Kalaallit Nunaat Danmarkilu bussimi imminnut qaninnerullutik issiaqatigiipput
Danmark piareersimavoq namminersorneq pillugu inatsisip isumaqatigiinniutigineqaqqinnissaanut, aammalu Kalaallit Nunaanni aningaasaliinissamut kajumissuseqarluni. Aammattaaq oqaluttuarisaanitsinni pisimasut taartut isiginiarneqassapput. Tamanna erserpoq Marienborgimi sapaammi tusagassiortunik katersortitsinermi, tassani Naalakkersuisut siulittaasuata Jens-Frederik Nielsenip aamma oqaatigaa, Danmarkip Kalaallit Nunaallu bussimi imminnut qaninnerullutik issiaqatigiittut USA-mut tunngatillugu, tassanngaKalaallit Nunaat ataqqinninngitsumik pineqarsimammat.
Naalakkersuisut siulittaasuat Jens-Frederik Nielsen ministeriuneq Mette Frederiksenimik ataatsimeeqateqarpoq Marienborgimi. Marluullutik isumaqatigiipput USA-mut tunngatillugu ataatsimoorussamik iliuuseqarnissaminni bussini imminnut qaninnerullutik issiaqatigiissallutik. Tamatuma saniatigut aamma isumaqatigiipput namminersorneq pillugu inatsit misissorneqassasoq naalagaaffeqatigiinnerullu iluani suleqatigiinneq ineriartortinneqassasoq.
Assiliisoq: Trine Juncher Jørgensen
Naalakkersuisut siulittaasuat Jens-Frederik Nielsen ulluni makkunani Danmarkimiippoq siunissami suleqatigiinnissaq pillugu naalagaaffiummik oqaloqatiginnissalluni.
Sapaammi Marienborgimi Sjællandip avannaani ataatsimeeqatigiipput, tassanilu tusagassiortut nunarsuarmit tamaneersut qaaqqusaapput tusagassiortunik katersortitsinermut sivikitsumut, tassanilu USA-mut nalunaarut erseqqippoq:
Kalaallit Nunaanniit Danmarkimiillu amerikami præsidentimik Donald Trumpimik naapitserusuppugut suleqatigiinnissarlu oqaluuseralugu, kisianni tamanna ataqqinnittumik ingerlanneqassaaq.
- USA-mik suleqatiginninnitta nanginnissaanut piareersimavugut, kisianni ataqqeqatigiinnissaq kissaatigaarput. Tamanna Naalakkersuisunit erseqqissumik arlaleriarluta nalunaarutigaarput. Pisiarineqarsinnaasutut pineqassanngilagut qaquguluunniit. Pingaaruteqarpoq tamassuma paasilluarneqarnissaa, taava kingorna suleqatigiinneq oqaluuserisinnaavarput, Jens-Frederik Nielsen oqarpoq, ilanngullugulu oqaatigalugu nammineq paasisinnaagini, amerikkarmiut Nuummi aallartitaqarfiani sulisut amerleriaateqarneranut tunngatillugu ernumassuteqartoqarsinnaammat.
- Kisianni Nuummi aallartitaqarfik ukiut arlallit matuma siorna pilersinneqarpoq, tamatta taamani nuannaarutigaarput amerikarmiunik annertunerusumik suleqatigiinnissaq inerisarneqalermat. Aallartitaqarfiup sulisuisa amerleriaateqarnerat aamma aalajangerneqarpoq Trumpip præsidentinngunngikkallarneranili. Paasisinnaavara, arlaatigut ernumassuteqartoqarsinnaasoq, tamannalu pingaaruteqarpoq eqqumaffigissallugu. Taamaattumik aamma pisut tunngavigalugit naalagaaffeqatigisatsinnut EU-mullu annertusisumik attaveqarpugut, Jens-Frederik Nielsen oqarpoq.
Namminersorneq pillugu inatsit nutarterniarneqalerpoq
Kalaallit Nunaata Danmarkillu suleqatigiinnerannut tunngatillugu suleqatigiinnissamut isumaqatigiissut nutarterneqarnissaa pillugu isumaqatigiinniarnissaq naalakkersuisooqatigiit siusinnerusukkut nalunaarutigereerpaat, siunissami suleqatigiinnerup nutaamik nutaaliaasumillu ilusilersorneqarnissaa kissaatigalugu.
"Pissutsit taamaaginnarnissaat periarfissaanngilaq", naalakkersuisooqatigiinnissamut isumaqatigiissummi allassimavoq.
Tassani ilaatigut naligiinnerusumik suleqatigiinnissaq, Kalaallit Nunaanni aningaasaliinissamut isumaqatigiissusiornissaq aammalu namminersorneq pillugu inatsisip nutarterneqarnissaanik piumasaqaatinut ilaapput, Mette Frederiksenillu uppernarsarpaa, danskit tungaanit piumassuseqartoqartoq sukumiinerusumik oqaluuserineqarnissaannut.
Jens-Frederik Nielsenip ilanngullugu oqaatigaa, Kalaallit Nunaat Danmarkimut aningaasartuutaasorineqartarnera maanna unitsinneqartariaqartoq.
Assiliisoq: Trine Juncher Jørgensen
Saammaasseqatigiinnissaq pillugu sulissutiginninnissaq ammaffigineqarpoq
Taakku marluk akornanni oqaloqatigiinnerni aammalu tusagassiortunik katersortitsinermi kingornatigut siornatigut pisimasut ilungersunartut pillugit oqaloqatigiissutigineqartunut ilaapput, tassanilu ministeriuneq itigartitsinngilaq saammaasseqatigiinnissamik ataatsimiititaliamik pilersitsisoqarsinnaasoq, soorlu Canadami New Zealandimilu taamaattoqarsimanera ilisimaneqartoq.
- Siumoortumik mattusseriinngilagut. Siuliani pisimasunut qiviartarpugut. Tamanna atuuppoq meeqqat misileraatigineqarsimanerinut tunngatillugu. Tamanna atuuppoq spiralilersuisimanermut atatillugu aammalu oqaluttuarisaanermi pisarsimasut pillugit misissuinermut tunngatillugu. Maanna pitsaasumik oqaloqatigiinnerput ingerlavoq alloriarnissatsinnut tunngavissaqarluarpugut, piareeruttalu, tamatumunnga tunngatillugu paasissutissiinissatsinnut qilanaarpugut, Mette Frederiksen oqarpoq.
