KL

DK

Kalaallit Meerartaata suliniut iluatsilluartoq siammarterniarpaa

Kalaallit Meerartaat Kullorsuarmi Nanortalimmilu misiliummik suliniuteqarnermigut iluatsitsilluarpoq, tassanilu najukkami innuttaasut suleqatigalugit innuttaasunut pitsaasunik suliniuteqarsimavoq. Maanna peqatigiiffiup suliniut nunami sumiiffinni amerlanerusuni ingerlanniarpaa.

Nanortalimmi 2023-mi Kalaallit Meerartaata aasaanerani tammaarsimaartitsinerani assilisaq. Aasaanerani tammaarsimaarnerni, meeqqanut inuusuttunullu iluaqutaasumik najukkami innuttaasut suliniuteqartarnerini pitsaanerusumik allannguisitsisarnerat uppernarsineqarpoq. Maanna suliniut Kalaallit Nunaanni sumiiffinni allani aamma siammarterneqassaaq.
KASSAALUK KRISTENSEN
Digitalimik aaqqissuisoq
Saqqummersinneqarpoq

Sumiiffinni minnerusuni suliniutit pitsaasut ikioqatigiilluni inerisarneqaraangata, meeqqat inuusuttullu iliuuseqarsinnaanerulerlutillu ingerlalluarnerulersarput. Tamanna Kullorsuarmi Nanortalimmilu misiliummik suliniuteqarnermit misilittagarineqalerpoq, maannalu suliniut Nordea-fondenimit taperserneqarluni illoqarfinnut minnerusunut nunaqarfinnullu amerlanernut siammaanneqassaaq.

Aningaasat taakku atorlugit peqatigiiffiup Kalaallit Meerartaat suliniummik ingerlatsisup illoqarfinni nunaqarfinnilu amerlanerusuni suliniut ingerlatissavaa, najukkami ataqatigiinnermik siuarsaanissaq siunertaralugu:

- Sumiiffinni ataasiakkaani inunnut isumalluutaalluartunut qanimut attaveqalernikuuvugut, ataatsimoorlutalu najukkami inuiaqatigiinnik patajaatsunik meeqqanut inuusuttunullu nutaanik periarfissiisunik pilersitsisinnaavugut – aamma sunngiffimmi sammisassaqartitsinernut nalinginnaasumik peqataasanngikkaluartunut.

-’Ikioqatigiinneq’ aqqutigalugu suliat ingerlareersut aaqqissuulluakkamik tapersersorpavut, tamanut iluaqutaasumik imminnullu napatissinnaasumik ineriartorsinnaaqqullugit, Kalaallit Meerartaanni allattoqarfimmi pisortaq Julie Lynge oqarpoq.

Allannguilluartartoq

Ukiut qulit ingerlanerini Kalaallit Meerartaat Kalaallit Nunaanni tamarmi inuiaqatigiinni minnerusuni aasarsiortitsisarluni suliaqarnikuuvoq. Ukiorpassuarnilu misilittakkat sumiiffinnilu ataasiakkaani attaveqaatit patajaatsut maanna ataavartumik suliniuteqalernermik ’Ikioqatigiinnermik’ kinguneqarput.

’Ikioqatigiinneq’ misiliutaasumik suliniutitut 2023-mi Kullorsuarmi Nanortalimmilu aallartinneqarpoq, ukiunilu aggersuni sumiiffinni inuiaqatigiinnut amerlanerusunut siammaanneqassalluni. Ilisimasat periutsillu sapinngisamik amerlanerpaanit iluaqutigineqarsinnaalernissaat Kalaallit Meerartaasa aamma SOS Børnebyerne suleqatigiinnerisigut qularnaarneqassaaq.

- Sumiiffiit ataasiakkaat pillugit Kalaallit Meerartaasa annertuumik ilisimasaqarnera attaveqarluarneralu suliniummi tunngaviupput. Ilaqutariinnik meeqqanillu, assersuutigalugu atornerluineq piitsuunerluunniit pissutigalugit atugarlioqqajaasunik SOS Børnebyerne-mit tapersersuisinnaavugut, piffissaq ungasinnerusoq eqqarsaatigalugu sullissisarnitsinnit ukiorpassuarni misilittagarilernikuusatsinnik.

- Aammattaaq ersarissunik anguniagassaliornermik suliniutinilu iliuuseqartarnermik kiisalu suliniutit kingornisigut malinnaaviginerinik misilittakkatsinnik periutsitsinnillu tapersiisinnaavugut. Taamaaliornikkut ataatsimoorluta ilaatigut allannguinissamut ilusiliussassaq inerisarsinnaavarput uppernarsaasersorlugulu, sumiiffinni inuiaqatigiinni allani ingerlateqqinneqarsinnaanngorlugu, taama oqarpoq Signe Fink, SOS Børnebyerne-mi Senior Programme Manageritut atorfeqartoq.

grønlandske børn nanortalik børn og unge samfund inuiaqatigiit kullorsuaq

ATORFIIT Se alle jobs

Powered by Labrador CMS