Kalaallit Nunaanni Politiit: – Qivittut pillugit nalunaarutiginnittoqartarpoq
Kalaallit Nunaanni Politiit qivittut pillugit 2022-miilli 14-inik nalunaarfigineqarsimapput. Inuit illoqarfimmiit ungasissumi avinngarusimasumi, amerlanertigut pinngortitami, inuuniarlutik aalajangertut inunnit pinngortitami angalasunit uissuumminartumik qisuariarfigineqartarput. Qaqqaniinnerli inerteqqutaanngilaq. Saaffiginnissutilli inunnut taakkununnga isumaalunnermik aallaaveqartarput.
Assiliisoq: Dorthea Reimer-Johansen
Nakuusernerit, pinngitsaaliinerit, tillinniarnerit allallu pinerluutit pillugit Kalaallit Nunaanni Politiit nalunaarfigineqartarput. Aammali qivittut – inuit illoqarfimmi inooqataajunnaarlutik qaqqani inuuniarlutik aalajangersimasut – pillugit saaffiginnittoqartarpoq.
QIVITTUT PILLUGIT NALUNAARUTIT
Politiit 2022-miilli qivittut pillugit nalunaarutit 14-it tigusimavaat.
- Qaqqamiinneq tassanilu najugaqarneq inerteqqutaanngilaq, taamaattumik innuttaasut inunnik qaqqamiittunik nalunaaruteqartarnerat politiit suliassarinngilaat, Kalaallit Nunaanni Politiit Sermitsiamut akissummi allapput.
Qivittut tassaapput inuit illoqarfimmiit ungasissumi avinngarusimasumi, amerlanertigut qaqqani, inuuniarlutik aalajangersimasut. Qaqqaniinnerli inerteqqutaanngilaq. Saaffiginnissutilli inunnut taakkununnga isumaalunnermik aallaaveqartarput.
Qivittut pillugit nalunaarutit paasissutissiissutitut nalunaarsorneqartarput
Qivittut pillugit nalunaarutit amerlanerpaartaat suliassanngortinneqarneq ajortut Kalaallit Nunaanni Politiit Sermitsiamut ilisimatitsissutigaat. Amerlanersaat nalunaarutit paasissutissiissutitut nalunaarsorneqartarput – paasissutissat toqqorsivimmut ilineqartartut iliuuseqarfigineqangaaratillu. Inuk navianartorsiorsorineqarpat aatsaat suliassatut nalilerneqartarpoq, maqaasineqartut nalunaarutigineqarsimappat imaluunniit unioqqutitsisimasoq nalunaarutigineqarpat.
- Inuit qaqqamiittut, qaqqami najugallit assigisaanilluunniit inissisimasut maqaasineqartut nalunaarutigineqarpata Politiinut aatsaat suliassanngussaaq, assersuutigalugu annaassiniartoqarluni, peqqinnissaqarfimmit ikiorneqarnissamik pisariaqartitsisutut nalilerneqarpat imaluunniit inuk inerteqqutaasumik iliuuseqarsimasutut nalunaarutigineqarpat.
- Suliat taamaattut Kalaallit Nunaanni Politiinit nalunaarsorneqartarput, pinerluttuliornertulli misissuiffigineqarneq ajorput.
Kalaallit Nunaanni Politiit 2022-miilli oqaaseq "qivittoq" atorlugu nalunaarutiginninnerit 14-iupput.
- Nalunaarutiginninnerit ukiut tamaasa januaarip aallartinneraniit septembarip qiteqqunnerata tungaanut pisarput. Ukiut kingulliit marluk oktobarimiit decembarip tungaanut nalunaarutinik tigusaqarsimanngilagut.
- Sumiiffiit eqqarsaatigalugit takusinnaavarput 2022-miilli nalunaarutigineqartut amerlanersaat Kitaaneersuusut, ilaat Kujataaneersuusut ataaseq Tunumeersuusoq, Kalaallit Nunaanni Politiit naggasiivoq.
