KL

DK

Kalaallit Nunaat Issittumi aallartitamik toqqaassaaq

Nunanut allanut ministerip Lars Løkke Rasmussenip (M) Kalaallit Nunaannit Issittumi aallartitamik toqqaanissani qilanaaraa.

- Aammattaaq qilanaaraara, maanna Kalaallit Nunaanniit Arktisk Rådimut ambassadøri arktiskimik toqqarneqarnissaa, Kalaallit Nunaanni, Savalimmiuni Danmarkimilu nunanut allanut tunngasunut sullissiviit qanimut suleqatigalugit naalagaaffiup soqutigisai Arktisk Rådimi isumagineqassammata, oqarpoq nunanut allanut ministeri Lars Løkke Rasmussen (M).
Ritzaus Bureau
Saqqummersinneqarpoq

Kalaallit Nunaanni naalakkersuisut Issittumi aallartitassatut toqqaanissamut akisussaaffeqalerput, aamma Danmark sinnerlugu Issittumi Siunnersuisoqatigiinni siulittaasuussapput.

Naalagaaffeqatigiit aappaagu maajimiit Issittumi Siunnersuisoqatigiinni siulittaasuuffik ukiuni marlunni atuuttussami akisussaaffigilerpassuk tamanna pissaaq, nunanut allanut ministereqarfik tallimanngornermi tusagassiuutinut nalunaarummi allappoq.

Taamaalilluni Kalaallit Nunaata issittumi aallartitamik toqqaasinnaanngorpoq, tamannalu kissaatigineqarsimaqaaq.

- Aamma qilanaaraara issittumi aallartitamik toqqaanissarput, taannalu Kalaallit Nunaanni, Savalimmiuni Danmarkimilu nunanut allanut tunngasunut oqartussat qanimut suleqatigalugit kunngeqarfiup Issittumi Siunnersuisoqatigiinni soqutigisaanik isumaginnissaaq, nunanut allanut ministeri Lars Løkke Rasmussen (M) oqarpoq.

Danmarkip Savalimmiullu aallartitaq akuerissavaat, kingornalu Lars Løkke Rasmussenimit aallartitatut pisortatigoortumik ivertinneqassalluni.

Aallartitanngortussaq Nuummi Københavnimilu allaffeqalissaaq.

Nunanut allanut ministeri Danmarkip Afrika Kujallermi aallartitaa Tobias Elling Rehfeld issittumi aallartitatut siorna toqqarmagu kalaallit uggoraat.

Naalagaaffeqatigiinneq peqataatinneqarani toqqaasoqarpoq, tamannalu Naalakkersuisut siulittaasuata Múte B. Egedep isornartorsiorpaa.

Aallartitap kalaaliunissaa kissaatigalugu toqqortinngilaa, Lars Løkke Rasmussenili allatut isumaqarpoq.

- Qallunaat nunanut allanut tunngasunut oqartussaaffianni atorfinitsitsinermi inuiaassuseq tunngavigineq ajorparput, Politikenimut siorna apriilimi oqarpoq.

Tamatuma kingorna nunanut allanut ministeri danskillu naalakkersuisui isummaminnik allannguipput.

Nunanut allanut tunngasunut naalakkersuisup Vivian Motzfeldtip Issittumi Siunnersuisoqatigiinni siulittaasuuneq kunngeqarfik Danmark sinnerlugu akisussaaffigilissavaa.

Tromsømi aappaagu maajip 12-ianni tunniussinermut atatillugu tamanna pissaaq.

Issittumi Siunnersuisoqatigiit issittumi naalagaaffinnit arfineq-pingasunit peqatigiiffinnillu arfinilinnik ataavartumik ilaasortaasunik Issittumi nunap inoqqaavinut sinniisuusunik ilaasortaqarput.

Nunat arfineq-pingasut taakku tassaapput Canada, Danmarkip Kunngeqarfia, Finland, Island, Norge, Rusland, Sverige USA-lu.

Ruslandip Ukrainemik 2022-mi februaarimi tiguaanerata kingorna Ruslandip siunnersuisoqatigiinni inissisimaffia allanngorpoq.

Atorfilittat politikkerillu Ruslandimik maanna ataatsimeeqateqarneq ajorput.

/ritzau/

inuiaqatigiit samfund

ATORFIIT Se alle jobs

Powered by Labrador CMS