KIGUTIT NAKORSAASA PEQATIGIIFFIAT SODAVANDINUT AKITSUUTIT APPARTINNEQARNISSAAT PILLUGU
Kalaallit Nunaanni kigutit peqqissusiannut navianartorsiortitsivoq
Nuna tamakkerlugu assigiiaartitsinissaq siunertaralugu sodavandit akitsuutaat appartinneqassasut Naalakkersuisut siunnersuutigaat. Tamanna isumassatsialaanngitsoq Kigutit Nakorsaasa peqatigiiffiat isumaqarpoq. Akit apparpata meeqqat inersimasullu sodavandisornerulerpata kigutit peqqissusaannut innarliissasoq peqatigiiffik isumaqarpoq.
Kigutit nakorsaat siunissami kigutinik syremik ajoquserneqarsimasunik putoorsimasunillu amerlanerusunik takusalernissaminnut aarleripput.
Sodavandimmi akikinnerulerpata kigutinik syremik ajoqusernernik kigutillu putoornerinik kinguneqarsinnaavoq.
- Meeqqat inersimasullu sodavandisorpallaaraangata kigutit putoortarput, Karen Haarbo-Nygaard, Kalaallit Nunaanni Kigutit Nakorsaasa Peqatigiiffianni siulittaasoq tusagassiuutinut nalunaarummi allappoq.
18-inik ukiullit 78%-iisa kigutaat putoqarput
Peqatigiiffik kisitsisinik qimerluuisimavoq. Kisitsisimmi takutippaat meeqqat arlallit kigutaat putoqartut. 18-inik ukiullit 78%-ii kigutimikkut putoqarput imaluunniit putoqarsimallutik. Tassani sodavandisorpallaarneq patsisaanersaasoq peqatigiiffik allappoq.
Taamaattumik sodavandip kingunerisinnaasai pillugit politikerit eqqummaarinnerusaariaqartut, peqatigiiffik mianersoqqusivoq.
- Meeqqat kigutitik suli ukiorpassuarni atortussaavaat, misissuinerullu takutippaa inersimasunngoraangamik kigulluttunngortartut. Taamaattumik sodavanditorpallaarnermi kigutit aserunnginnissaat pingaaruteqarpoq. Kigutimmi annaaneqaraangamik uteqqinneq ajorput, Karen Haarbo-Nygaard oqarpoq.
Kalaallit Nunaanni kigutit paariinnarneqarlik
Akitsuutit assigiissitaarneqarnissaat Naalakkersuisut siunnersuutigaat, taamaalilluni nuna tamakkerlugu sodavandi literimut 5,75 koruuneqalissalluni. Maanna Kitaani sodavandi literimut 7,50 koruuneqarpoq, Tunumi, Qaanaami nunaqarfiinilu literimut 5,75 koruuneqarluni.
Kigutit Nakorsaasa peqatigiiffiata inatsisissatut siunnersuut ernumassuteqangaarlutik isigaat.
Kalaallit Nunaanni kigutit paarilluarneqarnissaat eqqarsaatigalugu akitsuutit maanna atuuttut attatiinnaqquaat:
- Kigutit peqqissusaannut ulorianartorsiortitsinertut isigaarput. Atuineq annertusissappat kigutit suli amerlanerusut putoornissaat syremillu ajoquserneqarnissaat aarleqqutigarput. Taamaattumik akitsuutit allanngortinneqarnissaat ernumanartorujussuuvoq, Karen Haarbo-Nygaard, Kalaallit Nunaanni Kigutit Nakorsaasa Peqatigiiffianni siulittaasoq oqarpoq nangillunilu:
- Qannerput timitta sinneranut attuumassuteqarpoq, nalunngilarpullu qanermi nappaatit peqqissutsitsinnut inuunitsinnullu sunniuteqarsinnaasut, Karen Haarbo-Nygaard nassuiaavoq.