Kalaallit Nunaat Danmarkilu qaninnerulerput

Ippassaq tusagassiortunik katersortitsinermi erserpoq Nunatta Danmarkillu qaninnerulernissaat siuttut kissaatigigaat, tamannalu Naalakkersuisut siulittaasunngortussap Jens-Frederik Nielsenip uppernarsarpaa.

Naalakkersuisut siulittaasussaat, Ministeriuneq aamma Naalakkersuisut siulittaasuat tunuartussaq Kalaallit Nunaata Danmarkillu akornanni pissutsit aammalumi avataanni pissutsit pillugit piffissaqarluarlutik oqaloqatigiipput. Pingasuullutik isumaqatigiipput nunat taakku iluanni aaqqiagiinngissutit oqallisigineqarneri unikaallatsinneqassasut Kunngeqarfiup qaninnerpaamik suleqatigiisaata tungaanit, USA-mit sakkortuumik kimigiisertoqarnerata unitsinnissaanut nukiit atorneqartariaqarmata.
Saqqummersinneqarpoq

Qaammatit pingasuinnaat matuma siorna, Kalaallit Nunaata Danmarkillu nunat taakku akornanni unammilligassat kissassimaarnertaqaqisumik oqallisigaat. Kalaallit Nunaat Danmarkimut piumasaqaatinik saqqummiussaqarpoq naalagaaffeqatigiinnermi naligiinnerunissaq siunertaralugu, Danmarkilu oqaluttuarisaanermi "kapitalit taartut" pillugit nassuerutiginnissuteqartarluni. 

Oqallinnerli tamanna pileruttortoq præsidentimit akornuserneqarput, taanna isumaqarami Kalaallit Nunaat Danmarkimit tigusinnaaneranut pisinnaatitaaffeqarnerarluni. 

Múte, Mette aamma Jens-Frederik isumaqatigiipput Kalaallit Nunaata Danmarkillu akornanni aaqqiagiinngissutit qaqilerneqartut unikaallatsinneqassasut, tassami USA-p præsidentia Donald Trumpip piumasaraa Kalaallit Nunaat siunissami "piginneqalerlunilu aqunneqalissasoq".

Ippassaq tusagassiortunik katersortitsinermi erserpoq Kalaallit Nunaat Danmarkilu qaninnerusumik suleqatigiinnissaat isumaqatigiissutigineqartoq. 

Qanittumik suleqatigiinneq ingerlaqqittariaqarpoq ineriartortinneqarlunilu

Tamanna Naalakkersuisunut siulittaasunngortussap Jens-Frederik Nielsenip Sermitsiamut uppernarsarpaa, tusagassiortunik katersortitsinerup kinguninngua:

- Isumaqarpunga avatitsinni pisut eqqarsaatigalugit qanittuararsuusugut, aamma isumaqarpunga suleqatigiissutit allat eqqarsaatigalugit, suli naalagaaffeqatigiinnerup iluaniinnitsinni pitsanngorsartuartariaqartut aamma qaninnerusariaqartugut, ulloq taanna alloriaqqinnissatsinnut qulakkeerinnissinnaanngornissatta tungaanut.

Jens-Frederik Nielsen naliliivoq avataanit pisut aallaavigalugit Nunatta Danmarkillu akornanni suleqatigiinneq qaninnerulertoq:

- Tamannali isumaqanngilaq suna tamaat iluarillugu ingerlasugut, aamma isumaqanngilaq nunatsinniit piumasaqaatit sakkortut tunuarterfigilerneqassasut, naalagaaffeqatigiinni naligiinneq angorusullugu.

Qanormi Danmarkip Kalaallillu Nunaata avataaniit tatisiniarneq akiorsinnaavaat, pilersaaruteqarpisi?

 - Pilersaarusiortariaqarpugut aamma ataavartumik oqaloqatigiittariaqarpugut, naalagaaffeqatigiinnerup iluaniinnaanngitsoq, aammali avatitsinni iligisagut qanimut oqaloqatigisariaqarpagut. Assersuutigalugu annertunerusumik EU-mut aamma saattariaqarpugut, Jens-Frederik Nielsen oqarpoq nangillunilu:

 - Piffissami matumani pisut ullut tamaasa allanngoraqattaalernikuupput, taamaammat ataavartumik oqaloqatigiinneq suleqatigiinnerlu qitiulluinnartussaapput.

Powered by Labrador CMS