliortut kattuffii peqatigalugit misissussagaat, silassorissuusiap atorneqarnerani qanoq ammasumik inuillu piviusorsiortunik suliaannik ataqqinnittumik atorneqarsinnaanersoq. Siunnersuummili siunertarineqanngilaq silassorissuusiap inerteqqulaalernissaa, siunertaraali paasissutissanik ammanerusumik saqqummiussisoqarnissaa eqqumiitsuliortullu illersorneqarluarnerulernissaat pineqarpoq.
Marc Fussing Rosbach politikerinut silassorissuusiat atortorissaarutigineqartarnerat pillugu oqallinnermi ersarissumik kissaateqarpoq.
- Isumaqarpunga eqqumiitsuliortut aningaasarsiornerat silassorissuusiaq atorlugu sanaanit akornuserneqassanngitsoq, politikkerillu eqqumiitsuliortut pisinnaatitaaffii sulinerminnilu atugaat pingaartinnerusariaqaraat, Marc Fussing Rosbach oqarpoq.
Ilutigisaanillu taassuma ujartorpaa silassorissuusiap kingunerisinnaasai ammanerusumik paasissutissiissutigineqartalernissai. Taanna isumaqarpoq inuiaqatigiit allat suliaannik akuersissuteqaratik atuineq ammasumik oqallisigisariaqaraat, aamma erseqqissumik oqaatigisariaqartoq taamaaliornerup tillinnertut isigineqartariaqarnera.
- Neriuppunga suliffeqarfiit pisortallu suliffeqarfiutaat silassorissuusiamik ilisarsisinnaasunik atuinermut erseqqissunik malittarisassaqalerumaartut, ilaatigut ussassaarutinut attaveqaqatigiinnermullu tunngatillugu, oqarpoq.
EPI erseqqissunik sinaakkusiisoqarnissamik kissaateqarpoq EPI-mi ajornartorsiut suli oqallisigineqanngilaq, siulittaasulli Ilannguaq Petrussenip oqaatigaa, eqqumiitsuliortut illersorniarlugit software-nut paasissutissanullu pisinnaatitaaffiit ilanngunneqarnissaat siunissami pisariaqalersinnaasoq.
Aamma isumaqarpoq maannakkut piffissaasoq, najoqqutassianik iliuusissanik suliaqarnissamut, silassorissuusiat suli nutaajuallaartut.
- Eqqortumik ingerlasoqarnissaa uagutsinnut pingaaruteqarpoq. Ingerlatsinermut sinaakkutissat aalajangerneqarnissaanut peqataarusuppugut, sulili tamanna suliaralugu aallartinngilagut, Ilannguaq Petrussen oqarpoq.
Marc Fussing Rosbachip EPI-llu ineriartorneq tamanna ernumagigaluaraat, silassorissuusiap atortussatut atorneqartarnissaanik tamanna itigartitsinerusariaqanngilaq.
Aammattaaq oqaatigaat teknologiip pitsaasumik atornissaanut periarfissarsiortoqartariaqartoq, eqqumiitsuliortunut ajoqutaanngitsumik. Ilaatigut piginnittussaatitaanermut, silassorissuusiap ammasumik atorneqarnissaanut sinaakkutillu ersarissuunissaat aamma qaqugukkut tiknoligip atorneqartarnissaa ataqqineqartariaqartoq.
